3. बाढ़

बौहुतै सौमय कै बाद, दुनिया दै बौहिते लौग रौंव थिऐ। सै बैजाए दुष्ट औरौ झौगड़ै कौरणौ वाल़ै हौए गौवे थिऐ। ऐजौ ऐतरौ बुरू थियुं कै पौरमेशवरे ऐकी बौड़ै बाढ़ लैई इयों पोरे दुनिया कै नाश कौरणौ का फौएसला कौरा।

पौरौ पौरमेशवर नूह शै खुश थिया। सै दुष्ट आदमी मुंजी रौणवाल़ा ऐक धरमै आदमै थिया। पौरमेशवरे नूह कैई बौल़ौ कै हांव ऐक बौड़ै बाढ़ खै लांदा। इथकारिए, तैणै नूह कै ऐक बौड़ै किश्ते बाणणौ कारिए बौल़ौ।

पौरमेशवरे नूह कै लमसम 140 मीटर लांबे, 23 मीटर चौड़े औरौ 13.5 मीटर ओन्चे किश्ते बाणणौ कारिए बौल़ौ। नूह कै तियौं किश्ती कै लाकड़ी लैई बाणणै थै औरौ तियौं तीन मंजिला, औरौ तिंदे तीन मैड़ बौरिशै कोमरे, ऐक छापर औरौ ऐक खेड़कै बाणणै थै। सैजै किश्ते नूह औरौ तैसकै कुड़बै, औरौ धोरती कै सौबी भान्त कै जानवरो कै तियौं बाढ़ शै बौचाऐबा राखदै।

नूहे पौरमेशवर कै बात माने। तैणै औरौ तैसकै बैटे तैशणै किशते बाणै जैशणै पौरमेशवरे बौताए राए थै। जिथुकै सैजै किश्ते बैजाए बौड़ै थै इथकारिए तियौं बाणणौ कारिए कैईयो सालो लागी। नूहे लौगौ खै आणौवाल़ै बाढ़ कै बारै मुंजी चेतावणै दै औरौ तिनुकै पौरमेशवरौ कै ढौबौ आणौ कारिए बौल़ौ, पौरौ तिनुऐ तैसपांदी विशवाश ना कौरी।

पौरमेशवरे नूह औरौ तैसकै कुड़बे कै आपी कारिए औरौ गौरू कारिए खाणौं कै कौठौ कौरणौ का आदेश बै दिया। जोबै सोबै ठुँ तैयार थियुं, तौबै पौरमेशवरे नूह कै बौल़ौ कै ऐजा तैसकै, औरौ तैसकी घौरवाल़ी कै, तैसकै ती बैटै कै, औरौ तिनकी घौरवाल़ी कै – कुल मिलायो आठी जौणै कै किश्ती दा जाणौ का सौमय थिया।

पौरमेशवरे सौबी जानवर औरौ चुड़कुल़े कै नर औरौ मादा कै नूह कै धौरे छाड़े ताकि सै किश्ती दै जाए सौकौ औरौ बाढ़ शै बौचयो रौए सौकौ। पौरमेशवरे ऐशणै सान्त-भान्त कै जानवरो कै सात नर औरौ मादाओ कै छाड़ै जिनुकै बलि चौड़ाणौ कारिए इस्तेमाल कौरे सौकौ। जोबै सै सोबै जौणै किश्ती पांदी हौटे गौऐ, तौ आपी पौरमेशवरे किश्ती कौ द्वार बौन्द कौरे दियुं।

तोबै बौरखा हौणै शुरु हौऐ गौऐ, औरौ बौरखा लागै, औरौ लागदुई रौए। बिना रुके चालीश दुस औरौ चालीश राते तौड़ी बौरखा लागदु रौऐ। पूरे दुनिया की सोबै चीज़ौ, इथै तौड़ी कै ऊंची-ऊंची धौरौ बै पाणी मुंजी डोबै गौई।

