5. वादऊ छङक।

अब्राम नङ सारे कनान पुतमंऊ सा बोषङ ज्ञपतिङ, अला लि दोपोऊ इत लि छङ मातोइ तोइ। ओदोक, अब्रामु योबलङ सारे गुस दोरा लोऊ, “छु लोननङ परमेश्‍वरूस अङरा अला चिगजा तामा बाश माजुरऊ अला छङ ग चिगजा तामा शितिङ गोप गनमो तोक, खोन, अङ लेन लई हाजिरा ओया तो। दोनङ जन्‍नेटङ लऊ पिन दत दो अङरा इत चिगजा तऊ खेसतो।

अब्रामुस हाजिरा नङ जन्‍नेटङ लऊ पिनु। हाजिरास इत छङ तऊ, दत अब्रामुस दोऊ मिन इश्माएल तऊ। दत सारै हाजिरऊ रत माशोइ तोई। ओसपरिङ इश्माएल साहुम बोषङु तोइ, परमेश्‍वरूस हे लि अब्राम नङ कमचित लोऊ।

परमेश्‍वरूस रिंऊ, “ग थोनतु शेच्‍चन परमेश्‍वर तोक। ग कन नङ इत वादा छुततोक।” दत अब्राम मटङु ओपङ जुकयतु। परमेश्‍वरूस अब्राम रा जि लि लोऊ, “का गोप जातु अपा वंइ। ग कन नङ कन वंश पङरा दोपोऊ जागा तोमा शितिङ कनान देश खेसतोक, अला ग होमयो दोपोऊ परमेश्‍वर वंई। कनरा रंऊ जातु सिङ फोबलङ रा खतना लमा वंइ।”

“कन योबलङ सारै इत छङक तइ- दो वादऊ छङक वङरो। दोऊ मिन इसहाक तामा। ग दो नङ ञमफो रंऊ वादा जुरउ तइ दत दो इत चेइ जात वंऊ जेइ। ग इशमाएल रा लि इत चेइ जात जुरारोक, दत लि अङ वादा इसहाक नङ ञमफो पोसि।” दत परमेश्‍वरुस अब्रामु मिन लेऊ अब्राहम लऊ पिनु, दोऊ मोतलब तोइ “गोप पोऊ अपा”। परमेश्‍वरूस सारैऊ मिन लि लैऊ सारा तऊ, दोऊ मोतलब “गोप पोऊ अमा”।

ओदो दयार अब्राहमुस रंऊ पेरङु सिङ फोबलङ पङरा खतना लऊ पिनु। मोत मेननङ इत बोषङ ज्ञपतिङ, ओसपरिङ अब्राहम 100 बोषङु तोइ अला सारा 90 बोषङु तोइ, दत सारा गुस अब्राहमु छङ तऊ। हले परमेश्‍वरूस दोरा लोऊ तोइ दोक दोऊ मिन इसहाक तऊ।

इसहाक शरा वंऊ जेऊ दत परमेश्‍वरूस ओशि लोऊ अब्राहमु विश्‍वासु इम्‍तिहान किऊ, “रंऊ चेइ छङ रा तऊ, अला अङ‍ शितिङ पुजा तिऊ पिन।” दत अब्राहमुस परमेश्‍वरू कमचित रुङकु अला एनु छङ रा पुजा पिनमा शितिङ जुरऊ।

दत अब्राहम नङ इसहाक पुजा तीमा शितिङ ओदो जागऊ जेऊ दत इसहाकुस शुऊ, “हई अपा, ऊलपोऊ रा पुजा तीमा शितिङ सिङ ता तोई, दत लि पुजा तीमा शितिङ क्रात अमतो?” अब्राहमुस जवाब खेऊ , ”हइ अङ छङ, परमेश्‍वर पुजा तीमा शितिङ क्रात जुरारो।”

दत दोपङ पुजा तीमा शितिङ ओदो जागऊ रा पुतु, दत अब्राहमुस इसहाक रा छुतु ओदो जागऊ प्रेत तऊ पिनु। दो एनु छङ रा सतमयो तोइ दत परमेश्‍वरुस लोऊ, “पोस। छङ रा नाशङ थपिन। छङ ग सेसु तोक कि का अङरत बेऊ छुलोननङ कस कन चेइ छङ रलि अङरत माबचऊ तऊ।“

ञमफो यो अब्राहमुस इत करात रा तंऊ दो रकटङु नऊ फसतु पोसमिन तशे इसहाकु कला पुजा तीमा शितिङ परमेश्‍वरुस करात रा जुरऊ। अब्राहमुस गरीस- गरीस करातु पुजा तिऊ पिनु।

दत परमेश्‍वरुस अब्राहम रा लोऊ, ” छु लोन नङ का अङ शितिङ सिङ- सङ खेमा‍जुराशु, दत बस्‍कयङ रऊ चेइ छङ रा लि , दतो ग कनरा बोरङ खेसमा वादा लरोक । कन वंश पङ नमु नऊ कर्मा बस्‍कयङ लि खुचि वङरो। छु लोन नङ कस अङ कमचित गोऊ, ओदोक ग कन पेरङ नङ मुलुकु सिङ जात पङरलि बोरङ खेस्‍तोक।”