42. यीशु स्वर्ग कै पाछु जांव

जैसी दुसै पौरमेशवरै यीशु कै मौरेयोंदै मुंजी दा जियुंदी कौरा, तैसी दुसै तैसकै दो चैलै नैड़िक कै गांव दै चाले रौवे थिए। हांडदिए बैई तिनुऐ यीशु कै साथै जू हौए रौ थियु। तिथकै बारै मुंजी बातौ कौरे लौई थी, तिनुकै उमीद थै कै सै मसीह थिया, पौरौ तोबै सै मौरे गौआ थिया। ऐबै सैजी बैटमाणिशौ बौल़ौ कै सै ओटेयो जियुंदी हौए गौआ। सै नै जाणौ थिए कै कौसकी बातौ पांदी बिशवाश कौरी।

यीशु तिनकै धौरे आऐबा तिनुवारी हांडा, पौरौ तिनकै तैसी पौछयाणी ना। तैणै पूछु कै तुऐं कौसकै बारै मुंजी बातौ कौरे लौई। तिनुऐ यीशुकैंई यीशु ही कै बारै मुंजी हौयौयोंदी बातौ कै बारै मुंजी बौतौऊं। तिनुऐ सुंचु कै आमुऐ कौसी परदेशीयारी बातौ कौरे लौई जू जाणौ ना कै यरूशलेम शहर दौ का हौए रौ।

तोबै यीशुऐ तिनुकै सौमझौऊऐ कै पौरमेशवर का बचन मसीह कै बारै मुंजी का बौल़ौ। कैई सालो आगै, पौरमेशवरौ की बातौ बौताणौ वाल़ै बौल़े राए थियु कै बुरै लौग मसीह कै दुख दैंदे औरौ मारे दैंदे। औरौ पौरमेशवरौ की बातौ बौताणौ वाल़ै ऐजौ बै बौल़े राए थियु कै सै तीज़ै दुसै जियुंदी हौए जांदा।

जोबै सै तैसी नगरौ दै पौंईचै जिथै सैजै दो जौणै टिकणौ चांव थिए, तौ तैतियो लमसम बैल़खौ हौए गौ थियु। तिनुऐ यीशु कै आपणै साथै टिकणौ कारिए हाएड़ै कौरे, औरौ सै तिनुवारी कोसी ऐकी कै घौरे हौटा। औरौ जोबै तिथै सै बियाल़े खांदै बौठे गौवे। तौ यीशुऐ ऐक रोटे कौरे औरौ तिथकारिए पौरमेशवर का धन्यवाद कौरा, औरौ तोबै तियौं तौड़े। तौलौईं, तिनुऐ जाणै पौऊं कै सै यीशु औसौ। पौरौ तौलौंई, सै तिनकी आखी कैईदा हांएचै गौआ।

तिनु दु जौणै आपी मुंजी बौल़ौ, “सै यीशु थिया! इथकारिए जोबै तैणै आमु कै पौरमेशवरौ कै वचन कै बारै मुंजी सौमझाए लौवे थिए तौ आमै बैजाए खुशी थिए!” तौलौंई, सै निकल़ेबा पाछु यरूशलेम कै हौटे। जोबै सै पौंईचै तौ तिनुऐ चैलै कै बौतौऊं, “यीशु जियुंदी औसौ! आमुऐ तैसीकै दैख राए!”

जोबै चैलै आपी मुंजी पोईले रौवे थिए, तौ तौलौईं यीशु तिनकै ऐकदम शै तैसी कमरे दा दैखिया। औरौ तैणै बौल़ौ, “तुऔं कै शान्ते भैटौ!” चैलै सुंचु कै सै भूत औसौ, पौरौ यीशुऐ बौल़ौ, “तुऐं किथुकै डौरे रौवे? तुऐं ऐशै काए ना सुंचौ, कै हांव भूत ना आथी, पौरौ यीशु औसौ? मैरै हाथ लाथ दैखौ। भूतौ दी हाड़की औरौ माँस ना हौंव जैशैकै मौ कैंई औसौ।” ऐजौ दिखाणौ कारिए कै सै कुणजाई भूत ना आथी, तैणै खाणौं कारिए किछै मांगौ। तिनुऐ तैसी कै माछी का ऐक टुकड़ा दिया, औरौ तैणै सै खाए पौऊआ।

