38. यीशु कै ऊंडा पौकड़ौऊआ

ऐई साल, यहूदी लौग फसह कौ तैयार मौनांव थिऐ। ऐजौ इथकै बारै मुंजी ऐक जोशन थिया कै कैई साल आगै पौरमेशवरै तिनकै पुराणिया खै मिस्र देश की गुलामी शै छुड़ाए राए थिए। लमसम तीन सालो कै बाद यीशुऐ सौबी लोगौ मुंजी प्रचार कौरा औरौ शिक्षा दैणै शुरू कौरे। यीशुऐ आपणै चैलै कै बौतौऊं कै सै तिनुवारी यरूशलेम शहर दा फसह का तैयार मौनाणा चांव, औरौ ऐजौ बै कै तैसी तिथै मारै दैन्दै।

यीशु कै चैलै मुंजीदा ऐक यहूदा नांव का आदमै थिया। औरौ यहूदा चौणैयोंदै चैलै कै पौयसै कै थौलै राखणौवाल़ा खजांची थिया, पौरौ जादातर सै तियौं थौली पौरेशै पौयसै उंडै घाड़ेया कौरौ थिया। यीशु औरौ तैसकै चैलै यरूशलेम शहर दै पौऊंचणौ कै बाद यहूदा, यहूदी नेता कै धौरे हौटा। तैणै पौयसै कै बौदल़ै यीशु कै तिनकै हाथौ दै थौम्बाणौ कै बात राखै। सै जाणौ थिया कै यहूदी नेता यीशु कै मसीह ना मानौ। सै जाणौ थिया कै सै तैसी कै मारै दैणा चांव।

महा यहूदी पुरोहित कै बौल़णौ पांदी यहूदी नेताऐ यीशु कै तिनकै हाथौ दै थौम्बाणौ कारिए यहूदा कै तीश चांदी कै सिक्के दिऐ। ऐजौ तैशैकैई हौ जैशैकै पौरमेशवर की बातौ बौताणौ वाल़ै बौल़े राए थियु कै ऐशैकैई हौंदौए। यहूदा माने गौआ थिया औरौ पौयसै नियौं आगु हौटा। सै यीशु कै थौम्बाणौ औरौ तिनकै मौदद कौरणौ कारिए कियौंई मौके कै ताकौ दा रौआ।

यरूशलेम दा, यीशुऐ आपणै चैलै कै साथै फसह का तैयार मौनौऊंआ। फसह कै खाणौं कै सौमय, यीशुऐ रोटे तौड़े। तैणै बौल़ौ, “इयौं आगु कौरौ औरौ खाए पाव। ऐजा मैरा शोरीर औसौ जू हांव तुऔं कारिए दिंयु। औरौ मैरै याद दौ ऐशैकैई कौरेया।” ऐशैकैई, यीशुऐ बौल़ौ कै हांव तुऔं कारिए मौर जांदा, औरौ तुऔं कारिए हांव आपणै शोरीरो कै बौल़ि चौढ़ाए दैंदा।

तोबै यीशुऐ अंगूरौ कै रसौ का ऐक छाना कौरा औरौ बौल़ौ, “इथु पी पाव। ऐजा नौंऐ कौरारौ का मैरा लौऊ औसौ जू कै हांव तुऔं कै देंदा ताकि पौरमेशवर तौंवारै पापौ कै माफ कौरौ। ऐई बैई इथु पिंदिऐ बैई मैरी याद दौ ऐशैकैई कौरेया कौरौ जू मौंऐ इबी कौरे लौ।”

तोबै यीशुऐ आपणै चैलै कै बौल़ौ, “तुऔं मुंजीदा ऐक जौणा मौखै थौम्बांदा।” चैलै हैरान हौए गौवे, औरौ पूछदै लागै कै कुण ऐशणा काम कौरदा। यीशुऐ बौल़ौ, “मौखै थौम्बाणौ वाल़ा आदमै सैजा औसौ जैसीकै हांव ऐजा रौटी का टुकड़ा दिंयु।” तोबै तैणै सैजै रोटे यहूदा कै दै।

तियौं रोटे खाणौं कै बाद, यहूदा दा शैतान सौमाए गौआ। यहूदा आगु जाऐबा यीशु कै थौम्बाणौ कारिए यहूदी नेतांव कै मौदद कौरणौ कारिए हौटे गौआ। ऐजा राते का समय थिया।

