4. अब्राहमवारी पोरमेशवर कै कोरार

औरौ तौबै बाढ़ौ कै कैई सालो कै बाद, दुनिया दै बौरिशै लौग रौया कौरौ थिऐ, औरौ तिनुऐ हौटेयो पौरमेशवरौ कै औरौ ऐकी दुजै कै खिलाफ पाप कौरे। जिथुकै सै ऐकैई भाषा बौल़ौ दिऐ, इथकारिए सै ऐकसाथै कौठे हौवे औरौ दुनिया दै फोएले जाणौ कै पौरमेशवर कै ऐसी आदैश कै बजाए ऐकी नगर कै बाणा।

सै बैजाए घमंडी थिए, औरौ तिनुकै कैशणा जीवन जीणा चैंई इथकै बारै मुंजी सै पौरमेशवर कै आदेश का पालन कौरणा नै चांव थिऐ। इथै तौड़ी कै तिनुऐ ऐक ऐशणै मीनार कै बाणणै शुरू कौरे जू स्वर्ग तौड़ी पौऐचले। पौरमेशवरे दैखौ कै जै सै ऐकसाथै भैटेबा बुराए कौरदै रौले, तौ सै बौरिशै पाप वाल़ै काम कौरे सौकौ।

इथकारिए पौरमेशवरे तिनकी भाषा खै बौरिशी जौई-जौई भाषाऔ दी बौदले दी औरौ तिनु लौगौ खै पूरै दुनिया दै फौएलाए दिऐ। जिथु नगर कै तिनुऐ बाणणौ शुरू कौरे राए थियुं तिथको नावं बाबेल पोड़ो, जिथका मतलब औसौ “गड़बड़ी”।

कैई सालो कै बाद, पौरमेशवरे अब्राम नांव कै ऐकी आदमीयारी बात कौरे। पौरमेशवरे तैसीखै बौल़ौ, “आपणै देश औरौ परिवार कै छौड़ेबा तैसी देशो कै जा जू हांव ताखै दैखौऊंबा। हांव ताखै आशीष दियुंबा औरौ तांव पौरेशै ऐक बौड़ै जाति बाणुबा। हांव तैरौ नांव महान कौरदा। जू ताखै आशीष दैला तैसी हांव बै आशीष दैन्दा, औरौ जू ताखै शराप दैला तैसी हांव बै शराप दैन्दा। तैरी बौजेह शै सारी दुनिया कै लौग आशीष पान्दै।

औरौ अब्रामे पौरमेशवरौ कै बात मानै। तैणै आपणै सोबै सेवको औरौ आपणै सौबै धन-दौलत आपणै घौरवाल़ै सारा खै नियौं औरौ तैसी देशौ खै, यानि कनान देश कै चाल पौड़ा जू पौरमेशवरे तैसी दिखाए राए थियु।

जोबै अब्राम कनान दैश दा पौंऊचा तौ पौरमेशवरे तैसी खै बौल़ौ, “आपणै चौऊ ढौबौ कै दैख। हांव ताखै ऐजौ पुरू देश दैन्दा औरौ तैरै पीढ़ी सदा कारिए इथपांदी औधिकार राखदै।” तोबै अब्राम तैसी देशौ दा बौस गौआ।

मलिकिसिदक नांव का ऐक मौरद थिया जू सौबीदा बौड़ा पौरमेशवर का पुरोहित थिया। ऐक दुस जोबै अब्राम युध्द कौरेबा पाछु आन्दा लाग रौआ थिया तौ सै औरौ अब्राम भेटिए। मलिकिसिदके अब्रामो खै आशीष दै औरौ बौल़ौ, परम पौरमेशवर जू स्वर्ग औरौ धौरती का मालिक औसौ सै ताखै आशीष दैंव।” तोबै अब्रामे युध्द मुंजी जेतेयोंदी सोबै चीज़ौ का देशवां हिस्सा मलिकिसिदक कै दिया।

कैई सालो बेत गौई, पौरौ इबी तौड़ी बै अब्राम औरौ सारा कै कुणजाई बैटा नै थी। पौरमेशवरे अब्राम शै बात कौरे औरौ औटेयो वादा कौरा कै तैसकै ऐक बैटा पौएदा हौन्दा औरौ जैशैकै गौयणै दै तारे औसौ तैशैकैई तैसकै बै बौरिशै वंशज हौन्दै। अब्रामे पौरमेशवर कै वादै पांदी बिशवाश कौरा। पौरमेशवरे साबित कौरौ कै अब्राम ऐक धरमै आदमी थिया जिथुकै तैणै पौरमेशवर कै वादै पांदी बिशवाश कौरे राए थिया।

तोबै पौरमेशवरे अब्रामोआरी ऐक कौरार कौरा। आम तोरिके शै, ऐक कौरार दो गुट कै बीज मुंजी ऐकी दुजैआरी काम कौरणौ का ऐक समझौता हौंव। पौरमेशवरे अब्रामोआरी सैजा वादा तौलौ कौरे राए थिया जौलौ अब्राम सौत रौआ थिया, पौरौ सै तौलौ बै पौरमेशवरौ कै शौणै सौकौ थिया। पौरमेशवरे बौल़ौ, “हांव तैरै शरीर शै पौएदा कौरेबा ताखै ऐक बैटा दैन्दा जू तांव पौरेशा यानि तैरै घौरवाल़ी सारा शै पौएदा होला। हांव तैरै वंश कै ऐजा कनान देश दियुंबा।” पौरौ इबी बै अब्रामवागै कुणजाई बैटा नै थी।