10. दसटा बिपइत गिला
परमेश्वर मूसा आर हारुन के चेतावनी देलक कि फिरौन हठिला हय जाइ। जखन उमन फिरौन पासे गेलयँ तो उमन कहलयँ, “इस्राएल केर परमेश्वर एसन कहेला, ‘मर लोग गिला के जायेक देहिन!’” किन्तु फिरौन उमनेक कथा नाइ सुनलक आर इस्राएल गिला के जाय कहन स्वतंत्र करेक बदली ऊ उमन के आरो बेसी कठिन कस्टो करेक तेहें मठजबरी करलक।
फिरौन उ लोग गिला के जायेक देल लेक लगातार इंकार करते रहलक, सेतेहें परमेश्वर मिस्र देस मेहेन दसटा भयंकर बिपइत गिला के पइठालक। इ बिपइत गिला केर दाराय, परमेश्वर फिरौन के देखालक कि ऊ फिरौन आर मिस्र केर देवता गिला लेको बेसी सक्तिसाली आहे।
परमेश्वर नील नदी केर पानी के लहू मेहेन बदइल देलक, किन्तु फिरौन एखनउ इस्राएली गिला के जाय नाइ देलक।
परमेश्वर गोटा मिस्र देस मेहेन बेंग गिला के पइठालक। फिरौन बेंग गिला के हटायेक तेहें मूसा लेक अर्जी करलक। किन्तु सउब बेंग गिला केर मइर जायेक बादे, फिरौन आपन मन के कठोर कइर लेलक आर इस्राएली गिला के मिस्र देस लेक निकलेक नाइ देलक।
सेतेहें परमेश्वर कुटकी गिला केर बिपइत के पइठालक। उकर बादे ऊ पिचु गिला केर बिपइत के पइठालक। फिरौन मूसा आर हारुन के डाकलक आर उमन के कहलक कि जदि उमन उ बिपइत के रइक देबयँ हले इस्राएली गिला मिस्र देस के छोइड़ कहन जाय पारयँ। जखन मूसा परथना करलक तो परमेश्वर मिस्र लेक पिचु गिला के हटाय देलक। किन्तु फिरौन आपन मन के कठोर कइर लेलक आर उ लोग गिला के आजाद हय कहन जायेक नाइ देलक।
इकर आघु, परमेश्वर मिस्री गिला केर सउब पसल जानवर गिला के रोगी हय कहन मरेक देलक। किन्तु फिरौन केर मन कठोर हय जाय रहे आर ऊ इस्राएली गिला के जाय नाइ देलक।
तखन परमेश्वर मूसा के फिरौन केर पासे राख के फेंकेक तेहें कहलक। जखन ऊ एसने करलक तो मिस्र देस केर लोग गिला केर चाम मेहेन दुखाइया गुड़ा बाहरालक, किन्तु इस्राएली गिला के कनअ नाइ हलक। परमेश्वर फिरौन केर मन के कठोर कइर देलक, आर फिरौन इस्राएली गिला के आजाद हय कहन जाय नाइ देलक।
इकर बादे, परमेश्वर पाखना पानी गिरालक आर मिस्र केर बेसी लेक बेसी फसल गिला के नस्ट कइर देलक आर जे केउ बाहिर बाहरालयँ उमन के मराय देलक। फिरौन मूसा आर हारुन के डाकलक आर उमन के कहलक, “मयँ पाप कइर आहँ। तोहरे जाय पारा।” आखिर मेहेन मूसा परथना करलक, आर आकास लेक पाखना पानी गिरायेक हका हलक।
किन्तु फिरौन फिन पाप करलक आर आपन मन के कठोर कइर लेलक। ऊ इस्राएली गिला के आजाद हय कहन जायेक नाइ देलक।
आखिर मेहेन परमेश्वर मिस्र देस मेहेन फेनगा गिला केर झुंड आय देलक। इ फेनगा गिला उ सउब फसल गिला के खाय लेलयँ जेटा पाखना पानी लेक बरबाद नाइ हय रहे।
फिन परमेश्वर अन्धार कइर देलक जे तीन दिन तक रहले रहलक। इटा एतना बेसी अन्धार रहे कि मिस्री लोग गिला आपन घर लेक बाहिर बाहरायेक नाइ पारलयँ। किन्तु जहाँ इस्राएली लोग गिला रहत रहयँ हुआँ इन्जत रहे।
इ नअ बिपइत गिला केर बादउ, फिरौन इस्राएली गिला के आजाद हय कहन जाय देक ले इंकार कइर देलक। चूँकि फिरौन नाइ सुनलक सेतेहें परमेश्वर एकटा आखरी बिपइत के पइठाय केर जोजना बनालक। इटा फिरौन केर मन के बदइल देइ।
निर्गमन अध्याय 5-10 लेक बाइबल केर एकटा कहनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।