37. यीशु लाज़र कै मौरेयोंदै मुंजीदा जियुंदी कौरौ

लाज़र नांव का ऐक आदमी थिया। तैसकी दो बौईणी थी जिनुकौ नांव मरियम औरौ मार्था थियु। सैजा यीशु का खास दोस्त थिया। ऐक दुस, कुणिए यीशु कैई बौल़ौ कै लाज़र बैजाए बीमार औसौ। जोबै यीशुए ऐजौ शुणु तौ तैणै बौल़ौ, “ऐजै बैमारे लाज़रवारी खत्म ना हौंदे। इथकी जौगह, ऐजै लौगौ कै पौरमेशवर का आदर कौरणौ कारिए हिम्मत दैंदे।”

यीशु आपणै दोस्तोआरी प्यार कौरौ थिया, पौरौ जिथै सै थिया तिथै तैणै दु दुसौ तौड़ी ठोल़नाए कौरे। तिनु दु दुसौ कै बाद, तैणै आपणै चैलै कै बौल़ौ, “आव, पाछु यहूदिया प्रदेश कै जौऊंबै।” चैलै जबाब दिया, “पौरौ ओए रै गुरु जी, इबी हागड़िडौ शै तिथै कै लौग ताखै मार दैणा चांव थिऐ!” यीशुए बौल़ौ, “अमारा दोस्त लाज़र सौत गौआ, औरौ मैरे तैसी कै उबा बिज़ाल़ना।”

यीशु कै चैलै जबाब दिया, “ओए रै प्रभु, जै लाज़र सोते रौआ, तौ सै ठीक हौए जांदा।” तोबै यीशुए तिनुकै साफ-साफ बौल़े दियु, “कै लाज़र मौरे गौआ। हांव खुशी औसौ कै हांव तिथै नै थी, ताकि तुऐं मौ पांदी बिशवाश कौरे सौकौ।”

जोबै यीशु लाज़रौ कै गाँव दा पौंईचा तौ लाज़रौ कै मौरेबा आगैई चार दुस हौए रौवे थिऐ। मार्था यीशु कै भैटेदै बायरै आए औरौ बौल़ौ, “ओए रै प्रभु, जै तू इथी हौंदा तौ मैरा भाऐ नी मौरदा थिया। पौरौ हांव बिशवाश कौरू कै जू किछै तू पौरमेशवर वादौ मांगला सै ताखै दैय दैंदाए।”

यीशुऐ जबाब दिया, “मौरेयौंदै मुंजी दौ जियुंदी हौणौ औरौ जीवन हांव औसौ। जू कुणिए मौ पांदी बिशवाश कौरौ जै सै मौरे बै जांव तोबै बै जियुंदी रौंदा। जू कुणिए मौ पांदी बिशवाश कौरौ सै कौलौंई ना मौरदा। का तू इथपांदी बिशवाश कौरे?” मार्थाऐ जबाब दिया, “ओए रै प्रभु, हांव बिशवाश कौरू कै तू पौरमेशवर का बैटा मसीह औसौ।”

तोबै मरियम आए। औरौ तियैं यीशु कै लाथौ पांदी पौड़ेबा बौल़ौ, “ओए रै प्रभु, जै तू इथी हौंदा तौ मैरा भाऐ नै मौरदा थिया।” यीशुए तियौंके बौल़ौ, “तुऐं लाज़रौ कै कौकै राखै राए?” तिनुऐ तैसी कैई बौतौऊं, “कब्र दा। ऊंडा आ औरौ दैखै कौर।” तोबै यीशु रुंदा लागा।

सैजै कब्र ऐक गुफा थै जिथकै द्वारौ पांदी ऐक पात्थर लाए राए थिया। जोबै यीशु कब्रौ पांदी पौंईचा तौ तैणै तिनुकै बौल़ौ, “पात्थर हौटाए दै।” पौरौ मार्थाऐ बौल़ौ, “तैसी मौरेबा चार दुस हौए गौऐ। तिथ पौरेशै बांस आए रौले।”

यीशुऐ जबाब दिया, “का मौंऐ तुऔं कैई ना बौल़े रैई थी कै जै तुऐं मौ पांदी बिशवाश कौरली तौ पौरमेशवर कै शोकते दैखली?” इथकारिए तिनुऐ पात्थर हौटाए दिया।

तोबै यीशुऐ उबै स्वर्ग कै ढौबौ दैखैबा बौल़ौ, “ औए रै बापू, मैरी बातौ शुणणौ कारिए हांव तैरा धन्यबाद कौरू। हांव जाणुऐ कै तू सदा मैरी शुणै, पौरौ मुऐं ऐजौ इथै हौटेयोंदै इनु सौबी लौगौ कै मोदद कौरणौ कारिए बौल़ौ ताकि सै बिशवाश कौरौ कै तुऐं मौखै छाड़े राए।” तोबै यीशुए धाव मारे, “ओए रै लाज़र बांईडा आ!”

औरौ लाज़र बायरै आए गौआ! सै इबी बै कोफनी बितरा लौपेटियौंदा थिया। यीशुए तिनुकै बौल़ौ, “इयौं कोफनी खौलणौ कारिए तैसकै मदद कौरौ औरौ तैसीकै आज़ाद कौरौ।” ऐसी चोमत्कार की बौजेह शै बौरिशै यहूदी लोगै यीशु पांदी बिशवाश कौरा।

पौरौ यहूदी लौगौ कै धरमी अगुवे यीशु दै जौल़दै लागै, इथकारिए सै योजना बाणणौ कारिए ऐक साथै कौठे हौवे कै कैशैकै यीशु औरौ लाज़र कै मारे देंई।