34. यीशु औकी काहाणी कै शिक्षा दैंव

यीशुऐ पौरमेशवर कै राज्य कै बारै मुंजी ऊकी भोरिशी काहाणी शुणैई। उदारण कारिए, तैणै बौल़ौ पौरमेशवर का राज्य ऐकी राई कै बीज़ौ कै जैशणा औसौ जिथुकै कौसी आदमीऐ आपणै खैतौ दौ बोए दियु। तुऐं जाणौऐ कै राई कौ बीज़ सौबी बीज़ौ मुंजीदौ सौबीदौ नानड़ौ हौंव।”

“पौरौ जोबै राई का दाणा बौढ़े जांव तौ सै बागौ कै सौबी डाल़ौ मुंजीदा सौबीदा बौड़ा हौए जांव, इशैक बौड़ा कै चुड़कुल़ै आऐबा तिथकी डाल़ी पांदी बिशांव कौरौ।”

यीशुऐ ऐक औके काहाणै शुणाऐ, “पौरमेशवरौ का राज्य खमीर कै जैशणा औसौ जिथु लौऐबा ऐकी बैटमाणिशै पराते दौ आटे कै ढिंडे मुंजी बाटे दैंव तोबै सैजौ सोबै आटो ढिंडवारी रौल़ जांव।”

“स्वर्ग का राज्य तैसी खौजानै कै जैशणा औसौ जैसी कुणिए कौसी कै बागड़ी दा चोरे दिया। कौसी औकी आदमी कै सैजा खौजाना भैटे गौआ औरौ तैणै तिथु पाणौ कै बैजाए चाह कौरे। इथकारिए तैणै तिथु औटेयो दौबाए दियु। औरौ सै खुशी कै मारे इशैक भौरे गौआ कै तैणै जाऐबा आपणौ सोबै ठुँ बिकै दियु ताकि सै तियौं बागड़ी कै मौले लौए सौकौ जिथै सैजा खौजाना थिया।”

“स्वर्ग का राज्य ऐक बैजाऐ मौंगै शुध्द मोती कै जैशणा बै औसौ। जोबै कौसी मोती कै बिकणौवाल़ै कै सै भैटी जांव तौ सै तिथु मोलै लौणौ कारिए आपणौ सोबै ठुँ बिकै दैंव।”

तिथै कुणिए लौग ऐशणै थिऐ जू सुंचौ थिऐ कै पौरमेशवर तिनुकै इथकारिए औपनांदा जिथुकै तिनुऐ भोलैई कै काम कौरे लौवे। ऐजै लौग ऐशणै लोगौ कै बैकार मानौ थिऐ जू इनु भोलैई कै कामौ कै नै कौरौ थिऐ। इथकारिए यीशुऐ तिनुकै ऐजै काहाणै बौताए: “दो मौरद थिऐ औरौ दुईनैई प्रार्थना कौरणौ कारिए मंदिरौ दै हौटे। तिनु मुंजीदा ऐक मामल़ा लौणौवाल़ा थिया, औरौ औका ऐक धरम का अगुवा थिया।”

“तैसी धरमी अगुवे ऐशैखै प्रार्थना कौरे, ‘ओए रै पौरमेशवर, तैरा धन्यवाद हौंव कै हांव औकी लोगौ कै जैशणा ना आथी – जैशैकै डाकू, न्याय ना कौरणौ वाल़ा आदमै, गौलत सौमबंध बाणाणौवाल़ा, औरौ इथै तौड़ी कै इथै आयोंदै ऐसी मामला लौणौ वाल़ै कै जैशणा ऐक पापे ना आथी।’”

“उदारण कारिए, हांव हप्ते दा दो बैई उपवास राखु, औरौ हांव आपणै कौमायोंदै पोएसै औरौ समानौ का देशवाँ हिस्सा ताखै दियु।”

“पौरौ सैजा मामला लौणौ वाल़ा तैसी धरम कै अगुवे कैंईदा बैजाए दूर खौड़ा हौए गौआ। तैणै उबै स्वर्ग कै ढौबौ बै दैखी ना। इथकै जौगेह, तैणै आपणै मुठकुरै लैई आपणै छाते पीटे औरौ प्रार्थना कौरे, ‘ओए रै पौरमेशवर, ढाल ऐ ताखै मौं पांदी दया कौर जिथुकै हांव ऐक पापी औसौ।’”

तोबै यीशुऐ बौल़ौ, “हांव तुऔं कैई साचु बुलू, पौरमेशवरै तैसी मामला लौणौ वाल़ै कै प्रार्थना शौणै औरौ तैसी धरमै साबित कौरा। पौरौ तैणै तैसी धरम कै अगुवे कै प्रार्थना कै पसंद ना कौरी। जिथुकै पौरमेशवर सौबी घमंड़ी कौ मुंड उदू कौरदा, पौरौ सै तिनु सौबी कै इज्जत दैंदा जू आपी कै नम्र कौरौ।”