1. सिरिस्टी
ई रकम सुरु मेहेन परमेश्वर सउब जिनिस गिला केर सिरिस्टी करलक। ऊ छह दिने संसार केर आर जे कनअय उटाक उपरे आहे उ सउब जिनिस गिला केर सिरिस्टी करलक। परमेश्वर केर दाराय पिरथिबी केर रचना करल बादे उटा आन्धार लेक भरल आर खाली रहे, काहेकि उखन तक परमेश्वर उटाय कनअय जिनिस गिला के नाइ बनाय रहे। किन्तु परमेश्वर केर आत्मा पानी केर उपरे उइड़ बुलत रहे।
फिन परमेश्वर कहलक, “इन्जत हउक!” आर इन्जत हय गेलक। परमेश्वर देखलक कि इन्जत बेस आहे आर उटा के ‘दिन’ कहलक। आर ऊ उटा के आन्धार लेक भिनु करलक जेटा के ऊ ‘राइत’ कहलक। परमेश्वर सिरिस्टी करल केर पहिले दिन मेहेन इन्जत केर रचना करलक।
सिरिस्टी करलक तेकर बादेक दिने परमेश्वर कहलक, “पानी केर उपरे एकटा आँतर हउक।” आर एकटा आँतर हय गेलक। परमेश्वर उ आँतर के “आकाश” कहलक।
तीसर दिने परमेश्वर कहलक, “पानी एक ताहाँ जामा हय जाउक आर सुखल भूँई देखाउक।” ऊ सुखल भूँई टाके “पिरथिबी” कहलक आर पानी के “समुन्दर” कहलक। परमेश्वर देखलक, कि जेटा ऊ बनाय रहे सेटा बेस रहे।
फिन परमेश्वर कहलक, “पिरथिबी सउब किसिम केर गाछ बिरिछ गिला के उगाउक।” आर एसनेइ हलक। परमेश्वर देखलक कि जे गिला ऊ बनाय रहे उ गिला बेस रहे।
सिरिस्टी करे केर चौथा दिने परमेश्वर कहलक, “आकाश मेहेन इन्जत देवइया गिला हउन।” आर सूरुज, चाँद आर तारेया गिला देखा हलयँ। परमेश्वर उ गिला के पिरथिबी मेहेन आलो देक तेहें आर दिन आर राइत, मउसम गिला आर बछर गिलाय अन्तर करेक तेहें बनालक। परमेश्वर देखलक कि जे गिला के ऊ बनाय रहे उ गिला बेस रहे।
पाँचवाँ दिने परमेश्वर कहलक, “जीयँत प्रानी गिला पानीये भइर जाउन आर आकाश मेहेन चरइ गिला उड़ुन।” इ रकम ऊ पानीये पँउरइया सउब जन्तु गिला के आर सभे चरइ गिला के बनालक। परमेश्वर देखलक कि इ गिला बेस रहे आर उ गिला के आसिरबाद देलक।
सिरिस्टी केर छटवाँ दिने परमेश्वर कहलक, “भूँईये रहइया सभे किसिम केर जानवर गिला हउन।” आर परमेश्वर केर कहल मोताबिक एसने हलक। थोड़ेक जानवर गिला पसइया रहयँ, थोड़ेक भूँइये रेंगइया, आर थोड़ेक जंगली जानवर गिला रहयँ। आर परमेश्वर देखलक कि इ गिला बेस रहे।
फिन परमेश्वर कहलक, “आवा हामरे मानुस के निजेक स्वरुप मेहेन आर आपन समानता मेहेन बनाबिक। उमन पिरथिबी मेहेन आर सउब जानवर गिलाय परभुता करबयँ।”
सेतेहें परमेश्वर माटी ले कहन उटा लेक मानुस के बनालक आर उकर मेहेन जीबन केर निनास के फुँइक देलक। उ मानुस टाकेर नाम आदम रहे। परमेश्वर आदम के रहेक तेहें एकटा बड़े निहार बगइचा बनालक आर उटा केर देखभाल करेक तेहें आदम के हुआँ राइख देलक।
उ बगइचा केर माझे परमेश्वर दुइटा खास गाछ गिला के लगालक- जीबन केर गाछ आर बेस बेकार गेयान देवइया गाछ। परमेश्वर आदम के कहलक कि तोयँ उ बगइचा केर जीबन केर गाछ आर बेस बेकार गेयान देवइया गाछ के छोइड़ कहन दसर कनअए गाछ केर फर के खाय पारिस। जदि तोहरे उ गाछ केर फर के खाबा हले तोहरे मइर जाबा।
फिन परमेश्वर कहलक, “पुरुस केर तेहें एकलाइ रहेक बेस ना लागे।” मन्तुक कनअय जानवर आदम केर संगी नाइ हय पालयँ।
सेतेहें परमेश्वर आदम के भरखर निन्द मेहेन निन्दाय देलक। फिन परमेश्वर आदम केर एकटा पन्जरा हाड़ के ले कहन उटा लेक एकटा बेटी छुवा केर रचना करलक आर उके आदम केर पासे ले आनलक।
जखन आदम उके देखलक तो ऊ कहलक, “कम से कम ई तो मोरे जेसन आहे! ई नारी कहाई, काहेकि ई पुरुस लेक बनाल जाय आहे।” एहे चलते पुरुस आपन माँय बाप के छोइड़ देला आर आपन पत्नी केर संगे एक हय जायला।
परमेश्वर पुरुस आर नारी के आपन स्वरुप मेहेन बनालक। ऊ उमन के आसिरबाद देलक आर उमन के कहलक, “बेजाइन बेसी छुवा-पुता आर नाती पोता गिला सिरजावा आर पिरथिबी के भराय देवा।” आर परमेश्वर देखलक कि जे कनअय ऊ बनाय रहे उ गिला बेजाइन बेस रहे, आर ऊ उ सउब गिला लेक बेजाइन खुस रहे। ई सउब गिला सिरिस्टी करे केर छटवाँ दिने हय रहे।
जखन सातवाँ दिन आलक तो जे कनअय परमेश्वर करत रहे उ सउब काम गिला के सिराय देलक। ऊ सातवाँ दिन के आसिरबाद देलक आर उटा के पबितर ठहरालक, काहेकि उ दिन ऊ सउब जिनिस गिला केर सिरिस्टी करेक टा सिराय दे रहे। इ रकम परमेश्वर संसार के आर जे कनअय उटाय आहे से सउब गिला केर सिरिस्टी करलक।
उत्पत्ति अध्याय 1-2 लेक बाइबल केर एकटा कहनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।