50. यीशु पाछु आंदा

लमसम 2,000 सालौ दा ऊंडा, दुनिया कै सौबी ठांव पांदी जादा शै जादा लौगै मसीह यीशु कै बारै मुंजी सुसमाचार शौणै लौआ। कलीसिया बौढ़दै लाग रौए। यीशुऐ वादा कौरे राए कै सै दुनिया कै आखरी सौमय दा पाछु आंदा। भोलैई सै इबी पाछु ना आए रैई, तौबै बै सै आपणै वादै कै पूरा कौरदा।

जोबै कै आमै यीशु कै पाछु आणौ कै ठौल़नाए कौरु, पौरमेशवर आमुवादै ऐशणै जीवन जीणौ कै इछा कौरौ जू पवित्र औसौ जू तैसका आदर कौरौ। जोबै यीशु धौरती पांदी रौंदा लाग रौआ थिया तोबै तैणै बौल़ौ, “मैरे चैलै दुनिया दा सौबी ठाँव कै लौगौ कै पौरमेशवर कै राज्य कै बारै मुंजी सुसमाचार प्रचार कौरदै, औरौ तोबै ओन्त आए जांदा।”

बौरिशी जातिऐ इबी तौड़ी यीशु कै बारै मुंजी ना शौणै रैई। स्वर्ग कै पाछु जाणौ दै आगै, यीशुऐ मसीही लौगौ कै तिनु लौगौ कै सुसमाचार शुणाणौ कारिए बौल़ौ जिनुऐ ऐजौ कौलौंई ना शौणै रैई। तैणै बौल़ौ, “जाओ औरौ सौबी जाति कै लौगौ कै चैलै बौणांव!” औरौ “काटणौ कारिए खेत तैयार होए रौवे!”

यीशुऐ ऐजौ बै बौल़ौ, “कौसी आदमी का सेवक आपणै मालिक दा बौड़ा ना हौंव। इयौं दुनिया कै खास लोगै मौंआरी नफरत कौरे, औरौ मैरी बौजेह शै सै तुऔं कै बै सौतांदै औरौ मारै दैंदे। इयौं दुनिया दै तुऐं दुखी हौंदै, पौरौ आपी कै मजबूत बाणौ, जिथुकै मौंऐ शैतानौ कै हौराए दिया जू इयौं दुनिया पांदी राज कौरौ। जै तुऐं आखरी तौड़ी बिशवाश लायक बौणैयोंदै रौले, तौ पौरमेशवर तुऔं कै बौचांदाए!”

यीशुऐ आपणै चैलै कै ऐजौ सौमझाणौ कारिए ऐक काहाणै शुणाए कै जोबै दुनिया का ओन्त हौंव तौ लौगौ कै साथै का हौंदौ। तैणै बौल़ौ, “कौसी आदमीए आपणै खेतौ दौ आछौ बीज बौं। जोबै सै सौते रौआ थिया तौ तैसका दुशमन औऊंवा औरौ गियुँ कै बीजौ मुंजी जौंगले पौधे कै बीज बौए दिए, औरौ तोबै सै आगु हौटा।”

“जोबै पौधे बौढ़दै लागै तौ सेवकै तैसी आदमी कै बौल़ौ, ‘ओए रै मालिक, तौंऐ तौ आपणै खेतौ दौ आछौ बीज बौए राए थियु। तौ तोबै इंदै जौंगल़े पौधे किथुकै औसौ?’ तैसी आदमीए जबाब दिया, ‘सिरफ मैरा दुशमन ही तिनुकै बौणै चांव थिया। ऐजा मैरा कुणिए दुशमन औसौ जैणै ऐशैकै कौरे राए।’”

“तिनु सेवकै आपणै मालिकौ कै जबाब दिया, ‘का आमु कै जौंगल़े पौधे उपाड़े दैणै चैंई?’ तैणै मालिकै बौल़ौ, ‘ना। जै तुऐं ऐशैकै कौरले तौ तुऐं किछै गियुँ बै उपाड़ै दैंदे। काटाणौ कै सौमय तौड़ी ठौल़नाए कौरौ। तोबै जौंगल़ी पौधे कै गौढे दै कौठे कौरे ताकि तुऐं तिनुकै जौलाए सौकौ। पौरौ गियुँ मैरे कौठारौ दै लियांव।’”

चैलै इनु काहाणी का मतलब नी सौमझी, इथकारिए तिनुऐ यीशु कैंईदै तिनुकै सौमझाणौ कै बेनते कौरे। यीशुऐ बौल़ौ, “कामकौ बीज बौणवाल़ा आदमै यीशु मसीह कै दर्शांव औरौ खेत का मतलब दुनिया औसौ। कामकै बीज का मतलब पौरमेशवर कै राज्य कै लौग औसौ।”

