48. यीशु ही वादा कौरेयोंदा मसीह औसौ
जोबै पौरमेशवरै दुनिया बाणै तौ सोबै ठुँ ठीक थियु। कुणिए बै पाप नै कौरौ थिए। आदम औरौ हव्वा ऐकी दुजीयारी प्यार कौरौ थिए, औरौ सै पौरमेशवर आरी प्यार कौरौ थिए। कुणजै बीमारी औरौ मौत नै थी। पौरमेशवर ऐशणै दुनिया चांव थिया।
शैतानै शौंगौऊ कै जोरिए बागौ दै हव्वा आरी बातौ कौरी, जिथुकै सै तियौं कै धौखा दैणा चांव थिया। तोबै हव्वा औरौ आदमै पौरमेशवर कै खिलाफ पाप कौरा। तिनकै पाप कौरणौ की बौजेह शै धौरती पांदी रौणौ वाल़ै सौबी आदमी पांदी मौत आवं।
जिथुकै आदम औरौ हव्वाए पाप कौरे राए थिया, इथकारिए किछै हौजौ बै बुरु हौ। सै पौरमेशवर कै दुशमन बौण गौवे। जिथकी बौजेह शै, तौलौ दौऊंडे हरेक आदमीए पाप कौरे राए। सोबवें जौणै जन्म दौऊबै पौरमेशवर कै दुशमन औसौ। पौरमेशवर औरौ लौगौ कै बीच शान्ते ना आथी। पौरौ पौरमेशवर शान्ते बाणाणै चांव थिया।
पौरमेशवरै वादा कौरा कै हव्वा कै ऐक पीढ़ी शैतान कै मुंडौ कै पिचकला। तैणै ऐजौ बै बौल़ौ कै शैतान तैसकै फाएनै दा डंक मारला। इथका मतलब औसौ कै, शैतान मसीह कै मार दैंदा, पौरौ पौरमेशवर तैसीकै ओटेयो जियुंदी कौरे दैंदा। इथकै बाद, मसीह शैतान की शौकती कै होमेशा कारिए खत्म कौरे दैंदा। कैई सालौ कै बाद, पौरमेशवरै प्रकट कौरौ कै सैजै पीढ़ी मसीह यीशु औसौ।
आदम औरौ हव्वा कै बाद पीढ़ी दर पीढ़ी पाप बोड़दा गौआ औरौ पौरमेशवरै बाढ़ भैजियो लोगो कै सोजा दै। पौरो पौरमेशवरै तियौं बाढ़ौ पौरेशै आपणै कुड़बै कै बौचौऊंऐ जू तैणै धोरती पांदी लाए। तैणै नूह कै ऐक जाहज बाणणौ कारिए बौल़ौ औरौ ऐशैकै पौरमेशवरै तिनु लौगौ कै बौचौऊंऐ जू तैसपांदी बिशवाश कौरौ थिए। ऐशैकैई, ऐलो बै सोब जौणै पौरमेशवर कै सजा कै लायक औसौ जिथुकै सोबिए पाप कौरे राए। पौरौ पौरमेशवरै आमु सौबी कै बौचाणौ कारिए यीशु कै छाड़ा जू तैसपांदी बिशवाश कौरौ।
सैकड़ौ सालौ तौड़ी, पुरोहित पौरमेशवर कारिए बोलिदान चौढ़ांदै रौवे। औरौ ऐजौ दिखांव कै लौगै पाप कौरे राए, औरौ ऐजौ कै सै पौरमेशवर कै द्वारा तिनुकै सजा दैणौ कै लायक थिए। पौरौ सैजै बोलिदान तिनकै पापौ कै माफ ना कौरे सौकौ। यीशु सौबीदा बौड़ा महा यहूदी पुरोहित औसौ। तैणै सैजौ कौरौ जू कुणिए पुरोहित ना कौर सौकौ थिया। तैणै बोलिदान हौणौ कारिए आपी कै दैए दिया जू सौबी कै पापौ कै मिटाए सौकौ। तैणै मानै पौऊं कै पौरमेशवर तिनु सौबी कै पापौ कारिए यीशु कै सजा दैंदा। इथकारिए, यीशु सिध्द महा यहूदी पुरोहित औसौ।
पौरमेशवरै अब्राहम कै बौल़ौ, “हांव तैरे द्वारा दुनिया कै सौबी पीढ़ी कै आशीष दैंदा।” यीशु ऐसी अब्राहम कै पीढ़ी का थिया। पौरमेशवर अब्राहम कै जोरिए सौबी पीढ़ी कै आशीष दैंव, जिथुकै जू यीशु पांदी बिशवाश कौरौ पौरमेशवर तिनु सौबी कै पापौ शै बौचांव। जोबै ऐजै लौग यीशु पांदी बिशवाश कौरौ, तौ पौरमेशवर तिनुकै अब्राहम कै संतान मानौ।