शौकै जौमीनौ पांदी रौणौ वाल़ी सोबै चीज़ौ मौरे गौई, तिनु लौगौ औरौ जानवरो कै छौड़ेबा जू किश्ती दै थिऐ। सैजै किश्ते पाणी पांदी बोंदी रौऐ औरौ किश्ती कै भीतरे की सोबै चीज़ौ कै डूबणौ शै बौचाऐबा राखी।

बौरखा रूकणौ कै बाद, पांची मीने तौड़ी सैजै किश्ते पाणी पांदी बोंदी रौऐ, औरौ तैसी सौमय दौ पाणी कम हौन्दौ लागै रौ थियु। तोबै ऐक दुस सैजै किश्ते ऐकी धारौ कै चुटी पांदी जाऐबा रौके गौऐ। पौरौ दुनिया इबी बै पाणी दी डोबै रौए थै। ती महीने कै बाद धारो की चुटी देखिंदी लागी।

तोबै हौजौ चालीश दुसौ कै बाद, नूहे ऐकी कौऊवे खै ऐजौ दैखणौ कारिए भाएरे छाड़ा कै पाणी शौके गौ। सैजा कौऊवा शुकी जौमीनौ कै जौंदा उंडा-पुंडा उड़ाँदा रौआ, पौरौ तैसी ऐशणा कुणजाई ठांव ना भैटी।

तोबै बाद मे नूहे ऐक कबूतरी कै बाएरे छाड़ै। पौरौ तियौंकै बै कुणजै शौके जौमीन ना भैटी, इथकारिए सै नूह कै धौरे पाछु आए गौए, ऐक हफते कै बाद तैणै तियौं कबूतरी कै ओटेयो कै छाड़ै, औरौ सै आपणै चोंच दै ऐक जैतून कै डाल़े लियाऐबा पाछु आए। पाणी घौटे रौ थियु, औरौ पौधे बै ओटेयो जामदै लाग रौवे थिऐ।

नूहे ऐक हप्ते हौजौ ठौल़नाए कौरे औरौ तीजल़ियो तियौं कबूतरी खै बाएरे छाड़ै। इयौं बैई, तियौंकै रौणौ कारिए ठांव भैटे गौआ औरौ सै पाछु ना ऐई। जिथुकै पाणी शौके रौ थियु।

दु मीने कै बाद पौरमेशवरे नूह कै बौल़ौ, “ऐबै तू औरौ तैरा कुड़बा औरौ सोबै जानवर किश्ती पौरेशै बाएरे आए जांव। औरौ बौरिशै नानड़िया औरौ पोते-परपोते पौएदा कौरौ औरौ धौरती कै भौरे दैंव।” औरौ नूह औरौ तैसका कुड़बा किश्ती पौरेशा बाएरे आए गौआ।

नूह कै, किश्ती पौरेशौ बाएरे आणौ कै बाद, तैणै बेदे बाणै औरौ बल़ि कारिए इस्तेमाल हौणौ वाल़ै सौबी बान्त कै जानवरो मुंजी दै किछेक कै बल़ि चौढ़ाए। औरौ पौरमेशवर तियौं बल़ि शै खुशी हौआ औरौ नूह औरौ तैसकै कुड़बै कै आशीर्वाद दिया।

पौरमेशवरे बौल़ौ, हांव वादा कौरु कै आदमी कै द्वारा हौणौ वाल़ै बुरे कामौ की बौजेह शै हांव हौजौ कौलौंई धोरती कै शराप ना दैन्दा औरौ बाढ़ लैई दुनिया कै नाश ना कौरदा जिथुकै आदमै तौ पौयदा हौंदै दौऊंबा पापी औसौ।

तोबै पौरमेशवरे आपणै वाचा कै निशान कै तौर पांदी आगल़े इन्दाधनुष बाणै। जोबै कौलोंई बै गौयणै दै इन्दाधनुष दैखियो, तौ पौरमेशवर याद कौरदा कै तैणै का वादा कौरे राए औरौ तैशैकैई तैसकै लौग बै याद कौरदै।