7. परमेश्‍वर याकूब के आसिरबाद देतेहे

जखन उ छुवा गिला बड़े हलयँ तो याकूब के घरे रहेक बेस लागे लागलक, किन्तु एसाव के जानवर गिला केर सिकार करेक बेस लागलक। रिबका याकूब लेक प्रेम करलक, किन्तु इसहाक एसाव लेक प्रेम राखत रहे।

एक दिन, जखन एसाव सिकार कइर कहन वापस घुइर आलक तो ऊ बेजाइन भूखे रहे। एसाव याकूब के कहलक, “जेटा तयँ पकाय आहिस उटा लेक थोड़ेक टा खायेक मके देहिन।” याकूब जबाब देलक, “पहिले मर संगे इटा परतिंगा कर कि पहिल बेटा हयक चलते हर जिनिस जेटा तके पवायेक चाही, उ सउब तयँ मके देबे।” आखिर मेहेन एसाव उ सउब चीज गिला के याकूब के देक केर परतिंगा कइर देलक। तखन याकूब उके थोड़ेक टा खायेक देलक।

इसहाक एसाव के आसिरबाद देक चाहत रहे। किन्तु इटा लेक पहिल कि ऊ एसन करलक, रिबका आर याकूब इसहाक के एसाव हय केर ढोंग कइर कहन उकर संगे धोखा करलयँ। इसहाक बूढ़ा रहे आर एधांव देखे नाइ पात रहे। सेतेहें याकूब एसाव केर लूगा पिंध कहन आर छागिर केर चाम के आपन घेंचाय आर हाथे बाँधाय लेलक।

याकूब इसहाक पासे आलक आर कहलक, “मयँ एसाव हेकँ। मयँ एहे तेहें आय आहँ कि तयँ मके आसिरबाद देहिन।” जखन इसहाक छागिर के चुइल गिला के छुइ कहन पता लगालक आर लूगा गिला के सुँघलक, तो ऊ सोंचलक कि ऊ एसाव हेके आर उके आसिरबाद देलक।

एसाव याकूब के खिंसालक काहेकि याकूब उकर पहिल बेटा केर अधिकार टाके आर संगेइ उकर आसिरबाद गिला कउ चराय ले रहे। आखिर मेहेन ऊ उकर बा केर मरेक बादे याकूब के मराय देक जोजना बनालक।

किन्तु रिबका एसाव केर जोजना के सुइन लेलक। सेतेहें ऊ आर इसहाक याकूब के उकर गतिया गिलाक संगे रहेक तेहें बेजाइन दूर पइठाय देलक।

याकूब ढेइर बछर तक रिबका केर गतिया गिलाक संगे रहलक। अहे समइ मेहेन ऊ बिहा करलक आर उकर बारोटा बेटा आर एकटा बेटी छुवा उत्पन्‍न हलयँ। परमेश्‍वर उके बेजाइन धनीमान बनाय देलक।

बीस बछर तक कनान देस मेहेन आपन घर लेक दूरे रहेक बादे, याकूब निजेक परिबार, निजेक धांगर गिला, आर निजेक जानवर गिला केर सभे गठ केर संगे हुँआ वापिस घुइर आलक।

याकूब एहे तेहें बेजाइन डराय रहे काहेक ऊ सोंइच रहे कि एसाव एधाँवउ उके मरायेक चाहत रहे। सेतेहें ऊ उपहार केर रुप मेहेन जानवर गिला केर गठ गिला के एसाव केर पासे पइठालक। जेटा धांगर गिला उ गठ गिला के ले कहन जाय रहयँ उमन कहलयँ, “तर धांगर याकूब, इ जानवर गिला के तके देतेहे। ऊ चाँड़ेइ आतेहे।”

किन्तु एसाव एबार याकूब के नकसान पहँचायेक नाइ चाहत रहे। उकर बदली, ऊ उके एक धाँव फिन देइख कहन बेजाइन खुस रहे। उकर बाद याकूब कनान देस मेहेन सान्तिपूर्बक रहलक। फिन इसहाक मइर गेलक आर याकूब आर एसाव उके तइप देलयँ। वाचा केर परतिंगा जेटा परमेश्‍वर अब्राहम केर संगे कइर रहे उ गिला एधाँव इसहाक आर याकूब उपरे आय जाय रहे।