35. दयालू बापू कै काहाणै

ऐक दुस, यीशुए तिनु बौरिशै लोगौ कै शिक्षा दैए लौए थै जू तैसकी शुणणौ कारिए कौठे हौए रौवे थिऐ। ऐजै लौग मामला लौणौ वाल़ै औरौ साथआरी औकै लौग बै थिऐ जिनुऐ मूसा कै कानून का ठीक शै पालन ना कौरे रैई थी।

किछै धरम कै अगुवे दैखौ कै यीशुऐ इनु लौगवारी ऐकी दौस्तौ कै जैशणी बातौ कौरे लौई। इथकारिए तिनुऐ ऐकी-दुजीया ऐजी बातौ कौरी कै तैणै गौल़त लौ सांडे। यीशुऐ तिनुकै बातो कौरदिऐ बैई शुणै, इथकारिए तैणै तिनुकै ऐजै काहाणै शुणाए।

“ऐक आदमै थिया जैसकै दौ बैटे थिऐ। नानड़ै बैटे आपणै बापू कै बौल़ौ, ‘औए रै बापू, मैरे इबी आपणा हिस्सा चैई!’ औरौ बापूऐ आपणै दु बैटे कै आपणै जायदात मुंजीदा हिस्सा दैय दिया।”

“तावल़ाई सैजा नानड़ा बैटा आपणौ सोबै ठुँ कौठौ कौरेबा दूर दैशौ कै हौटे गौआ औरौ पाप दै जिन्दगै जीणौ कारिए आपणै सोबै पौएसै बरबाद कौरे दिऐ।

“इथकै बाद, जिथै नानड़ा बैटा थिया तैसी देशौ दा ऐक खतरनाक काल़ पौड़ा, औरौ तैसकैई ऐबै खाणौं मोल़े लौणौ कारिए पौएसै बै थी नी। इथकारिए तैसीकै जू काम भैटे रौआ थिया सै सुंगरौ कै चौराणौ का थिया। सै इशैक दुखी औरौ भूखै रौआ थिया कै सै ऐबै सुंगरौ कौ खाणौं खाणौ चांव थिया।”

“आखिकार, तैसी नानड़ै बैटे कै मनबातौ लागी कै, ‘मौंऐ का कौरे लौ? मैरै बापू कै सौबी नौकरौ कैई खाणौं कारिए बौरिशौ खाणौ औसौ, तोबै बै हांव इथै भूखा मौरदा लाग रौआ। हांव आपणै बापू कै धौरे पाछु जांदा औरौ आपणै बापू का ऐक नौकर बौणणौ कारिए तैसकैंई दै बेनते कौरूबा।’”

“औरौ तैणै नानड़ै बैटे पाछु आपणै बापू कै घौरौ कै ढौबौ जाणौ शुरू कौरौ। जौबै कै सै इबी दूर ही थिया, तैसकै बापूऐ तैसीकै दैखा औरौ तैसपांदी गिणौऊंआ। सै दौड़ेबा आपणै बैटे कै धौरे हौटा औरौ तैसीकै हौंगटै लाऐबा खौपटियौऊंआ।”

“तैसी बैटे बौल़ौ, ‘ओए रै बापू, मौंऐ पौरमेशवरौ कै औरौ तेरै खिलाफ पाप कौरे राए। हांव तैरा बैटा बौल़णौ कै लायक बै रौऐ ना रैई।

“पौरौ बापूऐ आपणै ऐकी नौकरौ कै बौल़ौ, ‘तावल़ै जाऐबा सौबीदै कामकै खौटणौ लियांव औरौ मैरै बैटे कै बौम्बांव! तैसकै गुठी दी कांगणी औरौ तैसकै लातौ दै जूतै लांव। तौबै सौबीदा कामका बाकरा काटौ ताकि आमै कामकै खाए औरौ जोशन मौनाए सौकु, जिथुकै मैरा बैटा मौरे गौआ थिया, पौरौ ऐबै सै जियुंदी औसौ! सै हाँईचै रौआ थिया, पौरौ ऐबै सै मौखै भैटे गौआ!’”

“इथकारिए लोगै जोशन मौनाणा शुरू कौरा। किछै सोमय कै बाद, बौड़ा बैटा खेतौ कै काम चुकौयो घौरौ कै औऊंवा। तैणै नाचणा गाना शुणा औरौ हैरान हौआ कै ऐजौ का हौंदौ लागै रौ।”

“जोबै बौड़े बैटे कै पौता लागा कै तिनुऐ इथकारिए जोशन मौनाए लौआ जिथुकै तैसका भाए घौरौ कै आए रौआ थिया, तौ सै बैजाए गुस्सै हौआ औरौ घौरौ कै ना हुटी। तैसकै बापूऐ बायरै आऐबा तैसीयादै आपीयारी जोशन मौनाणौ कै बेनते कौरे, पौरौ तैणै मौना कौरे दियु।”

“तैसी बौड़े बैटे आपणै बापू कै बौल़ौ, ‘ऐतरे सालौ दौऊंडै मौऐं इमानदारी शै तैरे टौल सांडै! कौलौंई बै तैरे बात ना टाल़ी, पौरौ तौंऐ कौलौंई बै मौखै ऐक नानड़ा शा बाकरा बै दी ना ताकि हांव आपणै दौस्तौवारी बोईदुत मौनाए सौकु। पौरौ तैरै ऐसी बैटे तैरे सोबै पौयसै पाप कै कामौ दै बरबाद कौरे दिऐ। औरौ ऐबै जोबै सै आए रौआ तौ तैसी कारिए जोशन मौनाणौ कै तौंऐ कामका बकरा काटा!’”

“बापूऐ जबाब दिया, ‘ ओए रै मैरे बैटे, तू सदा मैरे साथै औसौ सैजौ सोबै ठुँ तैरौ औसौ। पौरौ आमु कारिए जोशन मौनाणा ठीक औसौ, जिथुकै तैरा भाए मौरे गौआ थिया, पौरौ ऐबै सै जियुंदी हौए गौआ। सै हाँईचै रौआ थिया, पौरौ ऐबै आमु कै सै भैटे गौआ!’”