4. अब्राहम केर संगे परमेश्‍वर केर वाचा

बाइढ़ केर ढेइर बछर बादे, संसार मेहेन बेजाइन लोग गिला रहत रहयँ, आर उमन फिन परमेश्‍वर केर आर एक दसर केर बिरुद्ध मेहेन पाप करलयँ। काहेकि उमन एकेटा भासाय कथा कहत रहयँ, सेतेहें उमन एके संगे जामा हलयँ आर संसार के भइर देक केर परमेश्‍वर केर आदेस केर बदली मेहेन एकेटा सहर के बनालयँ।

उमन बेजाइन घमन्डी रहयँ, आर उमन के केसन जीबन जीयेक चाही इटाक बारे उमन परमेश्‍वर केर आदेस केर पालन करेक नाइ चाहत रहयँ। हिआँ तक कि उमन एकटा एसन ऊँचा इमारत बनायेक सुरु करलयँ जे सरग तक पहँची। परमेश्‍वर देखलक कि जदि उमन एके संगे मिल कहन खराब काम करते रहबयँ, हले उमन बेजाइन पापी काम गिला के करबयँ।

सेतेहें परमेश्‍वर उमनेक भासा के बेजाइन बेसी भिनु-भिनु भासा मेहेन बदइल देलक आर उ लोग गिला के गोटा संसार मेहेन फयलाय देलक। जन सहर के उमन बनायेक सुरु कइर रहयँ उटा बाबेल कहायला, जेटाक माने हेके “गड़बड़ी।”

ढेइर बछर केर बादे, परमेश्‍वर अब्राम नाम केर एकटा मानुस संगे बातचीत करलक। परमेश्‍वर उके कहलक, “निजेक देस आर परिबार के छोइड़ कहन उ देस मेहेन चइल जाहिन जेटा मयँ तके देखामुँ। मयँ तके आसिरबाद देमुँ आर तर लेक एकटा बड़े जाइत बनामुँ। मयँ तर नाम के बड़े करमुँ। जे तके आसिरबाद देइ मयँ उके आसिरबाद देमुँ, आर जे तके सराप देइ मयँ उके सराप देमुँ। तर चलते संसार केर सउब खन्दान गिला आसिरबाद पाबयँ।”

सेतेहें अब्राम परमेश्‍वर केर कथा के मानलक। ऊ आपन सउब धाँगर गिला आर निजेक सउब सम्पति संगे निजेक पत्नी सारै के लेलक आर कनान देस मेहेन चइल गेलक जेटा परमेश्‍वर उके देखाय रहे।

जखन अब्राम कनान देस पहँचलक तखन परमेश्‍वर उके कहलक, “आपन चाइरो धार देख। मयँ तके इ गोटा देस के देमुँ आर तर बंसज गिला हमेसा केर तेहें इटाक उपरे अधिकार राखबयँ।” तखन अब्राम उ देस मेहेन बइस गेलक।

मलिकिसिदक नाम केर एकटा पुरुस रहे जे सर्बपरि परमेश्‍वर केर पुरोहित रहे। एक दिन जखन अब्राम लड़ाई करेक बादे घुरत रहे तखन ऊ आर अब्राम केर भेंट हलक। मलिकिसिदक अब्राम के आसिरबाद देलक आर कहलक, “सर्बपरि परमेश्‍वर जे सरग आर पिरथिबी केर मालिक हेके ऊ तके आसिरबाद देउक।” फिन अब्राम लड़ाई मेहेन जीतल सउब जिनिल गिला केर दसवाँ हिस्सा मलिकिसिदक के देलक।

ढेइर बछर बित गेलक, किन्तु एखनउ अब्राम आर सारै केर कनअ छुवा-पुता नाइ रहयँ। परमेश्‍वर अब्राम संगे कथा करलक आर फिन परतिंगा करलक कि उकर एकटा बेटा उत्पन्न हइ आर जेसन आकास केर तारेया गिला आहयँ असने उकर बेजाइन बंसज गिला हबयँ। अब्राम परमेश्‍वर केर परतिंगा उपरे बिसास करलक। परमेश्‍वर घोसना करलक कि अब्राम एकटा धरमी लोग रहे काहेकि ऊ परमेश्‍वर केर परतिंगा उपरे बिसास कइर रहे।

तखन परमेश्‍वर अब्राम संगे एकटा वाचा बाँधलयँ। साधारन रुप लेक, एकटा वाचा दुइ समुह केर मइधे एक दसर केर तेहें काम गिला के करे केर एकटा समझौता हयला। परमेश्‍वर अब्राम लेक उ परतिंगा टा उ समइ कइर रहे जखन अब्राम निदात रहे, किन्तु ऊ तखनउ परमेश्‍वर केर सुने पारेला। परमेश्‍वर कहलक, “मयँ तर गात लेक उत्पन्‍न कइर कहन तके एकटा निज बेटा देमुँ। मयँ तर बंसज गिला इ कनान देस टाके देवँला।” किन्तु एखनउ अब्राम केर कनअ बेटा नाइ रहयँ।