8. परमेश्वर यूसुफ आर उकर परिबार बाँचायला
ढेइर बछर केर बादे, जखन याकूब बूढ़ा हय जाय रहे, तो ऊ निजेक दुलार बेटा यूसुफ के उकर भाई गिला के देखेक तेहें पइठालक जे जानवर गिला केर गठ के चरात रहयँ।
यूसुफ के उकर भाई गिला खिंसाय देत रहयँ काहेकि उमनेक बाप उकर संगे बेसीये प्रेम करत रहत आर एहे तेहेंउ कि यूसुफ सपन देइख रहे कि ऊ उमनेक उपरे सासन करोइया बइन जाइ। जखन यूसुफ आपन भाई गिलाक पासे आलक तो उमन उके बन्धक बनाय लेलयँ आर उके गुलामी गिला केर बेपार करइया गिलाक हाथे बेंइच देलयँ।
यूसुफ केर भाई गिला घर वापिस घुइर लाय लेक पहिले यूसुफ केर लूगा के फाइड़ कहन छागिर केर लहू मेहेन भिंजाय देलयँ। फिन उमन उ लूगा टाके आपन बाप के देखालयँ ताकि ऊ इटा सोंचुक कि कनअ जंगली जानवर यूसुफ के मराय दे आहे। याकूब बेजाइन उदास हलक।
गुलामी गिला केर बेपार करइया उ लोग गिला यूसुफ के मिस्र देस मेहेन ले गेलयँ। नील नदी धारे बसल मिस्र एकटा बिशाल आर सक्तिसाली देस रहे। उ गुलामी गिला केर बेपार करइया गिला यूसुफ के एकटा धनीमान सरकारी अधिकारी के गुलाम केर रुप मेहेन बेंइच देलयँ। यूसुफ आपन मालिक केर बेस निहार सेवा करलक, आर परमेश्वर यूसुफ के आसिरबाद देलक।
उकर मालिक केर पत्नी यूसुफ केर संगे सुतेक कोसिस करलक, किन्तु यूसुफ इ रकम लेक परमेश्वर केर बिरुद्ध पाप करेक लेक इंकार कइर देलक। ऊ बेजाइन खिंसाय गेलक आर यूसुफ उपरे झूठा आरोप लगाय देलक, सेतेहें उके गिरप्तार कइर कहन जेल पइठाल गेलक। हिआँ तक कि जेल मेहनउ, यूसुफ परमेश्वर केर प्रति बिसास लाइक रहलक, आर परमेश्वर उके आसिरबाद देलक।
दुइ बछर बादे, यूसुफ एखनउ जेल मेहेन रहे, भलेइ ऊ निर्दोस रहे। एक राइत, फिरौन, जेसन कि मिस्री लोग गिला आपन राजा के डाकत रहयँ, दुइटा सपन देखलक जे उके बेजाइन बिचलित कइर देलक। उकर केउ सलाहकार उके उ सपन गिला केर माने नाइ कइह देक पारलयँ।
परमेश्वर यूसुफ के सपन गिलाक माने कइह देक केर छमता परदान कइर रहे, सेतेहें फिरौन यूसुफ के जेल घर लेक आपन पासे डाकलक। यूसुफ उके उ सपन गिला केर माने कइह देलक आर कहलक, “परमेश्वर भरपूर फसल उपजेक सात बछर गिला केर बादे अकाल केर सात बछर भेजइया आहे।”
फिरौन यूसुफ लेक एतना परभावित हलक कि ऊ उके मिस्र देस केर दुसरा सउब लेक सक्तिसाली पुरुस नियुक्त कइर देलक।
यूसुफ लोग गिला के बेस फसल उपजेक सात बछर गिलाक समइ मेहेन बेजाइन बेसी मात्रा मेहेन खायेक जामा करेक तेहें कहलक। जखन सात बछर केर अकाल आलक तखन यूसुफ लोग गिला के उ खायेक गिला के बेंचलक ताकि उमनेक पासे खायेक तेहें काफी हउक।
उ अकाल टा केबल मिस्र देस मेहेन एकला नाहीं, किन्तु कनान देस मेहनउ भयंकर रहे जहाँ याकूब आर उकर परिबार रहत रहयँ।
सेतेहें याकूब निजेक बड़े बेटा गिला के खायेक किनेक तेहें मिस्र देस पइठालक। जखन उमन खायेक किनेक तेहें यूसुफ केर पासे ठाड़ हलयँ तो उ भाई गिला यूसुफ के नाइ चिन्हलयँ। किन्तु यूसुफ उमन के चिन्ह लेलक।
इटा मालूम करेक तेहें कि का उमन बदइल गेलयँ उमनेक जाँच करेक बादे, यूसुफ उमन के कहलक, “मयँ तोहरेक भाई यूसुफ हेकँ! ना डरावा। जखन तोहरे मके गुलाम केर रुप मेहेन बेंइच रहा तो तोहरे बुरा करे केर ठाइन रहा, किन्तु परमेश्वर उ बुराई टाके भलाई केर तेहें उपयोग करलक! आवा आर मिस्र देस मेहेन रहा ताकि मयँ तोहरे आर तोहरेक परिबार केर आरो लोग गिलाक तेहें खायेक केर प्रबन्ध करे पारों।”
जखन यूसुफ केर भाई गिला घर वापिस घुरलयँ आर आपन बाप याकूब के कइह देलयँ कि यूसुफ एखनअ जीयँत आहे ऊ बेजाइन खुस हलक।
हालाँकि याकूब एकटा बूढ़ा अदमी रहे तेउ ऊ निजेक परिबार केर संगे मिस्र देस चइल गेलक, आर उमन हुआँ बइस गेलयँ। याकूब केर मरेक लेक पहिले, ऊ निजेक हरेक बेटा गिला के आसिरबाद करलक।
वाचा केर ऊ परतिंगा गिला जेटा परमेश्वर अब्राहम केर संगे कइर रहे उ गिला इसहाक उपरे आर उकर बादे याकूब, आर उकर बादे उकर बारोटा गिला आर उमनेक परिबार गिलाक उपरे आय जाय रहे। उ बारो बेटा गिला केर बंसज गिला इस्राएल केर बारो गोत्र बइन गेलयँ।
उत्पत्ति अध्याय 37:50 लेक बाइबल केर एकटा कहनी¬
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।