13. इस्राएल केर संगे परमेश्‍वर केर वाचा

इस्राएली गिला के लाल समुन्दर केर पार ले जायेक बादे, परमेश्‍वर उमन के जंगल लेक हय कहन सीनै नामेक पहाड़ बाटे ले कहन गेलक। इटा ओहे पहाड़ रहे जहाँ मूसा जरत झुँड़ के देइख रहे। उ लोग गिला उ पहाड़ केर हेंठे आपन तम्बु गिला के ठाड़ करलयँ।

परमेश्‍वर मूसा आर इस्राएल केर सउब लोग गिला के कहलक, “तोहरे के हमेसा मर कथा गिला के मानेक आहे आर जन वाचा टा मयँ तोहरेक संगे बाँधलाँ उटा के बनाय राखेक आहे। जदि तोहरे एसन कराला, हले तोहरे मर पुरस्कार किमती धन, याजक गिला केर राइज, आर एकटा पबितर जाइत ठहरबा।”

परमेश्‍वर केर दाराय उमनेक पासे आयेक तेहें लोग गिला के तीन दिन तक निजे के तेयार करलक। तखन परमेश्‍वर सीनै पहाड़ केर पथाइन मेहेन हेंठे नाभलक। तखन ऊ आलक तो भूँईडल हलक, बिजली चमकलक, धूआँ उठलक, आर तुरधुतु गिलाक डबल आँटे आवाज हलक। तखन मूसा खूद पहाड़ उपरे चेड़लक।

तखन परमेश्‍वर लोग गिलाक संगे एकटा वाचा बाँधलक। ऊ कहलक, “मयँ तोहरेक परमॆश्‍वर, यहॊवा हॆकँ। मयँए हेकँ जे तोहरे के मिस्र केर गुलामी लेक छोड़ालँ। कनअ दसर देवता केर उपासना ना करा।”

“मूर्ति गिला के ना बनाबा आर उमनेक उपासना ना करा, काहेकि मयँ, यहोवा, तोहरे केर एकटा मातर परमेश्‍वर हेकँ। अनुचित रीति लेक मर नाम केर उपयोग ना करा। सब्त केर दिन के पबितर मानेक तेहें याइद राखबा। दसर सब्द मेहेन, छह दिन गिलाय आपन सउब काम गिला के करबा, सातवाँ दिन तोहरेक तेहें बिसराम करे केर आर मके याइद करे केर दिन हेके।”

“निजेक माँय आर बाप केर आदर करबा। हत्या ना करबा। ब्यभिचार ना करबा। चोरी ना करबा। आपन पड़ोसी केर पत्नी, उकर घर, चाहे उकर कनअए सामान के ले केर हिंछा ना करबा।”

तखन परमेश्‍वर इ दस आग्या गिला के पाखना केर दुइटा तख्ताय लिख कहन मूसा के दे देलक। परमेश्‍वर पालन करेक तेहें लोग गिला के दसर ढेइरे बेबस्था गिला के देलक। जदि उमन इ बेबस्था गिला के पालन करलयँ हले परमेश्‍वर उ लोग गिला के आसिरबाद देक आर उमनेक सुरक्षा करे केर परतिंगा करलक। किन्तु ऊ कहलक कि जदि उमन उटाक पालन नाइ करलयँ हले ऊ उमन के दन्ड देइ।

परमेश्‍वसर इस्राएली गिला के एकटा बड़े निहार तम्बु बनायेक तेहउ कहलक – मिलापवाला तम्बु। ऊ उमन के ठीक-ठीक कइह देलक कि इ तम्बु टाके का निहार बनायेक आहे, आर उकर भीतर का जिनिस गिला के राखेक आहे। ऊ उमनके उ तम्बु केर दुइटा कठरी बाँटेक तेहें एकटा बड़े निहार परदा के बनायेक तेहउ कहलक। परमेश्‍वर उ परदा केर पेछु वाटेक कठरी मेहेन आइ आर हुआँ रही। जहाँ परमेश्‍वर रहे उ कठरी मेहेन जाय केर अनुमति केबल महायाजक के रहे।

