2. पाप संसार मेहेन आतेहे
आदम आर उकर पत्नी केर तेहें परमेश्वर केर दाराय बनाल उ सुन्दर बगइचा मेहेन रहत के उमन बेजाइन खुस रहयँ। उमनेक मइधे केअउ लूगा नाइ पिंधत रहयँ, तेअउ इ कथा टा उमनेक लेक केकअउ के लजमी नाइ कइर रहे, काहेकि संसार मेहेन पाप नाइ रहे। उ दुइयो कखनअ कखनअ उ बगइचा मेहेन दाइन बुलत रहयँ आर परमेश्वर संगे कथा करत रहयँ।
लेकिन उ बगइचा मेहेन एकटा साँप रहे। ऊ बेजाइन धूर्त रहे। साँप टा उ बेटी छुवा के पुछलक, “का सतेइ परमेश्वर तोहरे के इ बगइचा केर कनअय गाछ केर फर के खायेक तेहें माना कइर आहे?”
ऊ बेटी छुवा टा जबाब देलक, “परमेश्वर हामरे के कइह आहे कि हामरे उ बेस खराब केर गेयान देवइया गाछ के छइड़ कहन कनअय गाछ केर फर के खाय पारीला। परमेश्वर हामरे के कइह आहे कि जदि तोहरे उ गाछ केर फर के खाबा चाहे उटा के छुबअ करबा, तेअउ तोहरे मइर जाबा।”
उ साँप टा बेटी छुवा के जबाब देलक, “इटा सत ना लागे! तोहरे नाइ मरबा। परमेश्वर जानेला कि जेसनेइ तोहरे उ फर टाके खाबा, तोहरे परमेश्वर केर समान हय जाबा आर उकरे समान बेस आर खराब के समझे लागबा।”
उ बेटी छुवा टा देखलक कि उ फर टा मन भुलायेक निहार रहे आर स्वादिस्ट देखात रहे। उहऊ समझदार बनेक चाहत रहे, सेतेहें ऊ फर टाके तइर कहन खाय लेलक। फिन ऊ आपन पति के जे उकर संगे रहे उ फर टाके देलक आर उहऊ खाय लेलक।
अचकाय, उकर आँइख खुइल गेलक, आर उमन के मालुम हलक कि उमन लंगटाय आहयँ। उमन पात गिला के सी कहन निजेक लूगा बनाय कहन उटा लेक आपन गात के ढाँपेक केर कोसिस करलयँ।
तखन पुरुस आर उकर पत्नी उ बगइचा मेहेन बुलत के परमेश्वर केर सड़ा के सुनलयँ। उ दुइयो परमेश्वर ना देखुक कइह कहन लुइक गेलयँ। तखन परमेश्वर पुरुस के हाँकाय लागलक, “तयँ कहाँ आहिस?” आदम जबाब देलक, मयँ बगइचा मेहेन तोर बुलत केर साड़ा के सुनलँ, आर मयँ डराय गेलँ, काहेकि मयँ लंगटाय रहँ। सेतेहें मयँ लुइक गेलँ।”
फिन परमेश्वर पुछलक, “तके के कइह देलक कि तयँ लंगटाय आहिस? का तयँ उ फर टाके खाय आहिस जेटा के मयँ खायेक तेहें माना कइर रहँ?” पुरुस टा जबाब देलक, “तयँ मके जन बेटी छुवा टाके दे आहिस इहेइ मके उ फर टाके देलक।” तखन परमेश्वर बेटी छुवा टाके पुछलक, “तयँ इटा का करले?” उ बेटी छुवा टा कहलक, “साँप मके धोखा देलक।”
परमेश्वर साँप टाके कहलक, “तयँ सरपल आहिस! तयँ आपन पेट केर बले चला बुला करबे आर माटी चाटबे। तयँ आर इ बेटी एक दसर लेक घिरना करबा, आर तोर छुवा-पुता आर उकर छुवा-पुताउ एक दसर लेक घिरना करबयँ। इ बेटी छुवा केर बंसज गिला तोर मुड़ के छेंछबयँ, आर तयँ उकर एँड़ी के ठटकबे।”
तखन परमेश्वर बेटी छुवा के कहलक, “मयँ तोर छुवा जनमायेक टा बेजाइन दुखदायक करमुँ। तयँ आपन पति लेक लालसा करबे, आर ऊ तोर उपरे प्रभुता करी।”
परमेश्वर पुरुस के कहलक, “तयँ आपन पत्नी केर कथा सुइन आहिस आर मर आग्या के नाइ माइन आहिस। सेतेहें भूँई स्रापित हय आहे, आर तके खायेक उपजायेक तेहें कठिन कस्टो उठाय केर दरकार हइ। एधांव तयँ मइर जाबे, आर तोर गात माटी मेहेन मिल जाइ।” ऊ पुरुस टा आपन पत्नी के नाम हव्वा राखलक, जेटाक माने हेके “जीबन देवइया”, काहेकि ऊ सउब जाइत गिला केर माँय हइ। आर परमेश्वर आदम आर हव्वा के जानवर केर चाम लेक बनाल लूगा पिंधालक।
फिन परमेश्वर कहलक, “एधांव बेस आर खराब के जानेक लेक मानुस हामरेक समान बइन गेलयँ, सेतेहें उमन के जीबन केर गाछ केर फर के नाइ खाय देक चाही कि उमन हमेसा केर तेहें जीयँत रहुन।” सेतेहें परमेश्वर आदम आर हव्वा के उ बगइचा लेक बाहिर बाहराय देलक। आर परमेश्वर केकअउ के उ जीबन गाछ केर फर के खायेक रकेक तेहें उ बगइचा केर समायेक दुरा मेहेन सक्तिसाली सरग दुत गिला के पहरा राइख देलक।
उत्पत्ति अध्याय 3 लेक एकटा बाइबल केर कहनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।