खाणौं खाणौ कै बाद, यीशु औरौ तैसकै चैलै जैतून धारौ पांदी हौटे। औरौ यीशुऐ बौल़ौ, “तुऐं सोबै जौणै ऐलौई राते मौखै छौड़े दैंदे। ऐजौ लैख राए, ‘कै हांव चौराईयाँ कै मारदा औरौ सोबै भेड़ौ आपि-आपि कै बिखरै जांदी।’”

पतरसै जबाब दिया, “भौलैई बाकी सोबै ताखै छौड़े दैंव, पौरौ हांव ना छौड़दा!” तोबै यीशुऐ पतरस कै बौल़ौ, “शैतान तुऔं सौबी कै लौऐ जाणै चाँव, पौरौ औए रै पतरस, मौंऐ तांव कारिए प्रार्थना कौरे राए कै तू बिशवाश दा कमजोर नै हौए जांऐ। तोबै बै, ऐलौ कै रातेये, कुकड़ै कै बाँक दैणौ दै आगै तू तीन बैई मौखै भाजै जांदा कै हांव ताखै ना जाणु।”

पतरसै तोबै यीशु कै बौल़ौ, “भौलैई हांव मौरे बै जौऊं, हांव कौलौंई बै ताखै ना भाजदा!” बाकी कै सौबी चैलै बै ऐशैकैई बौल़ौ।

तोबै यीशु आपणै चैलै कै साथै गतसमनी नांव कै ऐकी ठांव पांदी हौटा। यीशुऐ आपणै चैलै खै प्रार्थना कौरणौ कारिए बौल़ौ ताकि शैतान तिनुकै पौरखौ नै। तोबै यीशु प्रार्थना कौरणौ कारिए जौई हौटा।

यीशुऐ तीन बैई प्रार्थना कौरे, “ओए रै मैरे पिता, जै हौए सौकौ तौ ताखै मैरे ढाल़ ऐ ऐजा दुख का छाना मौखै पीणौ कारिए नै दै। पौरौ जै लौगौ कै पाप माफ कौरणौ कारिए कोणजै औके बाट ना आथी, पौरौ तौबे बै तैरै मौरजै पोरै हौंव।” यीशु बैजाए बैचेन थिया औरौ तैसका परसीना लौई कै जैशणा थिया। तैसी कै शोकते दैणौ कारिए पौरमेशवरै ऐक स्वर्गदूत छाड़ा।

हर बैई प्रार्थना कौरणौ कै बाद, यीशु आपणै चैलै कै धौरे पाछु औआ, पौरौ सै सौते गौवे थिऐ। जोबै यीशु तिज़ालियौ पाछु ओआ तौ यीशुऐ बौल़ौ, “उबै बिजौ! मैरा थौम्बाणौ वाल़ा इथी औसौ।”

यहूदी नेता, सैनिकौ, औरौ ऐकी भीड़ लियाऐबा यहूदा औआ। तिनवागै तलवारी औरौ डैंगै थिऐ। यहूदाऐ यीशु कै धौरे आऐबा तैसकैई बौल़ौ, “ओए रै गुरु जी, नमशकार,” औरौ तैसी कै हौंगटे लौआ। तैणै यीशु कै थौम्बाणौ कै यहूदी नैतांव पांदी प्रकट कौरणौ कारिए ऐशैकै कौरे राए थियु। तोबै यीशुऐ बौल़ौ, “ओए रै यहूदा, का तौऐं ऐक बैई हौंगटे लाऐबा मौखै थौम्बाए लौआ?”

जोबै तिनु सैनिकै यीशु कै थाम्बै लौआ थिया, तोबै पतरसै आपणै तलवार घाड़ै औरौ महा यहूदी पुरोहित कै ऐकी नौकरौ का कान काटे दिया। यीशुऐ बौल़ौ, “तलवार दूरकै राख! हांव आपणै बापू कैंईदै आपी कै बौचाणौ कारिए स्वर्गदूतौ कै ऐक सेना मांगणौ कै बेनते कौरे सौकुं। पौरौ मैरे आपणै बापू कै बात मानणै।” तोबै यीशुऐ तैसी आदमी का कान ठीक कौरे दिया। तोबै सोबै चैलै दौड़ै गौवे।