उ लोग गिला के उ मिलापवाला तम्बु केर पासे एकटा बेदी बनाय हइ। केउ जे परमेश्‍वर केर बेबस्था केर उलंघन करी उ लोग टा उ बेदी उपरे बलि चेढ़ायेक तेहें एकटा जानवर के ले कहन आउक। तखन याजक उके बलि करी आर बेदी उपरे परमेश्‍वर केर तेहें बलि केर रुप मेहेन पड़ाइ। परमेश्‍वर कहलक कि उ जानवर केर लहू उ लोग केर पाप गिला के ढाँइप लेइ। एहे निहार लेक, एधाँव परमेश्‍वर उ पाप के नाइ देखी। उ लोग टा परमेश्‍वर केर नजइर मेहेन “शुद्ध” ठहरी। परमेश्‍वर मूसा केर भाई हारुन के आर हारुन केर बंसज गिला के आपन याजक हयेक तेहें चुनलक।

परमेश्‍वर उ लोग गिला के जे नियम दे रहे उमन उटा के पालन करेक तेहें सहमत हलयँ। उमन केबल परमेश्‍वर केर लोग हयेक केर आर केबल उकरे आराधना करेक तेहें सहमत हलयँ।

कयो दिन तक, मूसा सीनै पहाड़ केर पथाइन मेहनेइ रहलक। ऊ परमेश्‍वर केर संगे कथा करत रहे। किन्तु लोग गिला मूसा केर वापस घुरेक केर आसरा देखत अनसाय गेलयँ। सेतेहें उमन हारुन केर पासे सोना गिला के ले कहन आलयँ आर उटा लेक मूर्ति बनायेक तेहें कहलयँ ताकि उमन परमेश्‍वर केर बदली उटाक उपासना करे पारुन। एहे निहार, उमन भयंकर रुप लेक परमेश्‍वर कर बिरुद्ध पाप करलयँ।

हारुन बाछा केर रुप मेहेन सोना केर एकटा मूर्ति बनालक। उ लोग गिला उ मूर्ति केर उपासना करेक सुरु कइर देलयँ आर उके बलि चेढ़ालयँ! उमनेक पाप केर चलते परमेश्‍वर उमन लेक बेजाइन खिंसाय रहे। ऊ उमन के नास कइर देक चाहत रहे। किन्तु मूसा उमन के नाइ मरायेक केर परमेश्‍वर लेक परथना करलक। परमेश्‍वर उकर परथना के सुनलक आर उमन के नास नाइ करलक।

आखिर मेहेन मूसा सीनै पहाड़ लेक हेंठे नाभलक। ऊ उ दुइ टा पाखना केर तख्ता गिला के धइर राइख रहे जेटाय परमेश्‍वर दस आग्या गिला के लिख रहे। फिन ऊ उ मूर्ति टाके देखलक। ऊ एतना खिंसाय गेलक कि ऊ उ तख्ता गिला के पटइक कहन रापू कइर देलक।

फिन मूसा उ मूर्ति के पीस कहन गुँड़ा बनाय देलक, आर उ गुँड़ा गिला के पानी मेहेन घइल कहन उ लोग गिला के उ पानी टाके पियाय देलक। परमेश्‍वर उ लोग गिलाक उपरे एकटा बिपइत पइठालक आर उमनेक मइध लेक ढेइर लोग गिला मइर गेलयँ।

जन तख्ता गिला के मूसा फुटाय दे रहे उटाक जायगाय मूसा उ दस आग्या गिला केर नावा तख्ता गिला के बनालक। तखन ऊ फिन पहाड़ उपरे चेइढ़ गेलक आर परथना करलक कि परमेश्‍वर उ लोग गिला के छमा करुक। परमेश्‍वर मूसा केर परथना के सुनलक आर उमन के छमा कइर देलक। नावा तख्ता गिलाय दस आग्या गिला के धरल मूसा पहाड़ लेक हेंठे उतइर आलक। तखन परमेश्‍वर सीनै पहाड़ लेक ले कहन परतिंगा केर देस तक इस्राएली गिला केर अगुवाई करलक।