46. पौलुस मसीही बिशवासी बौणै जांव

शाऊल नांव का ऐक आदमै थिया जैणै यीशु पांदी बिशवाश कौरा। जोलो सै जवान थिया, तोबै तैणै स्तिफनुस कै मारणौ वाल़ै लौगौ कै खौटणौ कै दैखभाल कौरे राए थै। बाद मे, तैणै बिशवाशी कै सौताए राए थिए। तैणै यरूशलेम दै घौर-घौर जाऐबा मौरदौ औरौ बैटमाणिशौ कै बानैबा कौयदखाने दै पाए दिए। तोबै महा यहूदी पुरोहितै शाऊल कै दमिश्क नगर दै जाणौ कै इजाजत दै। तैणै तिथै कै मसीह लौगौ कै बानैबा औरौ तिनुकै पाछु यरूशलेम शहर दै लाणौ कारिए शाऊलौ कै बौल़ौ।

औरौ शाऊलै दमिश्क नगर जाणौ कै यात्रा शुरू कौरे। तैसी नगरौ दा पौऊंचणौ दा दैणिक औगौड़ियौ, तैसकै चौऊ ढौबौ कै गौयणै पौरेशौ ऐक झमाकैदार पैयाशौ चोमकौ, औरौ सै जौमीनौ पांदी रिड़े गौआ। शाऊलै कौसी कै बुलदिए बैई शुणा, “ओए रै शाऊल! औए रै शाऊल! तूऐं मौखै काए सौताए लौआ?” शाऊलै पूछु, “औए रै प्रभु, तू कुण औसौ?” यीशुऐ तैसी कै जबाब दिया, “हांव यीशु औसौ। तौंऐ मौखै सौताए लौआ!”

जोबै शाऊल खौड़ा हौआ तौ सै दैखै नी सौकौ थिया। तैसकै दौस्त तैसीकै दमिश्क शहर दा लौए गौवे थिए। शाऊलै ती दुसौ तौड़ी ना किछै खैई ना पी।

दमिश्क शहर दा हनन्याह नांव का ऐक चैला थिया। पौरमेशवरै तैसीकै बौल़ौ, “तैसी घौरे कै जा जिथै शाऊल रौके रौआ थिया। आपणै हाथ तैसपांदी राख ताकि सै ओटेयो दैखदा लागौ।” पौरौ हनन्याहै बौल़ौ, “ओए रै प्रभु, मौंऐ शौणै राए कै ऐसी आदमीए बिशवाशियो कै कैशैकै सौताए राए।” पौरमेशवरै तैसी कै जबाब दिया, “जा! मौंऐ तैसीकै यहूदियो मुंजी औरौ औकी जाति कै लौगौ मुंजी मैरे नांव कै घौषणा कौरणौ कारिए चौणै राखा। सै मैरे नांव कारिए बैजाए दुख सौंहदा।”

औरौ हनन्याह शाऊल कै धौरे हौटा, आपणै हाथ तैसपांदी राखै, औरौ बौल़ौ, “यीशु, जू इथै आणौ दा आगै ताखै बाटौ पुंडा भैटिया, तैणै मौखै तैरे धौरे छाड़ै राए ताकि तू ओटेयो दैखदा लागै, औरौ पवित्र आत्मा तांदा सोमाय जांव।” तौलौंई शाऊल ओटेयो दैखदा लागा, औरौ हनन्याहै तैसी कै बपतिस्मा दिया। तोबै शाऊलै खाणौं खौऊ औरौ ओटेयो जान पाए।

तौलौंई, शाऊलै दमिश्क शहर दै रौणौ वाल़ै यहूदी लोगौ मुंजी प्रचार कौरणा शुरू कौरे दिया। “ यीशु ही पौरमेशवर का बैटा औसौ!” यहूदी लौग हैरान थिए, जिथुकै शाऊलै तौ बिशवाशी लौगौ कै मार दैणौ कै कौशिच कौरे राए थै, पौरौ ऐबै तैणै यीशु पांदी बिशवाश कौरा। शाऊलै यहूदी लौगौ कै साथै भैसबाजी कौरे। तैणै साबित कौरौ कै यीशु ही मसीह थिया।

बौहितै दुसौ कै बाद, यहूदी लौगै शाऊलौ कै मार दैणौ कै तरकीब बाणै। तिनुऐ तैसी मार दैणौ कारिए नगरौ कै कवाड़ौ पांदी लौगौ कै छाड़े। ताकि तैसपांदी नोजर राखियो पौरौ शाऊलै तिनकी तरकीबौ कै शौणै पाए, औरौ तैसकै दोस्तै तैसी बौचणौ कारिए तैसकै मोदद कौरे। ऐक रात तिनुऐ तैसी कै टोकरी दा बौठाल़ेबा नगरौ कै दीवारौ पौरेशा तैसी ऊदा निकाल़ा। दमिश्क शहर पौरेशा बौचेबा आगु जाणौ कै बाद शाऊल यीशु कै बारै दा प्रचार कौरदा रौआ।

शाऊल चौणैयोंदै चैलै कै भैटिणौ कारिए यरूशलेम शहर दा हौटा, पौरौ सै तैसी दै डौरौ थिए। तोबै बरनबास नांव का ऐकी बिशवाशीए शाऊलौ कै चौणैयोंदै चैलै कै धौरे निया। तैणै तिनुकैंई बौतौऊं कै शाऊलै कैशैकै हिम्मत कै साथै दमिश्क दा प्रचार कौरे राए थिया। तिथकै बाद, चौणैयोंदै चैलै शाऊलौ कै आपीआरी मिलाए दिया।

किछै बिशवाशी जू यरूशलेम शहर पौरेशै सौताव कै डौरौ कै दौड़े गौवे थिए सै दूर अंताकिया नगर दै हौटे गौवे थिए औरौ यीशु कै बारै मुंजी प्रचार कौरौ थिए। अंताकिया दै रौणौ वाल़ै लौग जादातर यहूदी लौग ना थी, पौरौ आगल़े बैई, तिनमुंजी दै बौरिशै लौग बिशवाशी बौणै गौवे। बरनबास औरौ शाऊल इनु नौऐं बिशवाशी लोगौ कै यीशु कै बारै मुंजी जादा शिखाणौ कारिए तिथै हौटे औरौ कलीसिया कै मोजबूत कौरे। यीशु पांदी बिशवाश कौरणौ वाल़ै आगल़े बैई अंतकिया शहर दे ही “मसीही” बौल़े गौवे।

ऐक दुस, अंताकिया कै मसीही लौग उपवास कै साथै प्रार्थना कौरे लौए थै। पवित्र आत्माए तिनुकै बौल़ौ, “मौ कारिए बरनबास औरौ शाऊलौ कै तैसी काम कौरणौ कारिए जौई कौरो जिथु कारिए मौंऐ तिनुकै बौएदै राए।” इथकारिए अंतकिया कै कलीसियाए बरनबास औरौ शाऊल कारिए प्रार्थना कौरे औरौ तिनपांदी आपणै हाथ राखै। तोबै तिनुऐ तिनुखै औकी कोंई ठांव पांदी यीशु कै बारै मुंजी सुसमाचार का प्रचार कौरणौ कारिए छाड़ै दिए। बरनबास औरौ शाऊलै जौई-जौई जाति कै लोगौ कै शिक्षा दै, औरौ बौरिशै लौगै यीशु पांदी बिशवाश कौरा।