“जौंगल़े पौधे तैसी दुष्ट आदमै, मतलब शैतान कै लौग औसौ। तैसी आदमी का दुशमन शैतान औसौ। जैणै जौंगले पौधे बौए दिए थिए। कौटाए दुनिया का ओन्त औसौ, औरौ कौटाए कौरणौ वाल़ै पौरमेशवरौ कै स्वर्गदूत औसौ।”

“जोबै दुनिया का ओन्त हौंदा तोबै स्वर्गदूत तिनु सौबी लौगौ कै ऐक साथै कौठे कौरदे जू शैतान कै औसौ। सैजै स्वर्गदूत तिनुकै ऐकी बैजाए ताती आगे मुंजी फेरकाए दैंदे। तिथै सैजै लौग खतरनाक सौतांव दै रुंदै औरौ आपणै दांत पीशदै। पौरौ जू लौग धरमी औसौ, जिनुऐ यीशु कौ शुणौ औरौ मानौ, सैजै लोग आपणै पौरमेशवर पिता कै राज्य दै सूरजौ कै जैशणै चोमकौंदे।”

यीशुऐ ऐजौ बै बौल़ौ कै सै दुनिया का ओन्त हौणौ शा आगै धौरती पांदी पाछु आंदा। सै तैशैकैई पाछु आंदा जैशैकै सै हौटे रौआ थिया। यानि, तैसकैंई आदमी का शरीर हौंदा, औरौ सै गौयणै दा बादलो पांदी सवार हौऐबा पाछु आंदा। जोबै यीशु पाछु आला, तौ सोब मसीही लोग जू मौरे गौवे मौरेयोंदै मुंजीदै जियुंदी हौंदे औरौ तैसयारी गौयणै दै भैंटिदै।

तोबै जू मसीही लोग इबी बै जियुंदी औसौ सै गौयण दै ऊबै जांदै औरौ तिनु औकी मसीही लोगवारी मिल जांदै जू मौरेयोंदै मुंजी दै जियुंदी हौए रौवे। सै सोबै यीशु कै साथै हौंदे। तिथकै बाद, यीशु आपणै लौगवारी रौंदा। जोबै सै ऐकसाथै रौले तौ तिनवांगै सदा कारिए पूरै शान्ते हौंदे।

यीशुऐ तैसपांदी बिशवाश कौरणौ वाल़ै हरेक आदमी कै ऐक ताज दैणौ का वादा कौरे राए। सै सदा कारिए पौरमेशवर कै साथै सौबी चीज़ौ पांदी राज कौरदै। तिनकैई होमेशा कै शान्ते हौंदे।

पौरौ पौरमेशवर तिनु सौबी का न्याय कौरदा जू यीशु पांदी बिशवाश ना कौरौ। सै तिनुकै नरकौ दै पाए दैंदा। तिथै सै रुंदै औरौ आपणै दांत पीशदै, औरौ सै होमेशा दुखी रौंदे। औरौ कौलौंई ना हिशणौवाल़ै आग तिनुकै रोज फ़ोकदै रौंदे, औरौ कीड़े तिनुकै होमैशा खांदै रोंदै।

जोबै यीशु पाछु आंव, तौ सै आछा कौरेयो शैतानौ कै औरौ तैसकै राज्य कै खत्म कौरे दैंदा। सै शैतानौ कै नरक दा पाए दैंदा। तिथै शैतान तिनु सौबी कै साथै हौमेशा कारिए जौल़दा रौंदा,जिनुऐ पौरमेशवरौ की बातौ मानणौ कै बजाए शैतानौ कै पौछौड़ियौ हांडणौ का फोयसला कौरे राए थिया।

जिथुकै आदम औरौ हव्वाए पौरमेशवर कै आज्ञा ना मानी औरौ पाप कै ऐसी दुनिया दा लियौऊंआ, पौरमेशवरै तेसी कै शराप दिया औरौ तेसी कै नाश कौरणौ का फोयसला कौरा। पौरौ ऐक दुस पौरमेशवर ऐक नौ स्वर्ग औरौ ऐक नौए धौरती बाणदा जू सिध्द हौंदे।

यीशु औरौ तेसकै लौग तियौं नौए धौरती पांदी रौंदे, औरौ सै सदा कारिए सौबी चीजौ पांदी राज कौरदै। सै लौगौ की आखी पौरेशै सोबै आशु साफ कौरदा। ऐबै कुणिए बै बीमार औरौ दुखी ना हौंदे। सै रुंदै ना। सै बीमार ना हौंदे औरौ मौरदै ना। औरौ तिथै कुणजै बै बुराए ना हौंदे। यीशु आपणै राज्य पांदी न्याय कै साथै औरौ शान्ती कै साथै राज कौरदा। सै होमेशा कारिए आपणै लौगौ कै साथै रौंदा।