6. परमेश्‍वर इसहाक केर तेहें उपाय करेला

जखन अब्राहम ढेइरे बुढ़ा हय जाय रहे तखन उकर बेटा, इसहाक, जुवान उमइर केर हय जाय रहे। सेतेहें अब्राहम आपन एकटा धांगर के निजेक बेटा इसहाक केर तेहें उ देस लेक एकटा पत्नी आनेक तेहें पइठालक जहाँ उकर रिस्तेदार गिला रहत रहयँ।

जहाँ अब्राहम केर रिस्तेदार रहत रहयँ उ देस के जाय केर एकटा लम्बा सफर केर बादे परमेश्‍वर उ धांगर के रिबका केर पासे ले गेलक। ऊ अब्राहम केर भाई केर नाती रहे।

रिबका निजेक परिबार के छोइड़ कहन उ धांगर केर संगे वापिस जायेक तेहें माइन गेलक। जेसनेइ उमन पहँचलयँ इसहाक उके बिहा कइर लेलक।

ढेइर दिन केर बादे, अब्राहम मइर गेलक। तखन परमेश्‍वर केर बेटा इसहाक के, अब्राहम केर संगे बाँधल वाचा केर चलते आसिरबाद देलक। उ वाचा मेहेन परमेश्‍वर केर एकटा परतिंगा रहे कि अब्राहम केर अनगिनत बंसज हबयँ। किन्तु इसहाक केर पत्नी रिबका केर छुवा-पुता उत्पन्‍न नाइ हलयँ।

इसहाक रिबका केर तेहें परथना करलक, आर परमेश्‍वर उके जुड़ुवा छुवा गिला केर गर्भ धारन करेक मेहेन सक्षम करलक। जन समय उ छुवा गिला रिबका केर गर्भ मेहनेइ रहयँ उमन आपस मेहेन लड़े लागलयँ, सेतेहें जे कनअ हत रहे रिबका उटा के परमेश्‍वर के कइह देलक।

परमेश्‍वर रिबका के कहलक, “तयँ दुइटा बेटा के जनम देबे। उमनेक बंसज दुइटा अलग-अलग जाइत गिला बनबयँ। उमन एक दसर लेक लड़बयँ। किन्तु बड़े बेटा लेक उत्पन्‍न हवइया जाइत गिला के छोट बेटा लेक आवइया जाइत केर आग्या मानेक हइ।”

जखन रिबका केर छुवा गिला केर जनम हलक, तखन बड़े बेटा लाल आर रोएँदार रहे, आर ऊ उकर नाम एसाव राखलक। तखन छोट बेटा एसाव केर एँड़ी के धरले जनमलक, आर ऊ उकर नाम याकूब राखलक।