33. ऐकी किसानौ कै काहाणै

ऐक दुस, यीशु झील कै किनारे कै नैड़िक थिया। तैणै लौगौ कै ऐक बैजाए बौड़े भीड़ कै शिक्षा दैऐ लौए थै। तैसी शुणणौ कारिए इशैक सारे लौग औवे कै यीशु कै धौरे तिनु सौबीयारी बातौ कौरणौ कारिए ठांव ना बौची। इथकारिए सै पाणी मुंजी खौल़ेयौंदे किश्ती पांदी होटा। तिथै सै बौठे गौआ औरौ लोगौ कै शिक्षा दै।

यीशुऐ तिनुकै ऐजै काहाणै शुणाऐ, “ऐक किसान बीज बौन्दा बायरै निकल़ा। जोबै तैणै हाथौ लैई बीज छिड़कै लौवे थिऐ तौ किछै बीज़ बाटौ पुंडै छुटै। पौरौ चुड़कुल़ै आऐबा तिनु बीज़ौ कै खाए दिऐ।”

“औके बीज़ शोकरेड़े जौमीनौ पांदी छुटे जिथै बैजाए कम माट्टै थै। शौकरेड़े जौमीनौ पांदी छौटेयौंदे बीज़ बैजाए तावल़े जामै गौवे, पौरौ तिनकी जौड़ी जौमीनौ दी ना हुटी। जोबै सूरज निकल़ा औरौ गोरमी लागै तौ सैजै पौधे शौकै गौवे औरौ मौरे गौवे।”

“तोबै औके बीज़ झाड़ी मुंजी छुटै। तिनु बीज़ौ दै तुणै फाटै, पौरौ कान्डैऐ तिनुकै दौबाए दिऐ। इथकारिए कान्डेयाल़े जौमीनौ दै छुटैयौंदे बीज़ौ मुंजीदै निकल़ेयौंदे पौधे मुंजी दै कौसीए बै नाज़ ना पौयदा कोरी।”

“औकै बीज़ कामकै जौमीनौ दै छुटै। सैजै बीज़ बौड़े हौऐ औरौ जिशैक बीज़ बौए राए थिऐ तिनु पौरेशौ 30, 60, औरौ इथै तौड़ी कै 100 गुणा नाज़ हौ। जू कुणिए बै पौरमेशवर कै पौछौड़ियौ हांडणौ चांव, सै तियौं बातौ पांदी ध्यान दैंव जू मौंऐ बौल़े लौई!”

इयौं काहाणै शौणैबा चैलै औनाल़े गौवे। इथकारिए यीशुऐ इथका मतलब बौतौऊंवा, “सेजै बीज़ पौरमेशवर का बचन औसौ। सैजै बाट ऐक ऐशणा आदमै औसौ जू पौरमेशवर कै बचन कै शुणौ, पौरौ तिनु सौमझौ ना। तोबै शैतान तैसकै मनौ पौरेशा बचन कै चुराऐबा लौए जांव। यानी शैतान तैसी कै बचन कै सौमझौणौ शै दूर राखौ।”

“सैजै शौकरेड़े जौमीन ऐशणा आदमै औसौ जू पौरमेशवर कै बचन कै शुणौ औरौ खुशी शै तैसी ओपनांए दैंव। पौरौ जोबै चैईथा सौमय आंव, औरौ जोबै औकै लौग तैसीकै सौतांवऐ, तौ सै पौरमेशवरौ कैंईदा दूर हौए जांव। यानी सै पौरमेशवर पांदी भौरोशा कौरणा बै छौड़े दैंव।”

“सैजै कांडैयाल़ै जौमीन ऐशणा आदमी औसौ जू पौरमेशवर कै बचन कै शुणौ। पौरौ सै बौरिशी बातौ कै बारै मुंजी फिकर कौरणै शुरू कौरे दैंव, औरौ सै बौरिशै पौयसै कौमाणौ कै कौशिच कौरौ, औरौ सै बौरिशी चीजौ कै पाणौ कै कौशिच कौरौ। किछै दुसौ कै बाद, ऐबै सै पौरमेशवर कै प्यार कै लायक ना आथी। इथकारिए जू तैणै पौरमेशवर कै बचन शै शैखै राए थियु सै तैसीकै पौरमेशवर कै खुश कौरणौ कै लायक ना बौणणौ दैंव। सै गियुँ कै नोल़ौऊं कै जैशणै औसौ जू कुणजुई नाज़ पौयदा ना कौरे सौकौ।”

“पौरौ आछी जौमीन सैजा आदमै औसौ जू पौरमेशवर कै बचन कै शुणौ, औरौ तैसपांदी बिशवाश कौरौ, औरौ फोल़ लांव।