5. परतिंगा केर बेटा

अब्राम आर सारै केर कनान देस पहँचेक दस बछर बादे, एखन तक उमनेक कनअ छुवा-पुता नाइ रहयँ। सेतेहें अब्राम केर पत्नी सारै के कहलक, “चूँकि परमेश्‍वर एखन तक मके छुवा जनमाय मेहेन सक्षम नाइ कइर आहे आर एधाँव मयँ छुवा-पुता जनमायेक तेहें बेजाइन बुढ़िया हय गेलँ, देख, मर धांगरिन हाजिरा हुआँ आहे। उकर लेक बिहा कइर लेहिन कि ऊ तर तेहें एकटा छुवा उत्पन्‍न करे पारुक।”

आखिर मेहेन अब्राम हाजिरा के बिहा कइर लेलक। हाजिरा लेक एकटा बेटा हलक, आर अब्राम उकर नाम इश्‍माएल राखलक। किन्तु सारै हाजिरा लेक जले लागलक। जखन इश्माएल तेरह बछर केर रहे, परमेश्‍वर फिन अब्राम संगे कथा करलक।

परमेश्‍वर कहलक, “मयँ सर्वसक्तिमान परमेश्‍वर हेकँ। मयँ तर संगे एकटा वाचा बाँधमुँ।” तखन अब्राम भूँईये गिर कहन दन्डवत करलक। परमेश्‍वर अब्राम लेक इटाउ कहलक, “तयँ बेजाइन जाइत गिला केर बाप हबे। मयँ तके आर तर बंसज गिला के उमनेक निज भूँई हयक तेहें कनान देस के देमुँ आर मयँ हमेसा केर तेहें उमनेक परमेश्‍वर हमुँ। तके निजेक घर परिबार केर हर पुरुस गिला केर खतना करेक आहे।”

“तर पत्नी सारै एकटा बेटा जनमाइ – ऊ परतिंगा केर बेटा हइ। उकर नाम इसहाक राखबे। मयँ उकर संगे आपन वाचा के बनाय राखमुँ आर ऊ एकटा बड़े जाइत बइन जाइ। मयँ इश्माएल केरउ एकटा बड़े जाइत बनामुँ, किन्तु मर वाचा इसहाक संगे रही।” तखन परमेश्‍वर अब्राम केर नाम बदइल कहन अब्राहम कइर देलक, जेकर माने हेके “ढेइर गिलाक बाप”। परमेश्‍वर सारै केर नाम बदइल कहन सारा कइर देलक, जेकर माने हेके, “मूल माँय”।

उ दिन अब्राहम आपन घर परिबार केर सभे पुरुस गिला केर खतना करलक। लगभग एक बछर केर बादे, जखन अब्राहम केर आयु एक सअ बछर रहे आर सारा नब्बे बछर केर रहे, तखन सारा अब्राहम केर बेटा के जनम देलक। जेसन परमेश्‍वर उके कइह रहे ऊ उकर नाम इसहाक राखलक।

जखन इसहाक जुवान हलक तो परमेश्‍वर इ कइह कहन अब्राहम केर बिसास केर परीछा करलक, “निजेक एकेटा बेटा के लेहिन, आर उके मर खातिर बलि केर रुप मेहेन मराय देहिन।” फिन अब्राहम परमेश्‍वर केर कथा के मानलक आर निजेक बेटा के बलि करेक तेहें तेयार करलक।

जखन अब्राहम आर इसहाक बलि करेक जायगा बाटे जाय लागलयँ तखन इसहाक पुछलक, “ए बा, हामरेक पासे बलि करेक तेहें काठी गिला तो आहे, किन्तु बलि करेक तेहें भेड़ा छुवा कई?” अब्राहम जबाब देलक, “ए मर बेटा, परमेश्‍वर बलि करेक तेहें भेड़ा छुवा केर उपाय करी।”

जखन उमन बलि चेढ़ायेक जायगा मेहेन पहँचलयँ, तो अब्राहम इसहाक के बाँइध कहन बेदी मेहेन सुताय देलक। ऊ आपन बेटा के मराइयाइ रहे कि परमेश्‍वर कहलक, “ठहइर जा! लड़का के कनअ नकसान ना करबे! एधाँव मयँ जाइन गेलँ कि तयँ मर भय मानिसला काहेकि तयँ निजेक एकेटा बेटा कउ मर लेक बाँचाय नाइ राखले।”

पासेइ अब्राहम एकटा भेड़ा के देखलक जे झुंड़ गिलाय बाझल रहे। इसहाक केर बदली मेहेन बलि केर तेहें परमेश्‍वर भेड़ा केर उपाय कइर रहे। अब्राहम खुसी-खुसी भेड़ा टाके बलि चढ़ाय देलक।

तखन परमेश्‍वर अब्राहम के कहलक, “काहेकि तयँ मर खातिर सभे टाके देक इछुक रहिस, हिआँ तक कि निजेक एके बेटा कउ, सेतेहें मयँ तके आसिरबाद देक केर परतिंगा करँला। तर बंसज आकास केर तारेया गिला ले कउ बेसी हबयँ। काहेकि तयँ मर आग्या के माइन आहिस सेतेहें मयँ तर परिबार केर दाराय संसार केर सउब कुल गिला के आसिरबाद देमुँ।”