6. पौरमेशवर इसहाक कारिए इंतजाम कौरौ

जोबै अब्राहम बौहिता बूढ़ा हौए गौआ थिया तोबै तैसका बैटा, इसहाक, ऐकी मौरदौ कै उमरौ का हौऐ गौआ थिया। इथकारिए अब्राहमै आपणै ऐक सेवक कै आपणै बैटे इसहाक कारिए तैसी देशौ पौरेशै ऐक घौरवाल़ै लाणौ कारिए छाड़ा जिथै तैसकै रिशतैदार रौंव थिऐ।

जिथै अब्राहम कै रिशतैदार रौंव थिऐ तैसी देशौ कै जाणौ कै ऐक बैजाए लांबै यात्रा कै बाद पौरमेशवरै तैसी सेवक कै जाण-पौछेयाण रिबका आरी कौराए। सै अब्राहम कै भाईड़ी कै पोतै थै।

रिबका आपणै कुड़बै कै छौड़ेबा तैसी सेवक कै साथै पाछु जाणौ कारिए मान गौऐ। जैशैकैई सै पौऊंचै इसहाकै तियांरी जाजड़ा बाणा।

ऐकी लांबै सौमय कै बाद, अब्राहम मौरे गौआ। तोबै पौरमेशवरै अब्राहम कै बैटे इसहाक कै, अब्राहमौ कै साथै कौरयोंदै कौरार की बौजेह शै आशीष दै। तियों कौरारौ दा पौरमेशवरौ का ऐक वादा थिया कै अब्राहमौ कै औणगिणित वंशज हौंदे। पौरौ इसहाक कै घौरवाल़ै रिबका कै ओलाद पौयदा ना हौई।

इसहाकै रिबका कै प्रार्थना कौरे, औरौ पौरमेशवरै तियौं खै जुड़वाँ नानड़िया कै आशीष दै। जौलौ सैजै नानड़िया रिबका कै पेटोऊदैई थिऐ सै आपी मुंजी झौगंड़िदै लागै, इथकारिए जू किछै हौंदौ लागै रौ थियु रिबकाए सैजौ पौरमेशवरावागै बौताए दियु।

पौरमेशवरै रिबका कै बौल़ौ, “तू दु बैटे कै जन्म दैंदे। तिनकै वंशज दो जौई-जौई जाति बौणदी। सै ऐकी दुजैयारी लौड़दै। पौरौ बौड़ै बैटे शै पोयदा हौणौवाल़ौ जाति कै नानड़ै बैटे शै आणौवाल़ै जाति कै आज्ञा मानणै पौड़दै।

जोबै रिबका कै नानड़िया पौयदा हौवे, तौ बौड़ा बैटा लाल औरौ रोएँदार थिया, औरौ तिनुऐ तैसकौ नांव एसाव राखौ। तोबै नानड़ा एसाव कै डैमणै पाकड़ेबा पौयदा हौआ, औरौ तिनुऐ तैसकौ नांव याकूब राखौ।