39. यीशु पांदी मुकद्दमा चालौ

ऐबै ऐजा आधैये राते का सौमय थिया। तिनु सैनिकै यीशु कै महा यहूदी पुरोहित कै घौरे निया, जिथुकै सै यीशु कैंईदै सवाल पूछणै चांव थिऐ। पतरसै दूरकै दा तिनका पीछा कौरे लौआ थिया। जोबै सैनिकै यीशु कै घौरे पुंडा भिटा निया, तौ पतरस बायरै ठोहरियो आग सैके लौए थै।

घौरौ कै भीतरै, यहूदी नेताऐ यीशु पांदी मुकद्दमा चौलौऊंआ। तिनुऐ तैसकै खिलाफ झूठी बातौ बौल़णौ कारिए भौरिशै झूठै गवाह लियौऊंऐ। भौलैई, तिनकी गोवाई ऐकी दुजैयारी नी मिलौ थी, इथकारिए यहूदी नेता कै ऐजौ साबित ना कौरी कै सै कियौं बातौ का दोषै थिया। यीशुऐ किछै ना बुल़ी।

आखरी दौ, महा यहूदी पुरोहितै सीधु यीशु कै ढौबौ दैखेबा बौल़ौ, “आमु कै बौता कै तू ही जियुंदी पौरमेशवर का बैटा मसीह औसौ?”

यीशुऐ बौल़ौ, “हांव औसौए, औरौ तुऐं मौखै पौरमेशवर कै साथै बौठैयोंदा औरौ स्वर्ग पौरेशा आंदिये बैई दैखदै।” महा यहूदी पुरोहितै आपणै खौटणौ फाड़ै दिऐ जिथुकै जू यीशुऐ बौल़ौ सै तियौं बातौ पांदी बैजाए गुस्सा थिया। सै औकी नेतांव पांदी लेरो मारदा लागा, “आमु कै ऐजौ बौताणौ कारिए कौसी औकी गवाह कै जौरूरत ना आथी कै ऐसी आदमीए का कौरे राए! तुऐं आपी ही तैसी ऐजौ बुल़दिऐ बैई शौणै पोआ कै सै पौरमेशवर का बैटा औसौ। ऐसकै बारै मुंजी तौंवारा का फोयसला औसौ?”

सौबी यहूदी नेताऐ महा यहूदी पुरोहित कै जबाब दिया, “सै मौरणौ कै लायक औसौ!” तोबै तिनुऐ यीशु की आखी पांदी पाट्टी बानै दी, तैसपांदी थूकु, तैसीकै पीटा, औरौ तैसका मजाक उड़ौऊंआ।

औरौ पतरस, जोबै तैणै घौरौ कै बायरै ठौल़े लौआ थिया। तोबै ऐकी दासी बाईटिऐ तैसीकै दैखा। तियैं तैसीकै बौल़ौ, “तू बै यीशु कै साथै थिया!” पौतरसे मौना कौरे दियु। तैथियोंड़ै, कुणिए औकी बाईटिऐ बै ऐजै बात बौल़े, औरौ पतरसे ओटेयो मौना कौरे दियु। आखरी दौ, किछै औकी लोगै बौल़ौ, “आमै जाणुऐ कै तू यीशु कै साथै थिया जिथुकै तुऐं दुईनै जौणै गलील कै औसौ।”

तोबै पतरसे बौल़ौ, “जै हांव ऐसी आदमी कै जाणु होला तौ पौरमेशवर मौखै शराप दैंव!” तौलौंई पतरसौ कै ऐशैकै शौं खाणौ कै बाद, ऐकी कुकड़ै बाँग दै। यीशुऐ पाछु फिरेबा पतरसौ कै दैखा।

पतरस तिथै दा आगु हौटा औरौ हिणकै-हिणकैबा रुन्दा लागा। यीशु कै थौम्बाणौ वाल़ै यहूदाऐ दैखौ कै यहूदी नेताऐ यीशु कै मौत कै सजा दैय राए। यहूदा बैजाए दुखी हौए गौआ औरौ जाऐबा आपी कै मारै दिया।

ऐबै तैसी देशौ का राज्यपाल पिलातुस थिया। सै रोम दैशो कारिए काम कौरेया कौरौ थिया। यहूदी नेताऐ यीशु कै तैसकै धौरे लियौंऊआ। सै चांव थिऐ कै पिलातुस तैसी कै मौत कै सजा दैंव औरौ तैसी कै मारै दैंव। तोबै पिलातुसै यीशु कैंईदु पूछु, “का तू यहूदियो का राजा औसौ?”

यीशुऐ जबाब दिया, “तौंऐ साचौ बौल़े लौ। पौरौ मैरा राज्य इथै धौरती पांदी का ना आथी। जै हौंदा तौ मैरे दास मौ कारिए युध्द लौड़दै थिऐ। हांव धौरती पांदी पौरमेशवरौ कै बारै मुंजी सौचाए बौताणौ कारिए आए रौआ। हरेक आदमै जू सौचाई शै प्यार कौरौ सै मैरी शुणौ।” पिलातुसै बौल़ौ, “तौ सौचाए का औसौ?”

यीशु कै साथै बातौ कौरणौ कै बाद, पिलातुसे बायरै भीड़ौ कै धौरे जाऐबा बौल़ौ, “हांव तैसदै ऐशणै कुणजै बौजेह ना पौऊं कै ऐजा आदमै मारै दैणौ कै लायक हौला।” पौरौ यहूदी नेताऐ औरौ भीड़ै लेरो मारैबा बौल़ौ, “तैसीकै क्रूसौ पांदी चौढ़ाए दैंव!” पिलातुसै जबाब दिया, “सै किछै बै गोल़त कौरणौ का दोषै ना आथी।” पौरौ सै हौजौ बै जौर शै लेरो मारदै लागै। तोबै पिलातुसे तिज़ालियौ बौल़ौ, “सै दोषै ना आथी!”

पिलातुस डौरे गौआ कै सैजै भीड़ दंगा कौरणा शुरू नै कौरे दैंव, इथकारिए सै आपणै सैनिकौ लैई यीशु कै क्रूसौ पांदी चौढ़ाणौ कारिए मानै गौआ। रोमी सैनिकै यीशु दै कोड़े लाए, औरौ तैसीकै शाही खौटणौ बाम्बाऐ, औरौ तैसकै मुंडौ पांदी कांडै कौ बाणयोंदौ ताज राखौ। तोबै सै ऐजौ बौल़ेबा तैसका मजाक उड़ांदै लागै, “देखौ,यहूदियो का राजा!”