36. यीशु कै रुपो दा बोदलाव

ऐक दुस, यीशुऐ आपणै तीन चैलै, पतरस, याकूब, औरौ यूहन्ना कै आपणै साथै निऐ। (ऐजा यूहन्ना नांव का चैला सैजा आदमै ना आथी जैणै यीशु कै बपतिस्मा दैऐ राए थिया।) सै प्रार्थना कौरणौ कारिए ऐकी ऊंचै धारौ पांदी हौटे।

जोबै यीशुऐ प्रार्थना कौरे लौऐ थै तौ तैसकौ मुंह सुरज कै जैशणौ चोमकै गौ। तैसकै खौटणौ पैयाशै कै जैशणै चिटे हौए गौवे, जैशणै चिटे धौरती पांदी कुणिए कौरे सौकौ तिदंदै बै जादा चिटे।

तोबै मूसा औरौ एलिय्याह पौरमेशवर की बातौ बौताणौ वाल़ै दैखिये। ऐजै मौरद ऐसी सौमय दौऊंड़ै सैकड़ौ साल आगै रौया कौरौ थिऐ। तिनुऐ यीशु वारी तैसकै मौत कै बारै मुंजी बातौ कौरी, जिथुकै सै तावल़ाई यरूशलेम दा मौरे जांदा।

जोबै मूसाऐ औरौ एलिय्याहै यीशु आरी बातौ कौरे लौई थी तोबै पतरसै यीशु कै बौल़ौ, “अमारौ इथै रौणौ आछौ औसौ। आमै तीन तोम्बू बौणौऊंबै, ऐक तांव कारिए, ऐक मूसा कारिए, औरौ ऐक एलिय्याह कारिए।” पौरौ पतरस नै जाणौ थिया कै तैणै का बौल़े लौ।

जोबै पतरसै बात कौरे लौए थै, तौ ऐक चोमकैयोंदौ बादल़ धैनै आऐबा तिनपांदी आए गौ। तोबै तिनुऐ बादल़ौ पौरेशै ऐक धांव दैंदिये बैई शौणै। तैणै बौल़ौ, “ ऐजा मैरा बैटा औसौ जैसियारी हांव प्यार कौरूं। हांव ऐसी शै खुशी औसौ। ऐसकी शुणौ।” सैजै तीने चैलै डौरे गौवे औरौ जौमीनौ पांदी रिड़े गौवे।

तोबै यीशुऐ तिनुकै छुऐ औरौ बौल़ौ, “डौरेया नै। ऊबै बिज़ौ।” जोबै तिनुऐ चौऊ ढौबौ कै दैखौ, तौ तिथै औकै कुणिऐ नै थी सिवाए यीशु कै।

यीशु औरौ सैजै तीन चैलै तियौं धारौ पौरेशै पाछु ऊदै औवे। तोबै यीशुए तिनुकै बौल़ौ, “इबी जू किछै इथै हौए रौ तिथु कौसी कैई नै बौल़ेया। हांव तावल़ा मौरे जांदा औरौ ओटेयो जियुंदी हौए जांदा। तिथकै बाद, तुऐं लौगौ कै बौताए सौकौ।”