49. पौरमेशवरौ का नौवाँ कौरार

ऐकी स्वर्गदूतै जवान बैटमाणिश मरियम कै बौल़ौ कै सै पौरमेशवर कै बैटे कै जन्म दैंदे। सै इबी कुँवारी थै, पौरौ पवित्र आत्मा कै शोकती शै तिंयारै हौल़किणौ हौ। तियैं ऐकी बैटे कै जन्म दिया जैसकौ नांव तियैं यीशु राखौ। इथकारिए, यीशु पौरमेशवर औरौ आदमै दुईनै औसौ।

यीशुऐ भोरिशै चमत्कार कौरे जू दिखांव कै सै पौरमेशवर औसौ। सै पाणी पांदी हांडा औरौ आँधी तूफान शान्त कौरौ। तैणै बौरिशै बीमार लौगौ कै ठीक कौरे औरौ बौरिशै लौगौ पौरेशी दुष्टआत्मा कै बांईडी घाड़ी। तैणै मौरेयोंदै लौगौ कै जियुंदी कौरे दिए, औरौ तैणै पांची रोटी औरौ दु माछी लैई 5,000 लौगौ कै खाणौं खियाणौ कारिए दैणी शौ खाणौ सौबी कै सौंटोए दियुं।

यीशु ऐक महान गुरु बै थिया। जू किछै बै तैणै शिखौऊं, सैजौ तैणै साफ तरीकै शै शिखौऊं। जू सै लौगौ कै कौरणौ कारिए बौल़ौ सैजौ तिनुकै कौरणौ चैंई जिथुकै सै पौरमेशवर का बैटा औसौ। उदारण कारिए, तैणै शिखौऊं कै औकी लौगौ कै बै तैशैकैई प्यार कौरणौ कै जौरूरत औसौ जैशैकै तुऐं आपीयारी प्यार कौरौ।

तैणै ऐजौ बै शिखौऊं कै तुऔं सौबी चीजौ दौ जादा औरौ आपणै जायदात दै जादा पौरमेशवर आरी प्यार कौरणा चैंई।

यीशुऐ बौल़ौ कै दुनिया दै कुणजै बै चीज़ पाणौ दौ जादा आछौ ऐजौ औसौ कै आमै पौरमेशवर कै राज्य दै हौऊं। तैसकै राज्य दौ जाणौ कारिए जौरूरी औसौ कै पौरमेशवर तुऔं कै तौंवारै पापौ शै बौचांव।

यीशुऐ बौल़ौ कै दैणिक ही लौग तैसी कै औपनांदै। पौरमेशवर तिनु लौगौ कै बौचांदाए। पौरौ औके लौग तैसी कै औपनांदै ना। तैणै ऐजौ बै बौल़ौ कै किछै लौग कामकै जौमीनौ कै जैशणै औसौ, जिथुकै सै यीशु कै बारै मुंजी सुसमाचार कै औपनाएं पांव, औरौ पौरमेशवर तिनुकै बौचांवऐ। पौरौ किछै लौग बाटौ कै शौकरैड़े जौमीनौ कै जैशणै औसौ। पौरमेशवर का वचन बीजौ कै जैशणा बाटौ पुंडा छुटौ, पौरौ तिथै किछै बै जामौ ना। ऐजै लौग यीशु कै बारै मुंजी सुसमाचार कै औपनांव ना। औरौ ऐजै तैसकै राज्य दै जाणौ शै मौना कौरे दैंव।

यीशुऐ शिखौऊं कै पौरमेशवर पापियारी बैजाए प्यार कौरौ। सै तिनुकै माफ कौरेणे चांव औरौ तिनुकै आपणै संतान बाणणै चांव।

यीशुऐ ऐजौ बै बौतौऊं कै पौरमेशवर पाप शै नफरत कौरौ। जिथुकै आदम औरौ हव्वाऐ पाप कौरा, इथकारिए तिनकी सौबी पीढ़ीऐ बै पाप कौरा। ऐसी दुनिया दा रौणौ वाल़ा हरेक आदमै पाप कौरौ औरौ पौरमेशवर कैंईदा दूर औसौ। हरेक आदमै पौरमेशवर का दुशमन औसौ।

पौरौ पौरमेशवरै इयौं दुनिया दै रौणौ वाल़ै हरेक आदमी यारी ऐशणा प्यार कौरा: कै तैणै आपणा एकलौता बैटा बै दैए दिया ताकि पौरमेशवर तिनुकै सजा नै दैंव जू तैसपांदी बिशवाश कौरौ। इथकै बजाए, सै तैसकै साथै होमेशा कारिए रौंदै।

तुऐं मौरणौ कै लायक औसौ, जिथकै तुऐं पाप कौरे राए। तुंआरी पौरमेशवर का गुस्सा हौणा जाईज़ औसौ, इथकै बौदल़े, सै यीशु पांदी गुस्सा हौआ। तैणै अमारै बोदल़ै यीशु कै क्रूस कै मौत दैएबा सजा दै।

