3. बाइढ़
बेजाइन दिनेक बादे, संसार मेहेन बेजाइन लोग गिला रहत रहयँ। उमन बेजाइन दुस्ट आर उपद्रवी हय जाय रहयँ। इटा एतना खराब रहे कि परमेश्वर एकटा बड़े बाइढ़ लेक इ गोटा संसार के नास करे केर निरनय लेलक।
किन्तु परमेश्वर नूह नामेक लोग लेक खुस रहे। ऊ दुस्ट मानुस गिलाक मइधे रहइया एकटा धरमी लोग रहे। परमेश्वर नूह के कइह देलक कि ऊ बेजाइन बड़े बाइढ़ के आनअइया आहे। एहे चलते ऊ नूह के एकटा बड़े जहाज बनायेक तेहें कहलक।
परमेश्वर नूह के लगभग तीन सअ हाथ लम्बा, पचास हाथ ओसार आर तीस हाथ ऊँचा जहाज बनायेक तेहें कहलक। नूह उटा के काठी लेक बनायेक रहे आर उटाय तीन तला, बेजाइन बेसी कोठरी, एकटा छाइन आर एकटा खिड़की बनायेक रहे। ऊ जहाज टा नूह, उकर परिबार, आर भूँईयेक हर किसिम केर जानवर गिला के आवइया बाइढ़ लेक सुरक्षित राखी।
नूह परमेश्वर केर कथा के मानलक। ऊ आर उकर बेटा गिला ओसनेइ जहाज बनालयँ जेसन परमेश्वर कइह दे रहे। काहेकि उ जहाज टा बेजाइन बड़े रहे, सेतेहें उटा के बनायेक मेहेन ढेइर बछर लागलक। नूह लोग गिला के आवइया बाढ़ के बारे चेतावनी देलक आर उमन के परमेश्वर बाटे घुइर आयेक तेहें कहलक, किन्तु उमन उकर उपरे बिसास नाइ करलयँ।
परमेश्वर नूह के आर उकर परिबार के निजेक आर जानवर गिला केर तेहें परचुर मातरा मेहेन खायेक जिनिस गिला जामा करेक केर आदेसो देलक। जखन सउब कुछ तेयार रहे, तखन परमेश्वर नूह के कहलक कि इ समय टा उकर, उकर पत्नी केर, उकर तीन टा बेटा गिला केर, आर उमनेक पत्नी गिला केर –- सउब जामा मिलाय कहन आठ झन के जहाज मेहेन जाय केर रहे।
परमेश्वर हर जानवर आर चरइ गिला केर नर आर मादा के नूह केर ताहाँ पइठालक ताकि उमन जहाज मेहेन जाय पारुन आर बाइढ़ केर समइ मेहेन सुरक्षित रहे पारुन। परमेश्वर एसने हर किसिम केर जानवर गिला केर सात टा नर आर सात टा मादा गिला के पइठालक जे गिला के बलि चेढ़ायेक तेहें इस्तेमाल करे पारे। जखन उ गिला सउब जहाज मेहेन पहँइच गेलयँ तो खुद परमेश्वर जहाज केर दुरा के बन्द कइर देलक।
तखन पानी गिरायेक सुरु करलक, आर बारिस होते गेलक, होते गेलक। लगातार चालीस दिन आर राइत तक बारिस होते रहलक। गोटा संसार केर हरेक जिनिस गिला, हिआँ तक कि ऊँचा लेक ऊँचा पहाड़ गिलाउ पानी मेहेन डुइब गेलक।
सुखल भूँईये रहइया हर एक जीउ गिला मइर गेलयँ, उ लोग गिला आर जानवर गिला के छोइड़ कहन जे गिला जहाज मेहेन रहयँ। जहाज टा पानी उपरे पउँरते रहलक आर परमेश्वर जहाज भीतरेक हर एक जिनिस गिला डुबेक लेक सुरक्षित राखलक।
बारिस हका हल बादे, पाँच महिना तक जहाज पानी उपरे पउँरते रहलक, आर उ समय पानी केर स्तर घटे लाइग रहे। तखन एक दिन उ जहाज टा एकटा पहाड़ उपरे अटइक गेलक, किन्तु संसार एखनो तक पानी ले डुबा हले रहे। तीन महीना केर बादे, पहाड़ केर पथाइन गिला देखाय लागलक।
फिन आरो चालीस दिन केर बादे, नूह एकटा कउआ के इटा जानेक तेहें बाहिर पइठालक कि का पानी सुइख गेलक। उ कउआ टा सुखल भूँई केर खोज मेहेन हिन्दे-हुन्दे उड़ते रहलक, किन्तु उके एसन कनअ जायगा नाइ पावालक।
फिन बादे नूह एकटा ढाइड़ पेरवाँ के बाहिर पइठालक। किन्तु उकउ कनअ सुखल भूँई नाइ पावालक, सेतेहें ऊ नूह पासे फिन वापस आय घुरलक। एक सप्ताह केर बादे नूह अहे ढाइड़ पेरवाँ के फिन पइठालक, आर ऊ आपन ठर मेहेन जैतून केर डग के ले कहन घुइर आलक। पानी घटते जात रहे, आर गाछ-बिरिछ लेक नावा डाइर गिला नगजत रहे।
नूह एक हप्ताह आरो इन्तजार करलक आर तीसर धांव अहे ढाइड़ पेरवाँ केइ बाहिर पइठालक। एबार, उके बइसेक जायगा पावाय गेलक आर ऊ आरो घुइर कहन नाइ आलक। पानी सुखते जात रहे।
दुई महीना केर बादे परमेश्वर नूह के कहलक, “एधांव तयँ आर तर परिबार आर सउब जानवर गिला जहाज लेक बाहिर निकइल जावा। बेजाइन बेसी छुवा-पुता आर नाती-पोता गिला के जनमावा आर पिरथिबी के भइर देवा।” सेतेहें नूह आर उकर परिबार जहाज लेक बाहिर निकइल अलयँ।
नूह केर जहाज लेक बाहिर आयेक बादे, ऊ एकटा वेदी बनालक आर बलि केर तेहें इस्तेमाल करल जाय पारइया हर किसिम केर जानवर गिलाक मइध लेक थोड़ेक ले कहन बलि चेढ़ालक। परमेश्वर बलि लेक खुस हलक आर नूह आर उकर परिबार के आसिरबाद देलक।
परमेश्वर कहलक, “मयँ परतिंगा करँला कि मानुस केर दाराय करल जावइया खराब काम केर चलते मयँ कबउ भूँई के नास नाइ करमुँ, हालाँकि मानुस आपन छुवा समय लेकेइ पापी हेके।
फिन परमेश्वर निजेक वाचा केर चिन्हा केर रुप मेहेन पहिला मेघधेनुक के बनालक। कखनउ आकाश मेहेन मेघधेनुक देखाय हइ, हले परमेश्वर याइद करेला कि ऊ का परतिंगा कइर आहे आर असनेइ उकर लोग गिलाउ याइद करबयँ।
उत्पत्ति अध्याय 6-8 लेक एकटा बाइबल केर कहनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।