1. सृष्टै
ऐशैकैई पौरमेशवरे शुरु दी सौबी चीजौ कै सृष्टै कौरे। तैणै छौई दुसौ दै दुनिया कै औरौ जू किछै तिनुदौ औसौ तिनु सौबी कै सृष्टै कौरे। पौरमेशवर द्वारा धौरती कै रचना कै बाद धौरतै पांदी इनारौ औरौ रीती थै, जिथकै इबी तौड़ी पौरमेशवरे तिंदै कियौंई बै चीजौ खै ना बाणै रैई थी। पौरौ पौरमेशवर का आत्मा पाणी पांदी फैरांव थिया।
तौबे पौरमेशवरे बौल़ौ, “पेयाशौ हौ।” औरौ पेयाशौ हौए गौ। पौरमेशवरे दैखौ कै पेयाशौ आछौ औसौ औरौ तिथु “दुस” बौल़ौ। औरौ तैणै तिथु पेयाशै पौरेशौ इनारो जौई कौरौ जिथु तैणै “रात” बौल़ै। पौरमेशवरे सृष्टै कौरणौ कै आगले दुसौ दै पेयाशै कै रचना कौरे।
सृष्टै कौरणौ कै दुजै दुसै पौरमेशवरे बौल़ौ, “पाणी पांदी ऐक फासला हौं।” औरौ ऐक फासला हौए गौआ। पौरमेशवरे तैसी फासले खै “गौयण” बौल़े।
तीज़े दुसै पौरमेशवरे बौल़ौ, “पाणी ऐकी ठांव पांदी कौठौ हौए जांव औरौ शौकै जौमीन दैखीयो। तैणै शौकै जौमीनौ खै “धौरती” बौल़े औरौ पाणी खै “समुद्र” बौल़ौ। पौरमेशवरे दैखौ कै जू तैणै बाणै राए थियुं सै आछौ थियुं।
तोबै पौरमेशवरे बौल़ौ, “धौरती दै सान्त बान्त कै डाल़ औरौ नानड़ी डाल़टी जामौ। औरौ ऐशैकैई हौए गौ। पौरमेशवरे दैखौ कै जू तैणै बाणै राए थियुं सै आछौ थियुं।
सृष्टै कौरणौ कै चौथे दुसै पौरमेशवरे बौल़ौ, “गौयणै दौ पेयाशौ हौंव।” औरौ सूरज, चाँद औरौ तारै प्रकट होवे। पौरमेशवरे तिनु धौरती पांदी पेयाशौ दैणौ कारिए औरौ दुसौ औरौ रातै, मौसम औरौ सालो दै भेद कौरणौ कारिए बाणै।
पांचवे दुसै पौरमेशवरे बौल़ौ, “समुद्रौ दै जियुंदै प्राणी भौरे जाँव औरौ गौयणै दै चुड़कुल़ै ऊडांव।” ऐशैकैई तैणै पाणी मुंजी तिरणौवाल़ै सौबे जन्तुओं खै औरौ गौयणै कै चुड़कुल़ै खै बाणै। पौरमेशवरे दैखौ कै ऐजौ आछौ थियुं औरौ तिनुकै आशीष दै।
सृष्टै बाणणौ कै छौटवे दुसै पौरमेशवरे बौल़ौ, “जौमीनो पांदी रौणौवाल़ै सान्त भान्तै कै जानवर हौंव।” औरौ पौरमेशवरौ कै बौल़णौ शै ऐशैकैई हौऐ गौ। किछै पालतू पशु थिऐ, किछै जौमीनौ पांदी रिंगणवाल़ै, औरौ किछै जोंगलौ कै जानवर थिऐ। औरौ पौरमेशवरे दैखौ कै ऐजौ आछौ थियु।
तोबै पौरमेशवरे बौल़ौ, “आओ आमै आदमी खै आपणै रूपौ दै औरौ आपणै जैशणै बाणुबै। सै धौरती पांदी औरौ सौबी जानवरौ पांदी राज कौरदै।
औरौ पौरमेशवरे माट्टै कौरेबा तिथलैई आदमी खै बाणा औरौ तैसदै जीवन कै सांस भौरे दै। ऐसी आदमी कौ नांव आदम थियुं। पौरमेशवरे आदम कै राखणौ कारिए ऐक बौड़ै बागौ खै बाणा औरौ तिथकै दैखरेख कौरणौ कारिए आदम खै तिथै राखै दिया।
तैसी बागौ कै बिचौ दै पौरमेशवरे दो खास डाल़ लाए- जीवन का डाल़ औरौ भले औरौ बुरे कै ज्ञान का डाल़। पौरमेशवरे आदम कै बौल़ौ कै सै तैसी बागौ कै जीवन कै डाल़ औरौ भले औरौ बुरे कै ज्ञान का डाल़ौ खै छौड़ेबा ओकै कुणजैई बै डाल़ौ कै फौल़ कै खाए सौकै। जै तैणै तैसी डाल़ौ का फौल़ खौआ तौ सै मौर जान्दा।
तोबै पौरमेशवरे बौल़ौ, “ मोरदो कारिए ऐकली रौणौ आछौ ना आथी।” पौरौ कुणिए बै जानवर आदम कै साथै रौणौ लायक ना हौई।
इथकारिए पौरमेशवरे आदम खै गोएरे नींदौ दा पाए दिया तोबै पौरमेशवरे आदम कै ऐक पौसल़ै निकाल़ैबा तिथलैई ऐक बैटमाणिश बाणै औरौ तियौं आदम कै धौरे लियाए
जोबै आदमै तियों दैखै तौ तैणै बौल़ौ, “ कम सै कम ऐजै तौ मौ जैशणै औसौ! ऐजै ‘बैटमाणिश कैहलांदै, जिथुकै इयौं मौरदौ पौरेशै बाणै राए।” इथकारिए मौरद आपणै माँ-बापू खै छौड़े दैंव औरौ आपणी घौरवाल़ीयारी ऐक हौए जांव।
पौरमेशवरे मौरद औरौ बैटमाणिशौ खै आपणै रूपौ दै बाणै। तैणै तिनुकै आशीष दै औरौ तिनुखै बौल़ौ, “बौरिशी संतान औरौ पौते-परपौते पौएदा कौरौ औरौ धौरती कै भौरे दैंव!” औरौ पौरमेशवरे दैखौ कै जू किछै बै तैणै बाणै राए थियुं, सेजो बेजाए आछौ थियुं औरौ सै तिनु सौबी शै बैजाए खुशी थिया। ऐजौ सौबे ठुँ सृष्टै बाणणौ कै छौटै दुसै हौए रौ थियुं।
जोबै सातौ दुस औऊ तौ जू किछै पौरमेशवरे कौरे लौ थियुं, तैणै तिनु सौबी कामौ खै खत्म कौरे। तैणै सातवे दुसौ खै आशीष दै औरौ तिथु पवित्र ठौरौऊं, जिथुकै तैसी दुसै तैणै सौबी चीज़ौ कै सृष्टै बाणैबा खत्म कौरे राए थै। ऐशैकैई पौरमेशवरे दुनिया की औरौ जू किछै तिन्दु औसौ तिनु सौबी कै सृष्टै कौरे।
उत्पत्ति अध्याय 1-2 पौरेशै बाइबल कै ऐक काहाणै
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।