12. निर्गमन

इस्राएली लोग गिला मिस्र देस लेक निकइल कहन बेजाइन खुस रहयँ। उमन एधाँव गुलाम नाइ रहयँ, आर उमन परतिंगा केर देस के जात रहयँ! जे कनअ इस्राएली गिला माँगलयँ, मिस्री गिला उमन के उ सउब के देलयँ, हिआँ तक कि सोना आर चाँदी आर दसर किमती बस्तु गिला। दसर देस केर थोड़ेक लोग गिला परमेश्‍वर उपरे बिसास करलयँ आर जखन इस्राएली लोग गिला मिस्र लेक निकललयँ तो उमनउ उमनेक संगे मेइस गेलयँ।

दिन केर समइ बादइर केर एकटा बड़े खुँटा उमनेक आघु-आघु चललक। आर राइत केर समइ मेहेन इटा आइग केर खुँटा बइन गेलक। परमेश्‍वर जे उ बादइर केर खुँटा मेहेन आर आइग केर खुँटा मेहेन रहे, हमेसा उमनेक संगे रहे आर ऊ यात्रा करत समइ उमन केर अगुवाई करलक। उमन के केबल एतना करेक रहे कि उकर पेछुवे चलुन।

थोड़ेक समइ बादे, फिरौन आर उकर लोग गिला आपन मन के बदइल देलयँ। उमन इस्राएली गिला के फिन आपन गुलाम बनायेक चाहत रहयँ। सेतेहें उमन इस्राएली गिला केर पीछा करलयँ। इ परमेश्‍वरेइ रहे जे उमनेक मन गिला के बदइल दे रहे। ऊ एसन एहेतेहें करलक काहेकि ऊ चाहत रहे कि हर कोई इटा जाइन लेउन कि फिरौन लेक आर मिस्री गिला केर सउब देवता गिला लेक ऊ, बेसीये सक्तिसाली आहे।

जखन इस्राएली गिला मिस्र केर पालटन गिला के आत के देखलयँ तो उमन के पता चललक कि उमन फिरौन केर पालटन आर लाल समुन्दर केर माझे फाँइस गेलयँ। उमन बेजाइन डराय गेलयँ आर कान्दे लागलयँ, “हामरे मिस्र देस के काहे छोइड़ देली? हामरे मरइया आही!”

मूसा इस्राएली गिला के कहलक, “डरायेक हका करा! परमेश्‍वर आइज तोहरेक तेहें लड़ी आर तोहरे के बाँचाइ।” तखन परमेश्‍वर मूसा के कहलक, “इ लोग गिला के लाल समुन्दर बाटे आघु बाढेक तेहें कहिन।”

तखन परमेश्‍वर उ बादइर केर खुँटा के ले कहन इस्राएली गिला आर मिस्री गिला केर मइध मेहेन राइख देलक ताकि मिस्री लोग गिला इस्राएली गिला के देखे ना पाउन।

परमेश्‍वर मूसा के समुन्दर उपरे आपन हाथ बढ़ायेक तेहें कहलक। फिन परमेश्‍वर हवा लेक समुन्दर केर पानी के लेंगा आर दहिना बाटे करुवाय देलक, जेटा लेक कि समुन्दर माझ लेक हय कहन एकटा डहर बइन गेलक।

इस्राएली लोग गिला आपन दुइयो बाटे पानी केर पाचीर केर संगे सुखल भूँईये समुन्दर लेक हय कहन आघु चइल गेलयँ।

तखन परमेश्‍वर उ डहर लेक बादइर के उठाय लेलक ताकि मिस्री लोग गिला इस्राएली गिला के बाँइच कहन जात के देखुन। मिस्री गिला उमन के धरेक तेहें उमनेक पीछा करे केर निर्नय लेलयँ।

आखिर मेहेन उमन समुन्दर माझ लेक उ डहरे इस्राएली गिला केर पीछा करलयँ, किन्तु परमेश्‍वर मिस्री गिला के डरुवाय देलक आर उमनेक रँथ गिला के अटकाय देलक। उमन चिचियाय लागलयँ, “भागा! इस्राइली गिला बाटे लेक परमेश्‍वर लड़तेहे!”

सभे इस्राएली गिला समुन्दर केर दसर धार बाटे पहुँइच गेलयँ। तखन परमेश्‍वर मूसा के कहलक कि ऊ फिन पानी उपरे हाथ बढ़ाउक। जखन मूसा एसन करलक, तो पानी मिस्री पालटन गिलाय आय गेलक आर आपन सामान्य स्थिति मेहेन हय गेलक। सभे मिस्री पालटन गिला डुइब गेलयँ।

जखन इस्राएली गिला देखलयँ कि मिस्री गिला मइर गेलयँ तो उमन परमेश्‍वर उपरे बिसास करलयँ। उमन बिसास करलयँ कि मूसा परमेश्‍वर बाटे लेक भबिस्यबक्ता रहे।

इस्राएली लोग एहे तेंहउ बेजाइन खुस रहयँ काहेकि परमेश्‍वर उमन के मरेक लेक आर गुलाम हयक लेक बाँचाय ले रहे। एधाँव उमन परमेश्‍वर केर आराधना करेक आर उकर आग्या केर पालन करेक तेहें आजाद रहयँ। इस्राएली गिला आपन आजादी केर परब मानायेक तेहें आर परमेश्‍वर केर प्रसंसा करेक तेहें कयटा गीत गिला के गीतकालयँ काहेकि ऊ इमन के मिस्री गिला केर पालटन गिला लेक बाँचाय रहे।

परमेश्‍वर इस्राएली गिला के हर बछर एकटा परब मानायेक केर आदेस देलक, इटा याइद करेक तेहें कि केसन परमेश्‍वर मिस्री गिला के हराय देलक आर उमन के गुलामी हय लेक आजाद करलक। इटा फसह केर परब कहात रहे। इ परबे उमन के इकर परब मानायेक तेहें एकटा स्वस्थ भेड़ा छुवा के बलि करेक रहे, उटा के भुँजेक रहे, आर उटा के बिना खमीर मेसाल पीठा संगे खायेक रहे।