47. फिलिप्पी शहर दै पौलुस औरौ सीलास
जोबै शाऊलै पुरै रोम देश दै यात्रा कौरे तौ तैणै आपणै रोमी नांव “पौलुस” का इस्तेमाल कौरणा शुरू कौरे दिया। ऐक दुस, पौलुस औरौ तैसका दोस्त सीलास फिलिप्पी नगर दै यीशु कै बारै मुंजी सुसमाचार शुणाणौ कारिए हौटे। सै नगरौ कै बायरै नौदी कै किनारै ऐकी ठाँव पांदी हौटे जिथै लौग प्रार्थना कौरणौ कारिए कौठे थिए। तिथै सै लुदिया नांव कै ऐकी बैटमाणिशवारी भैटिए जू ऐक बौएपारै थै। सै पौरमेशवरौ वारी प्यार कौरौ थै औरौ तैसकै आराधना कौरौ थै।
पौरमेशवरे लुदिया कै यीशु कै बारै मुंजी सौंदेश पांदी बिशवाश कौरणौ कै लायक बाणै। पौलुस औरौ सीलासै तियों औरौ तियारैं कुड़बियाले कै बपतिस्मा दिया। तियैं पौलुस औरौ सीलासौ कै आपणै घौरे टिकणौ कारिए हाएड़ै कौरे, इथकारिए सै तिथै टिकै गौवे।
पौलुस औरौ सीलास लौगवारी जादातर तैसी ठांव पांदी भैटेया कौरौ थिए जिथै यहूदी लौग प्रार्थना कौरेया कौरौ थिए। रोज जोबै सै तिथै जाया कौरौ थिए तौ ऐक गुलाम बाईटी जियौं दै दुष्टआत्मा थै सै तिनका पीछा कौरेया कौरौ थै। इयौं दुष्टआत्मा कै जरिए सै लौगौ कै हौणौ वाल़ी बातौ बौतांव थै, इथकारिए सै हौणौ वाल़ी बातौ बौताऐबा आपणै मालिकौ कारिए बौरिशै पौयसै कौमाया कौरौ थै।
तिनकै जांदिए बैई ऐजै दासी बाईटै जोर दैएबा बौल़ौ थै, “ऐजै मौरद सौबीदै बौड़े पौरमेशवर कै सेवक औसौ। इनुऐ तुऔं कै मुकते पाणौ कै बाट बौताए लौए!” सै रोज ऐशैकै कौरेया कौरौ थै जिथलैई कै पौलुस नाराज़ हौए गौआ।
आखरी दे, ऐक दुस जोबै तियों बाईटिए जोर शै बोलणो शुरु कोरो, तौ पौलुसै तिंयारै ढौबौ फिरेबा तिंयारै बीतरौ दी दुष्टआत्मा कै बौल़ौ, “यीशु कै नांव शै इयौं पौरेशै आगु जा।” तौलौंई तियैं दुष्टआत्माएं तियौं कै छौड़े दै।
तियौं बाईटी कै मालिक बैजाए गुस्सै हौए गौवे। तिनुकै पौता चालै गौआ कै तियों दुष्टआत्मा बिना सैजै दासी बाईटी लौगौ कै हौणौ वाल़ी बातौ ना बौताए सौकौ। इथका मतलब थिया कै लौग ऐबै तियारैं मालिकौ कै पौयसै ना दैंदे कै सै तिनुकै हौणौ वाल़ी बातौ बौतांव कै तिनकै साथै का हौंदौ।
इथकारिए तियौं गुलाम बाईटी कै मालिकै पौलुस औरौ सीलासौ कै रोमी ओधिकारी कैई निये। तिनुऐ पौलुस औरौ सीलासौ कै पीटे, औरौ तोबै कौयदखाने दै पाए दिए।
तिनुऐ पौलुस औरौ सीलासौ कै कौयदखाने कै ऐशणै ठांव दै राख राए थिए जिथै सौबीदै जादा सिपाही थिए। इथै तौड़ी कै तिनुऐ तिनकै लातौ कै लाकड़ी कै बौड़े गेली दै बानै दिए। पौरौ पौलुस औरौ सीलास आधीए राते, पौरमेशवरौ कै बौड़ाई कै गीत गाए लौवे थिए।
ऐकदम शै, ऐक खतरनाक भौईचोल़ औऊ! कौयदखाने कै सोबै द्वार खौले गौवे, औरौ सौबी कौयदी की शांगुली खोलेबा उदी छुटी।
तोबै दरोगा ऊबा बिज़ा। तैणै दैखौ कै कौयदखाने कै द्वार खौलेयोंदै औसौ। तैणै सुंचु कै सोबै कौयदै बौचेबा दौड़े गौवे। सै डौरे गौआ कै तिनकै दौऊंड़नो की बौजेह शै रोमी ओधिकारी तैसी कै मारे दैंदे, इथकारिए सै आपी कै मार दैणौ कारिए तैयार हौए गौआ! पौरौ पौलुसै तैसी दैखेबा धाव मारे, “रौक जा! आपी कै नुकसान नै पौंईचा। आमै सोबै इथै औसौ।”
तैसी दोरोगाए कामणैबा पौलुस औरौ सीलासौ कै धौरे आऐबा पूछु, “मोकते पाणौ कारिए हांव का कौरू?” पौलुसै जबाब दिया, “प्रभु यीशु मसीह पांदी बिशवाश राख, तौ तू औरौ तैरा कुड़बा मोकते पांदा।” तोबै सैजा दोरोगा पौलुस औरौ सीलासौ कै आपणै घौरे लौए गौआ औरौ तिनकै घाव धौवे। पौलुसै तिनकै घौरौ कै सौबी लौगौ कै यीशु मसीह कै बारै मुंजी सुसमाचार शुणौऊंआ।
दोरोगा औरौ तैसकै सौबी कुड़बै यीशु पांदी बिशवाश कौरा, इथकारिए पौलुस औरौ सीलासै तिनुकै बपतिस्मा दिया। तोबै दोरोगाए पौलुस औरौ सीलासौ कै खाणौं खियौंऊ, औरौ तिनुऐ ऐक साथै खौशै मौनाए।
औक दुसै नगरौ कै नेताए पौलुस औरौ सीलासौ कै कौयदखाने पौरेशै आज़ाद कौरे दिए औरौ फिलिप्पी शहर पौरेशै आगु जाणौ कारिए बौल़ौ। पौलुस औरौ सीलास लुदिया औरौ किछै औकी दोस्तवारी भैटिए औरौ तिथकै बाद नगरौ पौरेशै आगु हौटे। औरौ यीशु कै बारै मुंजी सुसमाचार शुणौऊंआ, औरौ कलीसिया बौढ़दै रौए।
पौलुस औरौ ओकी मसीही नेताऐ बोहितै नगरो कै यात्रा कौरे। तिनुऐ लोगों कै यीशु कै बारै मुंजी सुसमाचार शुणौऊंआ। तिनुऐ कलीसिया कै विशवासियों कै हिम्मत दैणौ औरौ शिक्षा देणो कारिए बौरिशी चिट्ठी बै लिखी तिनमुंजी दी कुणजी चिट्ठी बाइबल की किताबौ बोणै गौई।
प्रेरितों के काम 16:11-40 पौरेशै बाइबल कै ऐक काहाणै
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।