पौरमेशवरै अब्राहमौ कै बौल़ौ कै तू आपणा सौरा बैटा, मौ कारिए बलिदान कौरे दै। पौरौ ओटेयो पौरमेशवरै इसहाक कै बौदल़े बोल़ि कौरणौ कारिए ऐक गाबटु दियु। आमै सोबै आपणै पापौ कारिए मार दैणौ कै लायक थिए! पौरौ पौरमेशवरै अमारै ठाँव पांदी मौरणौ कारिए यीशु कै बोल़िदान कै रूपौ दा दिया। इथकारिए आमै यीशु कै पौरमेशवर का गाबटु बुलु।
जोबै पौरमेशवरै मिस्र देश पांदी आखरी समस्या छाड़े तौ तैणै सौबी इस्राएली कुड़बै कै बौल़ौ कै सै ऐकी गाबटु कै बोल़ि कौरौ। तैसी गाबटु दा कुणजाई दोष नी हौणा चैंई। तोबै तिनुकै आपणै द्वारौ कै चौखट पांदी औरौ दु ढोबो तिथकौ खून लाणौ थियु। जोबै पौरमेशवरै सैजा खून दैखा तौ तैणै तिनकै घौर छौड़े दिए औरौ तिनकै जैठै बैटे कै ना मारी। जोबै ऐजौ हौ तौ पौरमेशवरै इथुकै फसह कौ तैयार बौल़ौ।
यीशु फसह कै ऐकी तैयारौ कै गाबटु कै जैशणा औसौ। तैणै कौलौंई पाप ना कौरी, इथकारिए यीशु दौ किछै बै गोलत नै थी। सै फसह कै तैयारौ कै सौमय पांदी मौरा। जोबै कुणिए यीशु पांदी बिशवाश कौरौ, तोबै यीशु का लौऊ तैसी आदमी कै पापौ कै कीमत चुकांव। ऐजौ ऐशैकै औसौ जैशैकै पौरमेशवर तैसी आदमी कै धौरौ दा औगौड़ियौ हौटे गौआ, जिथुकै सै तैसी कै सजा ना दैंव।
पौरमेशवरै इस्राएली लौगौ कै साथै ऐक कौरार कौरा, जिथुकै सै ऐशणै लौग थिए जिनुकै पौरमेशवरै आपणै हौणौ कारिए चौणै राए थिए। पौरौ ऐबै पौरमेशवरै ऐक ऐशणा कौरार कौरे राए जू कै सौबी कारिए औसौ। जै कुणिए बै जाति का कुणजाई बै आदमै ऐसी नौऐ कौरारौ कै औपनांवे, तौ सै पौरमेशवरौ कै लौगौ मुंजी मिले जांव। सै ऐशैकै इथकारिए कौरौ जिथुकै सै यीशु पांदी बिशवाश कौरौ।
मूसा ऐक ऐशणा पौरमेशवरौ की बातौ बौताणौ वाल़ा थिया तैणै पौरमेशवर कै वचन का बौड़ी शोकती कै साथै प्रचार कौरा। पौरौ यीशु सौबी पौरमेशवरौ की बातौ बौताणौ वाल़ै दा बौड़ा औसौ। सै पौरमेशवर औसौ, इथकारिए जू किछै बै तैणै कौरे राए औरौ बौल़े राए सै पौरमेशवर कै काम औरौ वचन थिए। इथकारिए पवित्र-शास्त्र यीशु कै पौरमेशवर का वचन बौल़ौ।
पौरमेशवरै राजा दाऊद आरी वादा कौरे राए थिया कै राजा कै रूपौ दा तैसकै पीढ़ी का ऐक संतान पौरमेशवर कै लौगौ पांदी सदा कारिए राज कौरदा। यीशु पौरमेशवर का बैटा औरौ मसीह औसौ, इथकारिए सै राजा दाऊद कै पीढ़ी का औसौ जू सदा कारिए राज कौरे सौकौ।
दाऊद तौ इस्राएल का राजा थिया, पौरौ यीशु पूरै दुनिया का राजा औसौ! सै ओटेयो आंदा औरौ सदा कारिए न्याय औरौ शान्ती कै साथै आपणै राज्य पांदी राज कौरदा।
उत्पत्ति 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 पौरेशै बाइबल कै ऐक काहाणै
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।