45. स्तिफनुस औरौ फिलिप्पुस

आगल़े मसीही नेतांव मुंजी स्तिफनुस नांव का ऐक मौरद थिया। सोबै लौग तैसका आदर कौरौ थिए। पवित्र आत्माए तैसी कै बौरिशी शोकते औरौ बुध्दि दैए राए थै। स्तिफनुसै बौरिशै चोमत्कार कौरे राए थिए। जोबै तैणै यीशु पांदी भौरोशा कौरणौ कै बारै मुंजी शिक्षा दै तौ बौरिशै लौगै तैसपांदी बिशवाश कौरा।

ऐकी दुसै, स्तिफनुसै यीशु कै बारै मुंजी शिक्षा दैए लौए थै, औरौ किछै ऐशणै यहूदी लौग औऊंवे जिनुऐ यीशु पांदी बिशवाश ना कौरे रैई थी औरौ तैसियारी भैसबाजै कौरणै शुरू कौरे। सै बैजाए गुस्सै हौए गौवे, इथकारिए सै धरमी नैता कै धौरे हौटे औरौ तैसकै बारै मुंजी झूठौ बौल़ौ। तिनुऐ बौल़ौ, “आमुऐ स्तिफनुस कै मूसा औरौ पौरमेशवर कै बारै मुंजी बुरी बातौ बुलुदिए बैई शौणै राए!” इथकारिए धरमी नेताऐ स्तिफनुस कै उंडा पाकड़ा औरौ तैसीकै महा यहूदी पुरोहितौ कैंई औरौ यहूदी लौगौ कै औकी नेता कैई लौए गौवे। हौजौ बै झूठै गवाह औवे औरौ तिनुऐ स्तिफनुसौ कै बारै दो झूठौ बौल़ौ।

महा यहूदी पुरोहितै स्तिफनुसौ कैईदौ पूछु, “का तिनु लोगै तैरे बारै मुंजी साचौ बौल़े लौ?” स्तिफनुसै महा यहूदी पुरोहितौ कै जबाब दैणौ कारिए बौरिशी बातौ बुल़णी शुरू कौरे दी। तैणै बौल़ौ कै अब्राहम कै सौमय दौऊंडै यीशु कै सौमय तौड़ी पौरमेशवरै इस्राएल कै लोगौ कारिए बौरिशै अनोखै काम कौरे। पौरौ लोगै होमेशा पौरमेशवर कै आज्ञा ना मानी। स्तिफनुसै बौल़ौ, “तुऐं पौरमेशवर कै खिलाफ हठीले औरौ बुरू कौरणौ वाल़ै लोग औसौ। तुऐं कौलौंई बै पवित्र आत्मा कै औपनैई ना, जैशैकै अमारै पुराणियाए होमेशा पवित्र आत्मा कै ना औपनैई औरौ होमेशा पौरमेशवरौ की बातौ बौताणौ वाल़ै कै मारै दिए थिए। पौरौ जू तिनुऐ कौरे राए थियु तुऐं तिनंदु बै बुरू कौरौ! तुऐं मसीह कै मारै दिया!”

जोबै तिनु धरमी नेताऐ ऐजौ शुणु, तौ सै इशैक गुस्सै हौए गौवे कै तिनुऐ आपणै कान बौन्द कौरे दिए औरौ जौरौ की लेरो मारी। तिनुऐ स्तिफनुस कै झिड़यों नगरौ पौरेशा बायरै निया औरौ तैसी मारणौ कारिए पात्थर टिपे औरौ तैसीकै पात्थरौ लैई मारा।

जोबै स्तिफनुस मौरदा लाग रौआ थिया, तैणै जौर शै बौल़ौ, “ ओए रै यीशु, मैरे आत्मा कबूल कौर!” तोबै सै आपणै घुन्डु नियुड़ाऐबा ऊदा रिड़ा औरौ ओटेयो जौर शै बौल़ौ, “औए रै प्रभु, ऐजा पाप तिनपांदी नै लाया।” तोबै सै मौरे गौआ।

तैसी दुसै, यरूशलेम शहर दै रौणौ वाल़ै बौहितै लोगै यीशु कै शिक्षा मानणौ वाल़ै कै सौताणै शुरू कौरे दिए, इथकारिए बिशवाशी लौग औकी ठांव दै भागै गौवे। पौरौ इथकै बावजूद बै, जिथै कौथी बै सै हौटे तिनुऐ यीशु कै बारै मुंजी प्रचार कौरा।

