16. छुड़ाइया गिला

यहोशू केर मरेक बादे इस्राएली गिला परमेश्‍वर केर आग्या के नाइ मानलयँ। उमन परमेश्‍वर केर नियम गिला केर पालन नाइ करलयँ, आर उमन उ परतिंगा केर देस लेक बाँचल कनानी गिला के बाहिर कइर देलयँ। इस्राएली गिला आपन सच्‍चा परमेश्‍वर, यहोवा के छोइड़ कहन कनानी गिलाक देवता गिला केर उपासना करेक सुरु कइर देलयँ। इस्राएली गिला केर पासे कनअ राजा नाइ रहयँ, सेतेहें जेके जेटा बेस लागत रहे उमन उटाइ करलयँ।

परमेश्‍वर केर आग्या नाइ मानेक दाराय इस्राएली गिला एकटा पद्धति के सुरु कइर देलयँ जेटा कयो धाँव दहराल जाय रहे। इ पद्धति इ रकम चललक: थोड़े बछर तक इस्राएली गिला परमेश्‍वर केर आग्या गिला के मानबयँ, तखन ऊ उमन के उमनेक दुस्मन गिला लेक हरुवाय कहन दन्ड करी। इ दुस्मन गिला इस्राएली गिला लेक उमनेक जिनिस गिला के लुइट लेबयँ, उमनेक सम्पत्ति गिला के नास कइर देबयँ, आर उमनेक लेक बेजाइन लोग गिला के मराय देबयँ। फिन जखन इस्राएली गिला केर दुस्मन गिला उमनेक उपरे ढेइर बछर तक अत्याचार करबयँ, उकर बादे इस्राएली गिला आपन पाप गिलाक पछताप करबयँ आर परमेश्‍वर लेक उमन के बाँचायेक तेहें परथना करबयँ।

हरेक धाँव जखन इस्राएली गिला पछताप करबयँ तो परमेश्‍वर उमनके बाँचाइ। ऊ एकटा छोड़ाइया केर दाराय एसन करी – एकटा एसन लोग जे उमनेक दुस्मन गिला केर बिरुद्ध लड़ी आर उमन के हराय देइ। तखन देस मेहेन शान्ति हइ आर ऊ छोड़ाइया उमनेक उपरे बेस निहार सासन करी परमेश्‍वर उ लोग गिला के बाँचायेक तेहें ढेइरे छोड़ाइया गिला के पइठालक। परमेश्‍वर पासे केरेइ एकटा दुस्मन जाइत, मिद्यानी गिला केर दाराय इस्राएली गिला के हरुवायेक दाराय फिन एसन करलक।

मिद्यानी गिला सात बछर तक इस्राएली गिला केर फसल गिला के लुटलयँ। इस्राएली लोग गिला बेजाइन डराय जाय रहयँ, आर उमन पहाड़ लाता गिलाय लुइक गेलयँ ताकि मिद्यानी लोग गिला उमन के खजे ना पाउन। आखिर मेहेन, उमन के बाँचायेक तेहें उमन परमेश्‍वर के हाँकालयँ।

गिदोन नामेक एकटा इस्राएली पुरुस रहे। एक दिन, ऊ एकटा गुपुत स्थान मेहेन गेंहूँ मिसत रहे ताकि मिद्यानी लोग गिला उटा के चरायेक ना पारुन। यहोवा केर सरगदूत गिदोन केर पासे आय कहन उके कहलक, “ए शूरवीर सूरमा, परमेश्‍वर तर संगे आहे। जाहिन आर इस्राएली गिला के मिद्यानी गिला लेक बाँचाइन।”

गिदोन केर बाप केर पासे मूर्ति के समर्पित एकटा बेदी रहे। सउब लेक पहिल बात जे परमेश्‍वर गिदोन के करेक तेहें कहलक ऊ उ बेदी टा के तोड़ेक रहे। किन्तु गिदोन लोग गिला लेक डरात रहे, सेतेहें ऊ राइत हय केर इन्तजार करलक। तखन ऊ उ बेदी टाके तोइड़ कहन खँड़ा-खँड़ा कइर देलक। ऊ परमेश्‍वर केर तेहें एकटा नावा बेदी बनालक आर उटाय परमेश्‍वसर केर तेहें बलि चेढ़ालक।

