41. पौरमेशवर यीशु कै मौरेयोंदै मुंजीदा जियुंदी कौरौ

यीशु कै क्रूसौ पांदी चौढ़ाणौ कै बाद, यहूदी नेताए पिलातुस कै बौल़ौ, “तैसी झूठै, यानि यीशुऐ बौल़े राए थियु कै सै ती दुसौ कै बाद मौरेयोंदै मुंजी दा जियुंदी हौंदा। कौसी कै ऐजौ साबित कौरणौ कारिए कब्र कै दैखरेख कौरणै पौड़दै कै तैसकै चैलै तैसकै लाश चौरेयो नै लौए जांव। जै सै ऐशैकै कौरौ तौ सै बौलदै कै सै मौरेयोंदै मुंजीदा जियुंदी हौए गौआ।”

पिलातुसै बौल़ौ, “किछै सैनिक लौए जांव, औरौ जैशैकै तुऐं कौरे सौकौ तैशैकै कब्र कै दैखरेख कौरौ।” इथकारिए तिनुऐ तियौं कब्रौ कै दियोल़े कै पात्थरौ पांदी ऐक मोहर लाए दै। तिनुऐ ऐजौ साबित कौरणौ कारिए तिथै रोखवाल़ै कौरणौ कै सैनिकौ कै बै बौठाल़े दिए कै कुणिए बै तैसकै लाश चौरे नै दैंव।

यीशु कै मौरणौ कै बाद कौ दुस बिशांव कौ दुस थियु। कुणिए बै बिशांव कै दुसै ठौल नै सांडे सौकौ थिया, इथकारिए यीशु का कुणजाई बै दोस्त कब्रौ पांदी ना आए रैई थी। पौरौ बिशांव कै दुसौ कै बाद, झीशौ झीशिंदी, किछै बैटमाणिशौ यीशु कै कब्रौ पांदी जाणौ कारिए तैयार हौई। सै तैसकै लाशौ पांदी हौजौ बै खुशबू वाल़ी चीज़ौ लाणी चांव थी।

तिनु बैटमाणिशौ कै पौंईचणौ दै आगै, कब्रौ पांदी ऐक बौड़ौ भौईचौल़ औऊ। स्वर्ग पौरेशौ ऐकी स्वर्गदूतै आऐबा तैसी पात्थरौ कै हौटाए दिया जू कब्रौ कै दियोल़े पांदी थिया औरौ तिथ पांदी बौठ गौआ। ऐजा स्वर्गदूत पैयाशै कै जैशणा चौमकै रौआ थिया। कब्रौ पांदी जू सैनिक थिए तिनुऐ तैसी कै दैखा। सै इशैक डौर गौवे थिऐ कै मौरेयोंदै साए जौमीनौ पांदी रिड़ै गौवे।

जोबै सैजी बैटमाणिशौ कब्रौ पांदी पौंईची तौ तैसी स्वर्गदूतै तिनुकै बौल़ौ, “डौरेया नै। यीशु इथै ना आथी। सै मौरेयोंदै मुंजीदा जियुंदी हौए गौआ, जैशैकै तैणै बौल़े राए थियु कै सै जियुंदी हौंदा! कब्रौ दा जौआ औरौ दैखा।” तिनु बैटमाणिशै कब्रौ कै भीतरै औरौ जिथै यीशु कै लाश राखै राए थै तिथै जौआ औरौ दैखौ कै तैसकै लाश तिथै ना आथी!

तोबै तैसी स्वर्गदूतै तिनु बैटमाणिशौ कै बौल़ौ, “जाऐबा तैसकै चैलै कैई बौतांव, ‘यीशु मौरेयोंदै मुंजी दा जियुंदी हौए रौआ औरौ सै तुऔं दा औगौड़ियौ गलील जिले कै जांदा।’”

सैजी बैटमाणिशौ हैरान हौई औरौ बैजाए खुशी हौई। सै चैलै कै ऐजा सुसमाचार शुणाणौ कारिए दौऊंड़ी।

जोबै सैजी बैटमाणिशौ चैलै कै ऐजा सुसमाचार शुणाणौ कारिए आपणै बाटौ पुंडी थी, तौ यीशु तिनुकै देखिया। सै तैसकै लाथौ पांदी पौड़ी। तोबै यीशुऐ बौल़ौ, “डौरेया नै। जाऐबा मैरै चैलै कै गलील जिले कै जाणौ कै बौल़ौ। सै तिथै मौखै दैखदै।”