14. बन मेहेन भटकेक

परमेश्‍वर इस्राएली गिला के उ नियम गिला के बतायेक सिरालक जेटाक उमन के बाँधल उकर वाचा केर चलते पालन करेक आहे। फिन ऊ सीनै पहाड़ लेक आघु बाटे उमन केर अगुवाई करलक। ऊ उमन के परतिंगा केर देस मेहेन लेजायेक चाहत रहे। इ देस टा कनानअ कहायला। परमेश्‍वर बादइर खूँटा केर रुप मेहेन उमनेक आघु-आघु चललक, आर उमन उकर पेछु-पेछु चललयँ।

परमेश्‍वर अब्राहम, इसहाक आर याकूब लेक परतिंगा कइर रहे कि उ परतिंगा करल उ देस टाके उमनेक बंसज गिला के देइ, किन्तु इ समइ हुआँ ढ़ेइरे जाइत गिला रहत रहयँ। उ गिला कनानी कहाय रहयँ। इ कनानी लोग गिला परमेश्‍वर केर आराधना नाइ करत रहयँ आर उकर आग्या गिला के नाइ मानत रहयँ। उमन झठा देवता गिला केर उपासना करत रहयँ आर बेजाइन खराब काम करत रहयँ।

परमेश्‍वर इस्राएली गिला के कहलक, “जखन तोहरे उ वाचा केर देस मेहेन जाबा हले हुआँ केर सउब कनानी जाइत गिला लेक छुटकारा पाय लेबा। उमनेक संगे समझौता ना करबा आर उमनेक संगे बिहा ना करबा। तोहरे के उ सउब मूर्ति गिला के एकदम नास कइर देक आहे। जदि तोहरे मर आग्या के नाइ मानबा, हले तोहरे मके छोइड़ कहन उमनेक देवता गिला केर उपासना करे लागबा।”

जखन इस्राएली गिला कनान देस केर सिमाना मेहेन पहँचलयँ, मूसा इस्राएल केर हरेक गोत्र मइध लेक एक-एक झन कइर कहन बारो झन के चुनलक। ऊ उमन के जाय कहन उ देस केर भेद लेक केर निर्देस देलक कि देखुन कि उटा केसन देस हेके। उमन के उ कनानी गिला केरअ भेद लेक रहे कि देखुन कि उमन बलिमान रहयँ न निर्बल रहयँ।

उ बारो झन गिला गोटा कनान देस मेहेन घुरत के चालीस दिन केर यात्रा करलयँ आर फिन उमन वापिस घुइर आलयँ उमन लोग गिला के बताय देलयँ, “उ देस टा बेजाइन उपजाउ आहे आर फसल गिला बेजाइन बेसी आहे!” किन्तु दस झन भेद लेवइया गिला कहलयँ, “उमनेक सहर गिला बेजाइन मजबुत आहे आर उ लोग गिला लम्बा चौड़ा आहयँ! जदि हामरे उमनेक उपरे हमला करिला, हले पक्‍काइ उमन हामरे के हराय देबयँ आर हामरे के मराय देबयँ।”

तुरतेइ कालेब आर यहोशू आर दसर दुइ टा भेदिया गिला कहलयँ, “इटा सत हेके कि कनान केर लोग गिला लम्बा आर बलिमान आहयँ, किन्तु पक्‍काइ हामरे उमन के हराय पारबिक! परमेश्‍र हामरेक लड़ी!”

किन्तु लोग गिला कालेब आर यहोशू केर कथा के नाइ सुनलयँ। उमन मूसा आर हारुन उपरे खिंसाय गेलयँ आर कहलयँ, “तयँ हामरे के इ डरडरा जायगा मेहेन काहे ले कहन आइन आहिस? हामरे के मिस्र देस मेहनेइ रहेक चाही रहे। जदि हामरे उ देस मेहेन जाइला हले हामरे लड़ाई मेहेन मराय जाब, आर कनान केर लोग गिला हामरेक पत्नी गिला आर छुवा गिला के गुलाम बनाय लेबयँ।” उ लोग गिला के वापिस मिस्र लेजायेक तेहें एकटा दसर अगुवा के चुनेक चाहत रहयँ।

जखन उ लोग गिला एसन कहलयँ तो परमेश्‍वर बेजाइन खिंसाय जाय रहे। ऊ मिलापवाला तम्बु मेहेन आलक आर कहलक, “तोहरे मर बिरुद्ध बलवा कइर आहा, सेतेहें तोहरे सउब के इ बन मेहेन भटकेक हइ। हर झन जे बीस बछर चाहे उकर लेक बेसी उमइर केर आहयँ उमन हुआँ मइर जाबयँ आर कबउ उ देस मेहेन समाय नाइ पारबयँ जेटा मयँ तोहरे के देवलाँ। केबल कालेब आर यहोशू हुआँ समाबयँ।”