फिलिप्पुस नांव का आदमी यीशु का ऐक बिशवाशै थिया। जैशैकै औकी बौरिशै विशवासीए कौरे राए थियु सै बै यरूशलेम पौरेशा दौड़े गौआ सै सामरिया गांव दा हौटा तैणै तिथै लौगौ कै यी‌शु कै बारै मुंजी प्रचार कौरा। बोहितै लौगै तैसपांदी विशवास कौरा औरौ मुकतै पाए। ऐक दुस, फिलिप्पुसौ कै धौरे पौरमेशवर कै ढौबौशा ऐक स्वर्गदूत औऊंवा औरौ तैसी कै जौंगलो पुंडौ जाणौ कारिए, औरौ ऐकी शौड़कै पांदी हांडणौ कै बौल़ौ। फिलिप्पुस तिथै हौटे गौआ। जोबै सै तियौं शौकड़ै पुंडा हांडे रौआ थिया, तौ तैणै ऐकी आदमी कै आपणै रथौ पांदी जांदिए बैई दैखा। ऐजा आदमै कूश देश का ऐक खास ओधिकारी थिया। पवित्र आत्माएं फिलिप्पुस कै बौल़ौ, कै जाऐबा तैसी आदमीआरी हांड।

इथकारिए फिलिप्पुस रथौ कै धौरे हौटा। तैणै शुणु कै तैसी कूशी आदमीए पौरमेशवर का वचन पौढ़े लौआ थिया। जू यशायाह पौरमेशवरौ की बातौ बौताणौ वाल़ै लैखै राए थिया तैणै तिथु पौढ़े लौ थियु। तैणै ऐजा बचन पौढ़े लौवा थिया, “तिनुऐ तैसी कै बौल़ि कौरणौ वाल़ै भेड़ौ कै जैशणा आगु निया, औरौ जैशैकै ऐक गाबटु मेसौ रौंव, तैशैकैई यीशुऐ बै ऐक आखर ना घाड़ी। तिनुऐ तैसीयारी बुरा बरताव कौरा औरौ तैसका आदर ना कौरी। तिनुऐ तैसीकै मारे दिया।”

फिलिप्पुसै तैसी कूशी आदमी कैईदु पूछु, “जू तौंऐ पौढ़े लौ का तू तिथु बै सौमझै? तैसी कूशी आदमीए जबाब दिया, “ना। जांव तौड़ी कुणिए इथु मौखै सौमझांव ना, तांव तौड़ी हांव इथु सौमझै ना सौकुं। ढाल ऐ मैरे धौरे आऐबा बौठ। यशायाह ऐजौ आपणै बारै मुंजी लिखै लौ थियु या कौसी औकी कै?”

फिलिप्पुस रथौ पांदी बौठे गौआ। तोबै तैणै तैसी कूशी आदमी कै सैजौ बौतौऊं जू यशायाहै यीशु कै बारै मुंजी लिखै राए थियु। फिलिप्पुसै पौरमेशवरौ कै वचन कै बौरिशै औकी भागौ कै बै चौर्चा कौरे। ऐशैकै, तैणै तैसी आदमी कै यीशु कै बारै मुंजी सुसमाचार शुणौऊंआ।

फिलिप्पुस औरौ सैजा कूशी हांडदै-हांडदै पाणी कै धौरे पौंईचै। औरौ तैसी कूशी आदमीए बौल़ौ, “दैख! इथै पाणी औसौ! का हांव बपतिस्मा लौए सौकू?” औरौ तैणै सारथी कै रथ रौकणौ कारिए बौल़ौ।

औरौ सै पाणी मुंजी हौटे, औरौ फिलिप्पुसै तैसी कूशी आदमी कै बपतिस्मा दिया। जोबै सै पाणी पौरेशै बायरै औऊंवे, तोबै पवित्र आत्मा ऐकदम शै फिलिप्पुस कै टिपेयों कौसी औकी ठांव दा निया औरौ ऐकदम शै सै तैसी कूशी आदमी कैंईदा हांएचै गौआ। औरौ तिथै फिलिप्पुस लौगौ कैंई यीशु कै बारै मुंजी बौतांदा रौआ।

सैजा कूशी आदमै आपणै घौरौ कै यात्रा पांदी आगु हौटा। सै खुशी थिया कै सै ऐबै यीशु कै जाणौ थिया।