5. वादै का बैटा

अब्राम औरौ सारै कै कनान दैश पौऊंचणौ कै दस सालौ कै बाद, इबी तौड़ी बै तिनकै कुणजै ओलाद नै थी। इथकारिए अब्रामो कै घौरवाल़ी साराए तैसीकै बौल़ौ, “जिथुकै पौरमेशवरे इबी तौड़ी मोखै ओलाद पौयदा कौरणौ कारिए काबिल ना बाणै रैई औरौ ऐबै हांव ओलाद पोयदा कौरणौ कारिए बैजाए बोढ़ी औसौ, दैख, मैरै दासी हाजिरा इथै औसौ। तिंयाआरी जाजड़ा बाणै पा कै सै मौ कारिए ऐक ओलाद पोयदा कौरे सौकौ।

औरौ अब्रामे हाजिराआरी जाजड़ा बाणै पौआ। हाजिरा कै ऐक बैटा पोयदा हौआ, औरौ अब्रामे तैसकौ नांव इश्माएल राखौ। पौरौ सारा हाजिरा शै जौल़दै लागै। जोबै इश्माएल तेरो सालो का थिया, पौरमेशवरे ओटेयो अब्रामवारी बात कौरे।

पौरमेशवरे बौल़ौ, “हांव सौबीदा बौड़ा-शोकतीशाली पौरमेशवर औसौ। हांव तांवआरी ऐक कौरार कौरूबा।” तोबै अब्रामै जौमीनो पांदी रैड़ेबा ढाल कौरे। पौरमेशवरे अब्रामौ खै ऐजौ बै बौल़ौ, “तू बौरिशी जाति का बापू हौंदा। हांव ताखै औरौ तेरै पीढ़ी खै तिनकै आपणी जौमीन हौणौ कारिए कनान देश दैंदा औरौ हांव सदा कारिए तिनका पौरमेशवर हौंदा। तू आपणै सौबी कुड़बै कै मौरदो का खतना कौरा।

“तेरै घौरवाल़ै सारै ऐक बैटा पोयदा कौरले – सै वादै का बैटा हौंदा। तैसकौ नांव इसहाक राखैया। हांव तैसकै साथै आपणै कौरार बाणैबा राखदा औरौ सै ऐक बौड़ै जाति बौण जांदा। हांव इश्माएल कै बै ऐक बौड़ै जाति बाणदा, पौरौ मेरा कौरार इसहाकवारी रौंदा।” तोबै पौरमेशवरै अब्रामो कौ नांव बौदलेबा अब्राहम राख दियु, जिथका मतलब औसौ “बोहिते का बापू ”। पौरमेशवरै सारै का नांव बौदलेबा सारा राख दियु, जिथका मतलब औसौ “मूलमाता”।

तैसी दुसै अब्राहमै आपणै कुड़बै कै सौबी मौरदो का खतना कौरा। लमसम ऐकी सालो कै बाद, जोबै अब्राहम 100 सालौ कै उम्रो का थिया औरौ सारा 90 सालो कै थै, तोबै साराए अब्राहम कै बैटे खै जन्म दिया। जैशैकै पौरमेशवरै तिनुकै बौल़ै राए थियु तिनुऐ तैसकौ नांव इसहाक राखौ।

जोबै इसहाक जवान हौआ तौ पौरमेशवरै ऐजौ बौल़ेबा अब्राहम कै बिशवाश कै परीक्षा कौरे, “आपणै ऐकलौते बैटे कै नियो, औरौ तैसी मौ कारिए बल़ि कै रूप दा मारे दै।” ओटेयो अब्राहमै पौरमेशवरौ कै बात मानी औरौ आपणै बैटे कै बल़ि कौरणौ कारिए तैयार कौरा।

जोबै अब्राहम औरौ इसहाक बल़ि चौढ़ाणौ कै ठांव कै ढौबौ जांदै लागै, तौ इसहाकै पूछु, “औए रे बापू, आमु कैंई बल़ि कौरणौ कारिए लाकड़ी तौ औसौए, पौरौ बल़ि कौरणौ कै गाबटु कौकै औसौ?” अब्राहमै जबाब दिया, औए रे बैटा, पौरमेशवर बल़ि कौरणौ कारिए गाबटु का इंतजाम आपी कौरदा।

जोबै सै बल़ि चौढ़ाणौ कै ठांव दै पौंइचे गौऐ, तौ अब्राहमै इसहाक कै बानैबा बैदी पांदी लिटाए दिया। सै आपणै बैटे कै मारणौवाल़ा ही थिया कै पौरमेशवरै बौल़ौ, “रौक जा! भैईया कै नुकसान नै पौंईचा! ऐबै हांव जाणै गौआ कै तू मैरा डौर माने जिथुकै तौंऐ आपणै ऐकलौते बैटे कै बै मौ कैईदा बौचाएबा ना राखी।”

नैड़िक ही अब्राहमै ऐक मेढ़े कै दैखौ जू झाड़ी मुंजी फौश रौ थियु। इसहाक कै बौदले बल़ि कौरणौ कारिए पौरमेशवरै मेढ़े का पौरबंद कौरा। अब्राहमै खुशी-खुशी मेढ़े कै बल़ि चौढ़ाए दै।

तोबै पौरमेशवरै अब्राहमौ खै बौल़ौ, “जिथुकै तू मौ कारिए सोबै ठुं दैणौ कारिए तैयार थिया, इथैतौड़ी कै आपणै ऐकलौते बैटे कै बै, इथकारिए हांव ताखै आशीष दैणौ का वादा कौरू। तेरै वंशज गौयणै कै तारै शै बै जादा हौंदे। जिथुकै तौंऐ मैरै आज्ञा खै माने राए इथकारिए हांव तैरै कुड़बै लैईं दुनिया कै सौबी पीढ़ी कै आशीष दैंदा।”