15. परतिंगा केर देस

आखिर मेहेन, एधाँव उ समइ आय गेलक कि इस्राएली लोग गिला परतिंगा केर देस, कनान मेहेन समाउन। उ देस मेहेन यरीहो नामेक एकटा नगर रहे। उकर सुरक्षा केर तेहें उटाक चाइरो धार मजबूत पाचीर गिला रहे। यहोशू उ नगर मेहेन दुइटा भेदिया गिला के पइठालक। उ नगर मेहेन राहाब नामेक एकटा रन्डी रहत रहे। ऊ इ भेदिया गिला के लुकालक, आर फिन बादे उ उमन के नगर लेक बाँइच कहन निकलेक मेहेन साहेता करलक। ऊ एसन एहे तेहें करलक काहेकि ऊ परमेश्‍वर मेहेन बिसास करत रहे। जन समइ इस्राएली लोग गिला यरीहो के नास करबयँ तखन उमन राहाब आर उकर परिबार केर रइकछा करे केर परतिंगा कइर रहयँ।

इस्राएली लोग गिला परतिंगा केर देस मेहेन समायेक तेहें यरदन नदी के पार करेक रहे। परमेश्‍वर यहोशू के कहलक, “याजक गिला के पहिल जायेक देहिन।” जखन याजक गिला यरदन नदी मेहेन आपन कदम के राखलयँ तो पानी केर बहेक थइम गेलक, जेटा लेक कि इस्राएली लोग गिला नदी केर दसर धार बाटे सुखल भूँई मेहेन जाय पारुन।

उ लोग गिला यरदन नदी के पार कइर लेलयँ तो परमेश्‍वर यहोशू के कहलक कि यरीहो उपरे हमला करेक तेहें तेयार रहा, हालाँकि उटा बेजाइन मजबूत नगर रहे। परमेश्‍वर उ लोग गिला के कहक कि उमनेक याजक गिला आर पालटन गिला के छह दिन तक उ नगर केर चाइरो धार चक्‍कर लगायेक आहे। आखिर मेहेन याजक गिला आर पालटन गिला एसनेइ करलयँ।

तखन सातवाँ दिने, इस्राएली गिला उ नगर केर चाइरो धार सात धाँव आरो चक्‍कर लगालयँ। उमनेक नगर केर चाइरो धार सातवाँ धाँव चक्‍कर लगायेक बादे, याजक गिला आपन तुरधुतु गिला के फुँकलयँ आर पालटन गिला डबल आँटे चिल्‍लालयँ।

तखन यरीहो केर चाइरो धार केर पाचीर गिला गिर गेलक! जेसन परमेश्‍वर आग्या दे रहे इस्राएली गिला नगर केर हर एक चीज के नास कइर देलयँ। उमन के राहाब आर उकर परिबार के छोइड़ देलयँ, जे इस्राएली गिला केर हिस्सा बइन जाय रहे। जखन कनान मेहेन रहइया दसर लोग गिला सुनलयँ कि इस्राएली गिला यरीहो के नास कइर दे आहयँ, तो उमन डराय गेलयँ कि इस्राएली लोग गिला उमनेक उपरउ हमला करबयँ।

परमेश्‍वर इस्राएली गिला के आग्या दे रहे कि कनान मेहेन रहइया कनअय जाइत गिला संगे समझौता नाइ करेक आहे। किन्तु गिबोनी नामेक एकटा कनानी जाइत केर लोग गिला यहोशू लेक झूठ कहलयँ कि उमन कनान लेक दूर एक जायगा केर रहइया हेकयँ। उमन यहोशू के उमनेक संगे शान्ति समझौता करे केर अर्जी करलयँ। यहोशू आर दसर इस्राएली अगुवा गिला परमेश्‍वर के नाइ पुछलयँ कि उमन के का करेक चाही। इकर बदली मेहेन, उमन गिबोनी गिला संगे शान्ति समझौता कइर लेलयँ।

तीन दिन केर बादे, इस्राएली गिला के पता हलक कि गिबोनी लोग गिला कनान मेहनेइ रहत रहयँ। उमन खिंसाय गेलयँ काहेकि गिबोनी गिला उमन के धोखा दे रहयँ। किन्तु उमन उमनेक संगे करल उ शान्ति समझौता के बनाय राखलयँ काहेकि उटा परमेश्‍वर केर पासे करल जाय रहे। तखन थोड़ेक समइ केर बादे, कनान मेहेन रहइया एकटा दसर जाइत, एमोरी गिला केर राजा गिला सुनलयँ कि गिबोनी गिला इस्राएली गिला संगे शान्ति समझौता कइर ले आहयँ, सेतेहें उमन आपन-आपन पालटन गिला के जामा कइर कहन एकटा बड़े पालटन गिलाक दल बनालयँ आर गिबोन उपरे हमला कइर देलयँ। गिबोनी गिला उमन केर साहेता करेक तेहें यहोशू केर पासे एकटा सन्देस पइठालयँ।

आखिर मेहेन यहोशू इस्राएली गिलाक पालटन गिला के जामा करलक आर गिबोनी गिला केर पासे पहँचेक तेहें गोटा राइत चललयँ। उनगुते उमन एमोरी गिलाक पालटन गिला के चकित कइर देलयँ आर उमनेक उपरे हमला कइर देलयँ।

उ दिन परमेश्‍वर इस्राएली गिलाक तेहें लड़लक। ऊ एमोरी गिला के डरुवाय देलक आर ऊ बड़े-बड़े पाखना पानी गिराय कहन ढेइरे एमोरी गिला के मराय देलक।

परमेश्‍वर सूरुज कउ आकास मेहेन एक जायगाय थिर कइर देलक ताकि इस्राएली गिला के काफी समइ पावाउक कि एमोरी गिला के पूरा पूरी हराय देउन। उ दिन, परमेश्‍वर इस्राएली गिलाक तेहें एकटा बड़े बिजइ पालक।

जखन परमेश्‍वर उ पालटन गिला के हरायेक बादे, ढेइरे कनानी जाइत केर लोग गिला इस्राएली गिलाक उपरे हमला कइर कहन उमन के सर्बनास कइर देलक।

इ लड़ाई गिलाक बादे, परमेश्‍वर इस्राएल केर हर एक गोत्र के परतिंगा केर उ देस मेहेन हिस्सा देलक। तखन परमेश्‍वर इस्राएली गिला के उमनेक सभे सीमान गिलाय शान्ति देलक।

जखन यहोशू बूढ़ा हय गेलक तो ऊ इस्राएल केर सभे लोग गिला के एके संगे डाकलक। तखन यहोशू उ लोग गिला के याइद करलक कि उमन जे उ वाचा केर पालन करे केर परतिंगा कइर रहयँ जे परमेश्‍वर उमनेक संगे सीनै पहाड़ उपरे बाँइध रहे। उ लोग गिला परमेश्‍वर केर प्रति बिसास लाइक रहेक आर उकर बेबस्था गिला केर पालन करे केर वादा करलक।