11. फसह
परमेश्वर मूसा आर हारुन के फिरौन केर पासे इटा कहेक तेहें पइठालक कि इस्राएली गिला के जायेक देउक। उमन उके चेतावनी देलयँ कि जदि ऊ उमन के नाइ जायेक देइ, हले परमेश्वर मिस्र केर लोग गिला के आर जानवर गिला केर सउब पहिल बेटा गिला के मराय देइ। फिरौन इटा सुइन कहनउ परमेश्वर उपरे बिसास करेक लेक आर उमनेक कथा मानेक लेक इंकार कइर देलक।
परमेश्वर उकर उपरे बिसास करइया गिला केकरउ पहिल बेटा गिला के बाँचायेक तेहें एकटा उपाय करलक। हर परिबार के एकटा निर्दोस भेड़ा छुवा के ले कहन उकर बलि करेक रहे।
परमेश्वर इस्राएली गिला के उ भेड़ा छुवा केर लहू के ले कहन आपन घर केर दुआइरे लगायेक तेहें कहलक। उमन के उकर माँस के भुँजेक रहे आर फिन उटा के बिना खमीर मेसाल पिठा संगे चाँडे-चुड़ु खायेक रहे। उमन उ खायेक टाके खाल बादे उमन के अहे खने मिस्र देस के छोड़ेक तेंहउ तेयार रहेक तेहें कहलक।
जेसन करेक तेहें परमेश्वर इस्राएली गिला के आदेस दे रहे उमन उटाक मोताबिक सभे टा के करलयँ। आधा राइते, परमेश्वर हर एक पहिल बेटा गिला के मरात के मिस्र केर माझ डहर लेक हय कहन पार हलक।
इस्राएली गिला केर हर एक दुआइर गिलाय लहू लगाल रहे, सेतेहें परमेश्वर उ घर गिला के छोइड़ देलक। उकर भीतर केर सउब लोग गिला सुरक्षित रहयँ। उमन भेड़ा छुवा केर लहू केर चलते बाँइच जाय रहयँ।
किन्तु मिस्री लोग गिला परमेश्वर उपरे बिसास नाइ कइर रहयँ आर उकर आदेस गिला के नाइ माइन रहयँ। सेतेहें परमेश्वर उमनेक घर गिला के नाइ छोड़लक। परमेश्वर मिस्री गिला केर हर एक पहिल बेटा गिला के मराय देलक।
जेहेल केर कैदी गिलाक पहिल बेटा गिला लेक, फिरौन केर पहिल बेटा तक, हर एक पहिल बेटा गिला मइर गेलयँ। निजेक बड़े दुख केर चलते मिस्र केर ढेइर लोग गिला कान्दत रहयँ आर विलाप करत रहयँ।
अहे राइते, फिरौन मूसा आर हारुन के डाकल आर कहलक, “इस्राएली गिला के ले कहन तुरतेइ मिस्र देस लेक निकइल जावा!” मिस्र केर लोग गिलाउ इस्राएली गिला के तुरुत निकइल जाय केर अर्जी करलयँ।
निर्गमन अध्याय 11:1-12:32 लेक बाइबल केर एकटा कहनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।