जखन लोग गिला परमेश्‍वर के एसन कहत के सुनलयँ, तो उमन दुखी हलयँ काहेकि उमन पाप कइर रहयँ। सेतेहें कनान केर लोग गिला उपरे हमला करे केर निर्नय करलयँ। मूसा उमन के नाइ जाय केर चेतावनी देलक काहेकि परमेश्‍वर उमनेक संगे नाइ जाइ, किन्तु उमन उकर नाइ सुनलयँ।

परमेश्‍वर इ लड़ाई मेहेन उमनेक संगे नाइ जाय रहे, सेतेहें कनानी गिला उमन के हराय देलयँ आर उमन लेक ढेइर गिला के मराय देलयँ। तखन इस्राएली लोग गिला कनान लेक वापिस घुइर गेलयँ। आघुक चालीस बछर तक, उमन बन मेहेन हिन्दे-हुन्दे भटकते रहलयँ।

इस्राएली लोग गिला बन मेहेन भटकेक केर चालीस बछर समइ मेहेन, परमेश्‍वर उमनेक जरुरत गिला के पूरा करलक। ऊ उमन के सरग लेक “मन्‍ना” कहाइया पिठा देलक। ऊ बटेर चरइ गिलाक दल कउ (जे कि ठीक साइज केर चरइ हयन्ला) उमनेक छावनी मेहेन पइठालक ताकि उमनेक पासे खायेक केर माँस हउक। उ पूरा समइ, परमेश्‍वर उमनेक लूगा गिला आर जूता गिलाके फाटेक नाइ देलक।

हिआँ तक कि परमेश्‍वर उमन के पीयेक तेहें चमत्कारी रुप लेक चट्टाइन लेक पानी बाहरालक। किन्तु इ सउब के बउजुद, इस्राएली लोग गिला परमेश्‍वर केर बिरुद्ध आर मूसा केर बिरुद्ध सिकायत करलयँ आर कुरकुरालयँ। तेउ, परमेश्‍वर बिसास लाइक रहे। ऊ जे परतिंगा कइर रहे कि ऊ अब्राहम, इसहाक, आर याकूब केर बंसज गिला केर तेहें करी ऊ उटा के करलक।

एकटा दसर समइ मेहेन उखन उ लोग गिला केर पासे पानी नाइ रहे, परमेश्‍वर मूसा के कहलक, “चट्टाइन लेक कथा करिन, आर उटा लेक पानी बाहराइ।” किन्तु मूसा चट्टाइन ले कथा नाइ करलक। इकर बदली मेहेन, ऊ ठेंगा लेक चट्टाइने दुइ धाँव मारलक। इ रकम चट्टाइन लेक पानी तो बाहरालक, किन्तु परमेश्‍वर मूसा लेक खिंसाय गेलक। ऊ कहलक, “काहेकि तयँ एसन कइर आहिस, सेतेहें तयँ परतिंगा केर देस मेहेन समाय नाइ पारबे।”

जखन इस्राएली लोग गिला चालीस बछर तक बन मेहेन भटक चुइक रहयँ, तखन जे गिला परमेश्‍वर केर बिरुद्ध बलवा कइर रहयँ उ सउब गिला मइर गेलयँ। तखन परमेश्‍वर उ लोग गिला के फिन उ परतिंगा केर देस केर सीमान तक ले गेलक। एधाँव मूसा ढेइरे बूढ़ाय जाय रहे, सेतेहें परमेश्‍वर लोग गिला के अगुवाई करेक मेहेन उकर साहेता करेक तेहें यहोशू के चुनलक। परमेश्‍वर मूसा संगे इ परतिंगाउ कइर रहे कि एक दिन ऊ उ लोग गिलाक पासे मूसा जेसन एकटा भबिस्यबक्ता के पइठाइ।

तखन परमेश्‍वर मूसा के एकटा पहाड़ केर चुटी मेहेन जायेक कहलक ताकि उ परतिंगा केर देस के देखेक पारुक। मूसा उ परतिंगा केर देस के देखलक किन्तु परमेश्‍वर उके हुआँ समाय केर अनुमति नाइ देलक। तखन मूसा मइर गेलक, आर इस्राएली गिला तीस दिन तक शोक मनालयँ। यहोशू उमनेक नावा अगुआ बइन गेलक। यहोशू एकटा बेस अगुवा रहे काहेकि उ परमेश्‍वर उपरे भरसा करलक आर उकर कथा गिला मानलक।