यीशुऐ कौलौंई पाप ना कौरी, पौरौ तैणै पौरमेशवर कै सजा आपी कै दैणौ दै। तैणै मौर जाणौ पसंद कौरौ। ऐशैकै, तौंवारै पापौ कै औरौ इयौं दुनिया दै रौणौवाल़ै हरेक आदमी कै पापौ का बोझ टिपणौ कारिए सै ऐक सिध्द बोल़िदान थिया। यीशुऐ आपी कै पौरमेशवर कारिए बोल़िदान कौरे दिया। इथकारिए पौरमेशवर कैशणाई बै पाप, इथै तौड़ी कै खतरनाक पापौ कै बै माफ कौरौ।

भोलेई जै तुऐं बौरिशै आछै काम कौरौ, तौ इथलैई पौरमेशवर तुऔं कै ना बौचांदा। तैसका दोस्त बौणणौ कारिए ऐशणौ किछै ना आथी जू तुऐं कौरे सौकौ। इथकै बजाए, तौंवारै बिशवाश कौरणा कै, यीशु पौरमेशवर का बैटा औसौ, औरौ सै तौंवारै बौदल़े क्रूसौ पांदी मौरे गौआ, औरौ ऐजौ बै कै पौरमेशवरै तैसीकै ओटेयो जियुंदी कौरे दिया। जै तुऐं तैसपांदी बिशवाश कौरौ, तौ पौरमेशवर तौंवारै पापौ कै माफ कौरदा।

पौरमेशवर तैसी हरेक आदमी कै बौचांदा जू यीशु पांदी बिशवाश कौरौ औरौ तैसीकै आपणा प्रभु मानौ। पौरौ सै तिनुकै ना बौचांदा जू तैसपांदी बिशवाश ना कौरौ। ऐजौ किछै मायनै ना राखौ कै तुऐं सैठ औसौ या गरीब औसौ, मौरद औसौ या बैटमाणिश औसौ, बूढ़ै औसौ या जवान औसौ या तुऐं कौके रौंव। पौरमेशवर तुआरी प्यार कौरौ औरौ चांवऐ कै तुऐं यीशु पांदी बिशवाश कौरौ कै सै तौंवारा दोस्त बौण सौकौ।

यीशुऐ तुऔं कै बौएदै लौवे कै तैसपांदी बिशवाश कौरौ औरौ बपतिस्मा लौंव। का तुऐं बिशवाश कौरौऐ कै पौरमेशवर का ऐकलौता बैटा, यीशु ही मसीह औसौ? का तुऐं बिशवाश कौरौऐ कै तुऐं पाप कौरे राए औरौ ऐजौ बै कै तुऐं पौरमेशवर कै सजा कै लायक औसौ? का तुऐं बिशवाश कौरौऐ कै तौंवारै पापौ कै मिटाणौ कारिए यीशु क्रूसौ पांदी मौरा?

जै तुऐं यीशु पांदी औरौ जू तैणै तुऔं कारिए कौरे राए तिथपांदी बिशवाश कौरौ, तौ तुऐं ऐक मसीही औसौ! शैतान आपणै इनारै कै राज्य दा ऐबै तुऔं पांदी राज ना कौरौ। ऐबै पौरमेशवर आपणै पैयाशै कै राज्य दा तुऔं पांदी राज कौरौ। तैणै तुऔं कै पाप कौरणौ शै रौके दिए, जू तुऐं कौरेया कौरौ थिए। तैणै तुऔं कै ऐक नौवाँ औरौ सोही जीवन दैए राए।

जै तुऐं ऐक मसीही औसौ तौ जू यीशुऐ कौरे राए तिथकी बौजेह शै पौरमेशवरै तौंवारै पापौ कै माफ कौरे दिए। ऐबै, पौरमेशवर ऐकी दुशमन कै जौगेह तुऔं ऐक दोस्त मानौ।

जै तुऐं पौरमेशवर कै दोस्त औसौ औरौ प्रभु कै सेवक औसौ तौ तुऐं तिनु बातौ कै मानणौ कै इछा कौरदै जू यीशु तुऔं कै शिखांवऐ। भोलैई तुऐं ऐक मसीही औसौ, शैतान इबी बै पाप कौरणौ कारिए तुऔं कै पौरखदाए। पौरौ पौरमेशवर होमेशा सैजौ कौरौ जू सै बौल़ौऐ कै हांव कौरदाए। सै बौल़ौऐ कै जै तुऐं आपणै पाप मानै पांव, तौ सै तुऔं माफ कौरे दैंदा। सै तुऔं कै पाप कै खिलाफ लौड़नौ कै शौकतै दैंदा।

पौरमेशवर तुऔं कै प्रार्थना कौरणौ औरौ तैसकै वचन कै पौढ़नौ कारिए बौल़ौ। सै तुऔं कै औकी बिशवाशी आरी मिलेबा तैसकै आराधना कौरणौ कारिए बै बौल़ौऐ। तुऔं औकी लौगौ कैई बै बौताणौ चैंई कै तैणै तुऔं कारिए का कौरे राए। जै तुऐं इनु सौबी कामौ कै कौरौ, तौ तुऐं तैसकै पाकै दोस्त बौणै जांदै।