आघु दिन बिहाने लोग गिला देखलयँ कि केउ बेदी टाके तोइड़ कहन खँड़ा-खँड़ा कइर दे आहयँ, सेतेहें उमन बेजाइन खिंसालयँ। उमन गिदोन के मरायेक तेहें उकर घर गेलयँ, किन्तु गिदोन केर बाप कहलक, “तोहरे काहे आपन देवता केर साहेता करे केर कोसिस करताहा? जदि ऊ देवता हेके हले उके आपन सुरक्षा खुद करेक देवा!” काहेकि ऊ एसन कहलक सेतेहें लोग गिला गिदोन के नाइ मरालयँ।

तखन इस्राएली गिला के लुटेक तेहें मिद्यानी गिला फिन आलयँ। उमन एतना बेसी रहयँ कि उमनेक गिनतीयो नाइ करे पारातक। गिदोन उमनेक बिरुद्ध लड़ेक तेहें इस्राएली गिला के एके संगे डाकलक। गिदोन परमेश्‍वर ले दुइटा चिन्हा केर माँग करलक ताकि उके बिसास हय जाउक कि परमेश्‍वर सच मेहेन उके इस्राएली गिला के बाँचायेक तेहें कहतेहे।

पहिला चिन्हा केर तेहें, गिदोन एकटा भेड़ी केर ऊन के भूँईये राइख कहन परमेश्‍वर के कहलक, कि बिहान केर सित पानी केबल भेड़ी केर उ चुइल (ऊन) उपरे पड़ुक आर भूँईये ना पड़ुक। परमेश्‍वर एसनेइ करलक। आघुक राइते, ऊ परमेश्‍वर के कहलक कि भूँई भिंजुक किन्तु भेड़ी केर चुइल (ऊन) सुखल रहुक। परमेश्‍वर एसनेइ करलक। इ दुइटा चिन्हा गिला केर चलते, गिदोन बिसास करलक कि परमेश्‍वर सच मेहेन चाहेला कि ऊ इस्राएली के मिद्यानी गिला लेक बाँचाउक।

तखन गिदोन पालटन गिला के आपन पासे डाकलक आर 32,000 पुरुस गिला आलयँ। किन्तु परमेश्‍वर उके कहलक कि इमन बेजाइन सांगी आहयँ। सेतेहें गिदोन उ सउब 22,000 के घर वापिस पइठाय देलक जे गिला लड़ेक ले डरात रहयँ। परमेश्‍वर गिदोन के कहलक कि इ पुरुस गिला एखनअ बेजाइन सांगी रहयँ। सेतेहें गिदोन 300 पालटन गिला के छइड़ कहन उ सउब के घर पइठाय देलक।

उ राइते परमेश्‍वर गिदोन के कहलक, “मिद्यानी गिला केर छावनी मेहेने जाहिन आर उमन के कथा करत के सुनिन। जखन तयँ सुनबे कि उमन का कथा करतहयँ तो तयँ उमनेक उपरे हमला करेक लेक ना डराबे।” सेतेहें उ राइते, गिदोन हेंठे उमनेक छावनी मेहेन गेलक आर ऊ एकटा मिद्यानी पालटन के आपन संगी के उ कथा कइह देत के सुनलक जे स्वपन मेहेन देइख रहे। उ पुरुस केर संगी टा कहलक, “इ स्वपन केर माने हेके कि गिदोन केर पालटन गिला हामरे मिद्यानी पालटन गिला के हराय देइ!” जखन गिदोन इटा सुनलक तो ऊ परमेश्‍वर केर स्तुति करलक।

