9. परमेश्वर मूसा के डाकेला
यूसुफ केर मरेक बादे उकर सउब गतिया गिला मिस्र देस मेहेन बइस जाय रहयँ। उमन आर उमनेक बंसज गिला ढेइर बछर तक मिस्र मेहने रहयँ आर उमन बेजाइन छुवा-पुता जनमालयँ। उमन इस्राएली कहालयँ।
ढेइर बछर केर बादे, इस्राइली गिला केर संख्या बेजाइन बाइढ़ जाय रहे। आर मिस्री लोग गिला इ कथा केर आभारी नाइ रहयँ कि उमनेक साहेता करेक तेहें यूसुफ बेजाइन बेसी कइर रहे। उमन इस्राइली गिला लेक डराय जाय रहयँ काहेकि उमन संख्या मेहेन उमन लेक बेजाइन सांगी रहयँ। सेतेहें उ समइ मिस्र देस मेहेन राइज करइया फिरौन इस्राइली गिला के मिस्र गिला केर गुलाम बनाय देलक।
मिस्री लोग गिला इस्राइली गिला के ढेइरे इमारत गिला के आर हिआँ तक कि कयटा बड़े सहर गिला के बनायेक तेहें मजबूर करलक। कठिन कस्टो उमनेक जीबन केर बेजाइन दुखदायी बनाय देलक, किन्तु परमेश्वर उमन के आसिरबाद देलक आर उमन केर आरो बेसी छुवा-पुता गिला उत्पन्न हलयँ।
फिरौन देखलक कि इस्राइली गिला केर बेजाइन बेसी छुवा-पुता गिला उत्पन्न हत रहयँ, सेतेहें ऊ निजेक लोग गिला इस्राइली गिला केर सभे बाबू छुवा गिला के नील नदी मेहेन फेंइक कहन मरायेक केर आदेस देलक।
एकटा इस्राइली बेटी छुवा एकटा बाबू छुवा के जनम देलक। ऊ आर उकर पति जतना उमनेक संगे हय पारलक उ छुवा के लुकाय कहन राखलयँ।
जखन उ छुवा के माँय- बाप उके आरो बेसी नाइ लुकाय पारलयँ, तो उमन उके मरेक लेक बाँचायेक तेहें एकटा पउँरइया खाँची मेहेन नील नदी धारे नदी घाँस गिलाक माझे राइख देलक। उकर दीदी इटा देखेक तेहें उकर निगरानी करलक कि उकर संगे का हइ।
फिरौन केर बेटी उ खाँची के देइख कहन उकर भीतर हुलकलक। जखन ऊ एकटा छुवा के देखलक तो ऊ उके आपन छुवा केर रुप मेहेन लेलक। ऊ एकटा बेटी छुवा के उके दूध पियायेक तेहें काम मेहेन राखलक, बिना इटा जाने कि ऊ उ छुवा केर बास्तबिक माँय रहे। जखन उ छुवा टा एतना बड़े हय गेलक कि एधाँव उकर माँय के दूध पियाय केर दरकार नाइ रहे, तो ऊ फिरौन केर बेटी केर तहाँ उके घुराय देलक, उकर नाम मूसा रहे।
एक दिन, जखन मूसा बड़े हय गेलक, तो ऊ देखलक कि एकटा मिस्री लोग एकटा इस्राइली लोग के पिटोतेहे। मूसा आपन संगी इस्राइली के बाँचायेक कोसिस करलक।
जखन मूसा सोंचलक कि उटा के केउ नाइ देखलयँ तो ऊ उ मिस्री लोग टाके मराय देलक आर उकर मरल गात के तइप देलक। किन्तु मूसा जेटा कइर रहे उटाके केउ देइख रहे।
फिरौन के पता चइल गेलक कि मूसा का कइर आहे। ऊ उके मराय देक केर कोसिस करलक, किन्तु मूसा मिस्र देस लेक जंगल मेहेन भाइग गेलक। फिरौन केर पालटन गिला उके हुआँ खजे नाइ पारलयँ।
मिस्र देस लेक दूर जंगल मेहेन एकटा चरवाह बइन गेलक। ऊ हुआँ एकटा बेटी छुवा लेक बिहा करलक आर दुइटा बेटा उत्पन्न हलयँ।
मूसा आपन ससुर केर भेड़ी गिला केर चरहवाई करत रहे। एक दिन, ऊ एकटा जरत झुँड़ के देखलक जेटा जरोतेहे किन्तु जइल कहन राख नाइ हतेहे। उटा के देखेक तेहें ऊ उ झुँड़ पासे गेलक। जखन ऊ उटाक पासे रहे तो परमेश्वर उकर संगे कथा करलक। ऊ कहलक, “ए मूसा, निजेक जूता गिला के खइल देहिन। तयँ एकटा पबितर जायगा मेहेन ठाड़ आहिस।”
परमेश्वर कहलक, “मयँ निजेक लोग गिला केर दुख गिला के देइख आहँ। मयँ तके फिरौन केर पासे पइठामुँ ताकि तयँ इस्राइली गिला के मिस्र केर गुलामी लेक निकलाइन। मयँ उमन के कनान देस के देमुँ, उ देस टा मयँ अब्राहम, इसहाक आर याकूब केर संगे परतिंगा कइर आहँ।”
मूसा पुछलक, “जदि लोग गिला जानेक चाहबयँ कि मके के पइठाय आहे हले मयँ का कहमुँ?” परमेश्वर कहलक, “जे मयँ हेकँ से हेकँ। उमन के कहिन, ‘मयँ हेकँ से मके तोहरेक पासे पइठाय आहे।’ उमन लेक इटाउ कहिन, ‘मयँ तोहरेक पुरखा अब्राहम, इसहाक आर याकूब केर परमेश्वर यहोवा हेकँ।’ मर इ नाम हमेसा केर हेके।”
मूसा डरात रहे आर फिरौन पासे जायेक नाइ चाहत काहेकि ऊ सोंचलक कि ऊ बेस निहार कहे नाइ पारी, सेतेहें परमेश्वर मूसा केर भाई, हारुन, के उकर साहेता करेक तेहें पइठालक।
¬_निर्गमन अध्याय 1-4 लेक बाइबल केर एकटा कहनी_
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।