43. कलीसिया कै शुरूवात

यीशु कै स्वर्गौ पाछु जाणौ कै बाद, चैलै यरूशलेम दै ही रौवे जैशैकै यीशुऐ तिनुकै कौरणौ का आदेश दैए राए थिया। तिथै कै बिशवासी लौग रोज ऐक साथै प्रार्थना कौरणौ कारिए कोठै हौया कौरौ थिए।

ऐई साल, फसह कै तैयारौ कै 50 दुसौ कै बाद, यहूदी लौग पिन्तेकुस्त नांव को ऐकी खास दुसौ कै मौनांव थिए। पिन्तेकुस्त सैजा सौमय थिया जोलो यहूदी लौग गियुँ कै शाक काटौ थिए तिथु पिन्तेकुस्त कौ तैयार बौल़ौ थिए। पूरी दुनिया शै यहूदी लौग पिन्तेकुस्त कै दुसौ कै ऐकसाथै मौनाणौ कारिए यरूशलेम दै औवे। इयौं साल, पिन्तेकुस्त मौनाणौ का सौमय यीशु कै स्वर्ग कै पाछु जाणौ कै बाद लमसम ऐक हफ्ते कै बाद आए रौआ थिया।

जोलो सोबै बिशवाशै लौग ऐक साथै कौठे थिए, तौ जेसी घौरे पुंडै सै थिए ऐकदम शै तिथ पौरेशै बागुरौ कै जैशणै जोराल़े आवाज़ शुणै। तोबै आग कै लोयारे कै जैशणो दैखिणौ वाल़ो किछै सौबी बिशवाशी कै मुंडौ पांदी प्रकट हौ। सैजै सोबै जौणै पवित्र आत्मा लैई भौरे गौवे औरौ तिनुऐ अनजानै भाषा दै पौरमेशवर कै बौड़ाए कौरे। ऐजी सैजी भाषा थी जिनु बौल़णौ कारिए तिनुकै पवित्र आत्माऐ शोकते देय राए थै।

जोबै यरूशलेम शहर दै रौणौ वाल़ै लोगै सैजा शौर शुणा, तौ सैजै भीड़ ऐजौ दैखणौ कारिए ऐकसाथै आए कै का हौंदौ लागै रौ। तिनुऐ बिशवाशी कै पौरमेशवरौ कै द्वारा कौरियोंदै बौड़े-बौड़ै कामौ कै घोषणा कौरदिए बैई शुणै। सै बैजाए हैरान थिए जिथुकै सै तिनु कामौ कै आपणै ही भाषा दै शुणौ थिए।

तिनमुंजी दै किछै लौगै बौल़ौ कै सै माचे रौवे। पौरौ पतरस उबा बिज़ा औरौ बौल़ौ, “मैरे बात शुणौ! ऐजै लौग माचे ना रैई! इथकारिए, जू किछै तुऐं दैखौए सै सैजौई औसौ जू योएल पौरमेशवर की बातौ बौताणौ वाल़ै बौल़े राए थियु कै हौंदौए: पौरमेशवरै बौल़ौ, ‘आखरी कै दुसौ दा, हांव आपणा आत्मा तुऔं कै दिंयुबा।’”

“ओए रै इस्राएली मौरदौ, यीशु ऐक ऐशणा आदमै थिया जैणै ऐजौ दिखाणौ कारिए कै सै कुण थिया बौरिशै अनोखै काम कौरे राए थिए। तैणै पौरमेशवर कै शोकती लैई भोरिशै अनोखै काम कौरे राए थिए। तुऐं ऐजौ जाणौए, जिथुकै तुऐं इनु कामौ कै दैख राए। पौरौ तुऐं तैसीकै क्रूसौ पांदी चौढ़ाए दिया!”

“यीशु मौरे गौआ पौरौ पौरमेशवरै तैसी कै मौरेयोंदै मुंजीदा जियुंदी कौरे दिया। तैणै तिनु बातौ कै पूरी कौर दी जू ऐकी पौरमेशवरौ की बातौ बौताणौ वाल़ै लैख रैई थी: ‘तू आपणै पवित्र जन कै कब्र दा ना शौड़नौ दैंदा।’ आमै गवाह औसौ कै पौरमेशवरै यीशु कै ओटेयो जियुंदी कौरे दिया।”

“पौरमेशवर पिताऐ ऐबै यीशु कै आपणै सौऐं ढौबौ बौठाल़ेबा तैसीकै आदर दिया। औरौ यीशुऐ आमु कारिए पवित्र आत्मा छाड़ा जैशैकै तैणै वादा कौरे राए थिया कै सै छाड़दाऐ। पवित्र आत्मा ही तिनु कामौ कै हौणौ दैए लौवे जिनु तुऐं दैखै औरौ शुणै लौवे।”

“तुऐं तैसी आदमी, यानि यीशु मसीह कै क्रूसौ पांदी चौढ़ाए दिया। पौरौ पाकौई जाणै पाव कै पौरमेशवरै यीशु कै सौबी चीज़ौ पांदी प्रभु औरौ मसीह दुईनै ठौरौऊआ!”

पतरसौ की शुणणौ वाल़ै लौग तैसकी बौलयोंदी बातौ लैई बीतरौ तौड़ी हिंज़ले गौवे। इथकारिए तिनुऐ पतरस औरौ चैलै कैंईदु पूछु, “ओए रै भाईड़ियों, आमु कै का कौरणौ चैई?”

पतरसै तिनुकै जबाब दिया, “तुऔं मुंजी दै सौबीकै पाप कौरणै छौड़णै चैंई ताकि पौरमेशवर तौंवारै पापौ कै माफ कौरे दैंव, औरौ यीशु मसीह कै नांव लैई बपतिस्मा लौंव। तोबै सै तुऔं कै वरदान कै रुपौ दा पवित्र आत्मा बै दैंदा।”

पतरसै जू बौल़ौ तिथ पांदी लमसम 3,000 लौगै बिशवाश कौरा औरौ यीशु कै चैलै बौणै गौवे। तिनुऐ बपतिस्मा लौआ औरौ यरूशलेम कै कलीसिया का हिस्सा बौणै गौवे।

जोबै चौणेयोंदै चैलै तिनुकै शिक्षाएँ दी तौ बिशवाशीए रोज शुणी। सै रोज मिलाया कौरौ थिए औरौ ऐकसाथै खाणौ खांव थिए, औरौ तिनुऐ रोज ऐकी दुजै कारिए प्रार्थना कौरी। औरौ तिनुऐ मिलेबा पौरमेशवरौ कै बौड़ाए कौरे औरौ जू किछै बै तिनकैंई थियु तिनुऐ ऐकी दुजैयारी बांडौ। औरौ नगरौ कै सोबै आदमै तिनकारिए आछौ सुंचौ थिए। रोज, जादा शै जादा लौग बिशवाशी बौणदै लागै।