तखन गिदोन आपन पालटन गिलाक पासे घुरलक आर उमन लेक हर एक झन के एकुकटा तुरधुतु, हाँड़ी, आर बम्बारु देलक। उमन उ छावनी टाके घेइर लेलयँ जहाँ मिद्यानी पालटन गिला निदात रहयँ। गिदोन केर 300 पालटन गिला आपन बम्बारु गिला के हाँड़ी लेक ढाँपल राइख रहयँ सेतेहें मिद्यानी लोग गिला उ बम्बारु गिला केर आलो के नाइ देइख पाय रहयँ।

तखन गिदोन केर सउब पालटन गिला आपन हाँड़ी गिला के एके धाँवे अचकाय बम्बारु गिला केर आइग के परगट कइर देलयँ। उमन आपन तुरधुतु गिला के फुँकलयँ आर चिल्‍लालयँ, “यहोवा केर तलवाइर आर गिदोन केर तलवाइर!”

परमेश्‍वर मिद्यानी गिला के डरुवाय देलक, सेतेहें उमन एक दसर के मारे लागलयँ। तुरतेइ, गिदोन उ सन्देसवाहक गिला के ढेइर दसर इस्राएली के डाकेक तेहें पइठालक कि उमन मिद्यानी गिला केर पीछा करेक मेहेन साहेता करुन। उमन उमनेक मइध लेक ढेइर लोग गिला के मराय देलयँ आर बाकी गिला केर पीछा कइर उमन के इस्राएल देस लेक बाहिर कइर देलयँ। उ दिन 1,20,000 मिद्यानी गिला माराय गेलयँ। इ निहार परमेश्‍वर इस्राएली गिला के बाँचालक।

उ लोग गिला गिदोन के आपन राजा बनायेक चाहत रहयँ, किन्तु गिदोन उमन के एसन करेक नाइ देलक, लेकिन ऊ उमन लेक उ सोना केर आभूषण गिला के माँगलक जेटा उमनेक मइध लेक हर एक झन मिद्यानी गिला के लुइट रहयँ। उ लोग गिला बेजाइन मात्रा मेहेन गिदोन के सोना देलयँ।

तखन गिदोन उ सोना गिला लेक एकटा खास पोसाक बनालक जेसन कि महायाजक पिंधत रहे। किन्तु लोग गिला उकर उपासना करेक सुरु कइर देलयँ जेसन कि ऊ एकटा मूर्ति हेके। तखन परमेश्‍वर फिन इस्राएली गिला के दन्ड देलक काहेकि उमन मूर्ति केर उपासना कइर रहयँ। परमेश्‍वर उमनेक दुस्मन गिला के उमन के हरायेक तेहें सक्षम करलक। आखिर मेहेन उमन फिन परमेश्‍वर लेक साहेता करेक तेहें परथना करलयँ, आर परमेश्‍वर उमनेक पासे उमन के बाँचायेक तेहें एकटा दसर छोड़ाइया के पइठालक।

एहे कथा टा कयो धाँव घटित हलक, इस्राएली लोग गिला पाप करबयँ, परमेश्‍वर उमन के दन्ड देइ, उमन पछताप करबयँ, आर परमेश्‍वर उमन के छोड़ायेक तेहें केकउ के पइठाइ। ढेइर बछर तक, परमेश्‍वर ढेइरे छोड़ाइया गिला के पइठालक जे इस्राएली गिला के उमनेक दुस्मन गिला लेक बाँचालक।

आखिर मेहेन, उ लोग गिला दसर देस गिला निहार परमेश्‍वर लेक निजेक तेहें एकटा राजा केर माँग करलयँ। उमन एकटा एसन राजा के चाहत रहयँ जे लम्बा आर सक्तिसाली हउक, आर जे लड़ाई मेहेन उमन केर अगुवाई करे पारुक। परमेश्‍वर के इ अर्जी टा बेस नाइ लागलक, किन्तु ऊ उमन के असने राजा देलक जेसन उमन माँग कइर रहयँ।