2. पाप दुनिया दा औऊंवा

आदम औरौ तैसकै घौरवाल़ी पौरमेशवर कै तिनु कारिए बाणैयौंदै तैसी सुन्दर बागौ दै रौंदे बैई बैजाए खुशी थिऐ। तिनुमुंजी दै कुणिए बै खौटणौ नै बाम्बौ थिऐ, तोबे बै यों बातो लेई तिनु मुंजीदै कुणिए बै शरमाँव नै थिए। जिथुकै दुनिया दा पाप नै थी। सै जादातर तैसी बागौ दै घोमेया कौरौ थिऐ औरौ पौरमेशवर शै बात कौरया कौरौ थिऐ।

पौरौ तैसी बागौ दा ऐक सांप थिया। सै बैजाए चालाक थिया। तैणै तिऔं बैटमाणिशौ खै पुछु, “का सौथी खै पौरमेशवरे तुऔं खै ऐसी बागौ कै कौसी बै डाल़ौ कै फौल़ कै खाणौ शै मना कौरे राए?

तियौं बैटमाणिशै जबाब दिया, “पौरमेशवरे आमु खै बौल़ै राए कै आमै तैसी भले औरौ बुरे कै ज्ञान कै डाल़ौ कै छौड़ेबा कौसी बै डाल़ौ कै फोल़ौ खै खाए सौकु। पौरमेशवरे आमु खै बौल़ै राए कै जै तुऐं तैसी फौल़ौ खै खौऊंवा या छुआ बै, तौ तुऐं मौरे जांदै।

तैसी सांपै बैटमाणिशौ खै जबाब दिया, “ ऐजौ साचौ ना आथी! तुऐं ना मौरदै। पौरमेशवर जाणौए कै जैशैकैई तुऐं तैसी फौल़ौ खै खालै, तुऐं पौरमेशवर कै जैशणै हौए जांदै औरौ तैसी साए भले औरौ बुरे खै समझदै लागदै।”

तियौं बैटमाणिशै दैखौ कै सैजा फौल़ लूबाणौवाल़ा थिया औरौ दैखणौ स्वाद जाणियों थिया। सै बै समझदार बौणणौ चांव थै, इथकारिए तियें फौल़ तौड़ेबा खाए पौआ। तोबै तियें आपणै घौरवाल़ै खै जू तियौं कै साथै थिया सैजा फौल़ दिया औरौ तैणै बै खाए पौआ।

ऐकदम ही, तिनकी आखी खौलै गौई, औरौ तिनु पौता लागा कै सै नांगै औसौ। तिनुऐ पातौ कै ऐकसाथै जौड़ेयो तिथकै खौटणौ बाणैबा तिथलैई आपणै शरीरो खै खौटिणौ कै कौशिश कौरे।

तोबै मोरदै औरौ तैसकै घौरवाल़ीए तैसी बागौ दै घुमदै बैई पौरमेशवर कै धाव शौणै। सै दुईनै जौणै पौरमेशवर कैईदै चौरे गौऐ। तोबै पौरमेशवरे मोरदौ खै धाव दै, “तू कौकै औसौ?” आदमै जबाब दिया, “मौंऐ ताखै बागौ दा घुमदै बैई शुणा, औरौ हांव डोर गौआ थिया, जिथुकै हांव नांगी थिया। इथकारिए हांव चौरे गौआ।

तोबै पौरमेशवरे पुछु, “ताखै कौणै बौतौऊं कै तू नांगा औसौ? का तौऐं सैजा फौल़ खाए राए जिथु खाणौं कारिए मौंऐ ताखै मना कौरे राए थियु?” मोरदै जबाब दिया, “तुऐं जू ऐजै बैटमाणिश दैऐ राए इयें मौखै सैजा फौल़ दिया।” तोबै पौरमेशवरे बैटमाणिशौ कैईदु पुछु, “तौऐं ऐजौ का कौरौ? तियौं बैटमाणिशै बौल़ौ, “सांपै मौखै धौखा दैऐ राए।”

पौरमेशवरे सांपौ खै बौल़ौ, “तू शापित औसौ! तू आपणै पेटौ कै सारे हांडदा औरौ माट्टे चाटदा। तू औरौ ऐजै बैटमाणिश ऐकी दुजैयारी नफरत कौरदै, औरौ तैरै संतान औरौ याँरी संतान बै ऐकी दुजैयारी नफरत कौरदै। इयौं बैटमाणिशौ का वंशज तैरै मुंडौ खै पिचकला, औरौ तू तैसकी फाईनी खै डौसदा।”

तोबै पौरमेशवरे बैटमाणिशौ कै बौल़ौ, “हांव तैरै नानड़िया वाणौ की पीड़ौ कै बैजाए बौड़ाए दैन्दा। तू आपणै घौरवाल़ै कै चाएली, औरौ सै तांव पांदी राज कौरदा।”

पौरमेशवरे मौरदौ कै बौल़ौ, “ तौऐं आपणी घौरवाल़ी कौ शुणु औरौ मैरे आज्ञा ना मानी। इथकारिए जौमीन शापित हौए रौए, औरौ ताखै शाक पौयदा कौरणौ कारिए बैजाए मेहनत कै जौरूरत हौन्दै। ऐबै तू मौरे जाँदा, औरौ तेरा शरीर माट्टी मुंजी मेल़ जाँदा।” तैसी मौरदै आपणी घौरवाल़ी कौ नांव हव्वा राखौ, जिथका मतलब औसौ “जीवन दैणौ वाल़ै”, जिथुकै सै सौबी जाति कै माँ हौन्दै। औरौ पौरमेशवरे आदम औरौ हव्वा कै गौरु कै खौलड़ै शै बौणयोंदै खौटणौ बौम्बोऊंऐ।

तोबै पौरमेशवरे बौल़ौ, “ ऐबै भले औरौ बुरे खै जाणैबा आदमी आमु जैशणा हौए गौआ, इथकारिए तिनु तैसी जीवन कै डाल़ौ कै फौल़ कै नै खाणौ दैणा चैंई कै सै हौमेशा कारिए जियुंदी रौंव।” इथकारिए पौरमेशवरे आदम औरौ हव्वा कै तैसी बागौ पौरेशै बाएरे घाड़े दिऐ। औरौ पौरमेशवरे कौसी कै बै तैसी जीवन कै डाल़ौ कै फौल़ कै खाणौ शै रौकणौ कारिए तैसी बागौ कै आणौ वाल़ै द्वारौ पांदी शौकतीशाली स्वर्गदूतौ खै बौठाल़े दिऐ।