यीशुऐ बौल़ौ, “मैरे बारै मुंजी पौरमेशवर का वचन जू किछै बै बौल़ौए सै घौटदाए। मौंऐ तुऔं कै बौताए दियु कै तिथकौ हौणौ जौरूरी औसौ।” तोबै यीशुऐ तिनुकै पौरमेशवरौ का वचन ठीक शै सोमझौऊंवा। तैणै बौल़ौ, “बैजाए सालो औगौड़ियौ पौरमेशवरौ की बातौ बौताणौ वाल़ै लैख राए थियु कै मौखै, मसीह कै दुख सौहणा पौड़दा, औरौ मौरणौ पौड़दौ औरौ तोबै तीज़ै दुसै मौरेयोंदै मुंजीदा जियुंदी हौंदा।”

“तिनु पौरमेशवरौ की बातौ बौताणौ वाल़ै ऐजौ बै लैख राए थियु कै मैरे चैलै पौरमेशवर कै वचन कै घोषणा कौरदै। सै सौबी कै पाप कौरणै छौड़े दैणौ कै बारै मुंजी बौतांदै। जै सै ऐशैकै कौरले तौ पौरमेशवर तिनकै पापौ कै माफ कौरदा। मैरे चैलै ऐसी सौंदेशौ का प्रचार कौरणा यरूशलेम शै शुरू कौरदै। तोबै सै सौबी ठांव दै सौबी जाति मुंजी जांदै। तुऐं सोबै लौग मैरी इनु बातौ औरौ कामौ कै गवाह औसौ जू मौंऐ बौल़े औरौ कौरे राए थिऐ, औरौ तिथु सौबी कै बै जू मैरे साथै हौए रौ थियु।”

मौरेयो जियुंदी हौणौ कै बाद, यीशु आपणै चैलै कै कैई बैई दैखिया। ऐक बैई तौ सै ऐकी सौमय पांदी 500 दै जादा लौगौ कै दैखिया! तैणै आपणै चैलै पांदी कैई तरीकौ लैई साबित कौरौ कै सै जियुंदी औसौ, औरौ तैणै तिनुकै पौरमेशवरौ कै राज्य कै बारै मुंजी शिक्षा दै।

यीशुऐ आपणै चैलै कै बौल़ौ, “पौरमेशवरै मौखै स्वर्ग औरौ धौरती कै सौबी आदमी पांदी राज कौरणौ का ओधिकार दैए राए। इथकारिए ऐबै हांव तुऔं कै बुलू : जाऐबा सौबी जाति कै लौगौ कै चैला बाणौ। ऐशैकै कौरणौ कारिए, तुऐं पिता, बैटा, औरौ पवित्र आत्मा कै नांव शै बपतिस्मा दैंव। जू किछै बै मौंऐ तुऔं कै आज्ञा दैए राए तिनु सौबी बातौ कै मानणी बी तुऔं तिनुकै शिखाणी पौड़दी। याद राखौ, हांव होमैशा तौंवारै साथै रौंदा।

यीशु कै मौरेयोंदै मुंजी दै जियुंदी हौणौ कै चालीश दुसौ कै बाद, तैणै आपणै चैलै कै बौल़ौ, “जांव तौड़ी कै मैरा बापू तुऔं शोकती ना दैंव तांव तौड़ी यरूशलेम दै टिकेयोंदै रौंव। सै तुऔं पांदी पवित्र आत्मा छाड़ेबा ऐशैकै कौरदा।” तोबै यीशु स्वर्ग दा हौटे गौआ, औरौ ऐकी बादल़े तैसीकै तिनकी नोजरो पौरेशा छुपाए दिया। स्वर्ग दा यीशु सौबी चीज़ौ पांदी राज कौरणौ कारिए पौरमेशवर कै सौऐं ढौबौ बौठे गौआ।