40. यीशु कै क्रूस पांदी चौढ़ौऊंआ

यीशु का ठाट्ठा कौरणौ कै बाद, सैनिक तैसीकै क्रूसौ पांदी चौढ़ाणौ कारिए लौए गौवे। तिनुऐ सैजौ क्रूस तैसी लैई टिपौऊं जिथपांदी सै मौरदा थिया।

सैजै सैनिक यीशु कै तैसी ठांव दै लौए गौवे जिथुकै “खोपड़ी बौल़ौ, औरौ तैसकै हाथौ औरौ लाथौ कै क्रूसौ पांदी किले दिऐ। पौरौ यीशुए बौल़ौ, “ओए रै बापू, इनु माफ कौर, जिथुकै ऐ‍जै ना जाणौ कै इनुऐ का कौरे लौ।” तिनुऐ ऐक तोख्ते कै बै तैसकै मुंडौ पांदी टांगै दै। तिथपांदी लैख राए थियु, “यहूदियों का राजा।” पिलातुसे तिनुकै ऐजौई लिखणौ कै बौल़े राए थियु।

तोबै सैनिकै यीशु कै खौटणौ कारिए चिट्ठी पैई। जोबै तिनुऐ ऐशै कै कौरौ तौ तिनुऐ तियौं भविष्यवाणी कै पोरै कौरे जू बोतांव कै, “तिनुऐ मैरै खौटणौ आपी मुंजी बांटे दिऐ, औरौ मैरै खौटणौ कारिए चिट्ठी पैई।”

तिथै दो डाकू बै थिऐ, जिनुकै सैनिकै तौलौंई क्रूसौ पांदी चौढ़ाए राए थिऐ। तिनुऐ तिनुकै यीशु कै दु ढौबौ राखै राए थिऐ। तिनमुंजी दै ऐकी डाकूऐ यीशु का मजाक उड़ौऊआ, पौरौ औकी डाकुए तैसीकै बौल़ौ, “का तू डौरे ना कै पौरमेशवर ताखै सजा दैंदा? आमै बौहितै बुरै कामौ कै कौरणौ कै दोषी औसौ, पौरौ ऐजा आदमै निर्दोष औसौ।” तोबै तैणै यीशु कै बौल़ौ, “जौलौ तू आपणै राज्य दा आईला तौ ताखै मैरे ढाल औसौ कै मौखै बै याद राखेया।” यीशुऐ जबाब दिया, “ऐलौई तू मैरै साथै स्वर्ग दा हौंईदा।”

यहूदी नेताऐ औरौ भीड़ौ कै औकी लोगै यीशु का मजाक उड़ौऊआ। तिनुऐ तैसीकै बौल़ौ, “जै तू पौरमेशवर का बैटा औसौ, तौ क्रूस पौरेशा उदा आ औरौ आपी कै बौचा! तोबै आमै तांव पांदी बिशवाश कौरदै।”

तोबै तैसी पूरै देशौ कै गौयण पूरी तौरेह शै काल़े हौए गौए, भौलैई सै दुसौ का सौमय थिया। गौयण दोफारौ कै सौमय काल़ी हौए रौई थै औरौ तीन घांटे तौड़ी ऐशैकैई रौ।

तोबै यीशुए जौर शै बौल़ौ, “पूरू हौ! औए रै बापू, हांव आपणै आत्मा तैरै हाथौ दै दिंयु।” तोबै तैणै आपणौ मुंड नियुंडौऊं औरौ आपणै प्राण छौड़े दिऐ। जोबै सै मौरा तौ ऐक भोईचौल़ औऊं। सैजा बौड़ा पोरदा जू पौरमेशवर कै मोजूदगी शै लौगौ कै जौई कौरौ थिया उपरौ शै तौल तौड़ी दो भाग हौए गौआ।

आपणै मौत कै द्वारा, यीशुऐ लोगौ कारिए पौरमेशवर कै धौरे आणौ कै बाट खौल दै। जोबै यीशु कै दैखरेख कौरणौ वाल़ै ऐकी सैनिकै जू किछै हौऐ रौ थियु ऐजौ सोबै ठुँ दैखौ तौ तैणै बुलू, “जौरुर, ऐजा आदमै निर्दोष थिया। ऐजा पौरमेशवर का बैटा औसौ।”

तोबै यूसुफ औरौ नीकुदेमुस नांव कै दो यहूदी अगुवे औऊंवे। सै बिशवाश कौरौ थिऐ कै यीशु ही मसीह औसौ। तिनुऐ पिलातुसौ कैंईदै यीशु कै लाश मांगै। तिनुऐ तैसकै लाश खौटणौ दै लौपेटे। तोबै सै यीशु कै लाशौ कै ऐकी चट्टानौ कै काटेयो बौणायोंदै कब्र दै लौए गौवे औरौ तिथ बितरै राखै दै। तोबै तिनुऐ तियौं कब्रौ कै द्वार बौन्द कौरणौ कारिए ऐक बौड़ा पात्थर रौड़काऐ दिया।