17. दाऊद केर संगे परमेश्‍वर केर वाचा

शाऊल इस्राएल केर पहिला राजा रहे। ऊ लम्बा आर सुन्दर रहे, जेसन उ लोग गिला चाहत रहयँ एकदम असनेइ। इस्राएल उपरे आपन सासन केर पहिलेक थोड़ेक बछर गिलाय शाऊल एकटा बेस राजा रहे। किन्तु बाद मेहेन ऊ एकटा दुस्ट अदमी बइन गेलक जे परमेश्‍वर केर कथा गिला के नाइ मानलक, सेतेहें परमेश्‍वर एकटा दसर अदमी के चुनलक जे कि एक दिन उकर जायगा मेहेन राजा बनी।

परमेश्‍वर दाऊद नामेक एकटा जुवान इस्राएली पुरुस के चुइन कहन एक दिन शाऊल केर जायगा मेहेन राजा हयेक तेहें तेयारी करेक सुरु करलक। दाऊद बैतलहम नगर केर एकटा चरवाह रहे। कयो धाँव, दाऊद सिंह आर भालू दुइयो के माइर दे रहे काहेकि दाऊद चरवाहाइ करत समय उकर बाप केर भेड़ी गिलाय हमला कइर रहयँ। दाऊद एकटा नम्र आर धरमी अदमी रहे। ऊ परमेश्‍वर उपरे भरसा करलक आर उकर कथा गिला के मानलक।

जखन दाऊद एखन जुवाने रहे, ऊ लम्बा-चौड़ा गोलियत केर बिरुद्ध लडाई करलक। गोलियत एकटा बेजाइन बेस पालटन रहे। ऊ बेजाइन मजबूत आर करिबन तीन मीटर लम्बा रहे! किन्तु परमेश्‍वर गोलियत के मरायेक आर परनेश्‍वर इस्राएल के बाँचायेक तेहें दाऊद केर साहेता करलक। इकर बादे, दाऊद इस्राएल केर दुस्मन गिलाय कयो धाँव जीत हाँसिल करलक। दाऊद एकटा बड़े पालटन बइन गेलक, आर ऊ बेजाइन लड़ाई गिलाय इस्राएली पालटन गिला केर अगुवाई करलक। लोग गिला उकर बेजाइने परसंसा करलयँ।

लोग गिला दाऊद के एतना दुलार करलयँ कि शाऊल उकर लेक हिसिंगा करे लागलक। आखिर मेहेन शाऊल उके माइर देक चाहत रहे, सेतेहें दाऊद उकर लेक आर उकर पालटन गिला लेक छिपेक तेहें बने भाइग गेलक। एक दिन, जखन शाऊल आर उकर पालटन गिला दाऊद केर खोज मेहेन रहयँ तो शाऊल एकटा पहाड़ लाता मेहेन गेलक। इटा अहे लाता रहे जेटाय दाऊद छिपल रहे, किन्तु शाऊल उके नाइ देखलक। दाऊद शाऊल केर पेछु वाटे लेक उकर पासे चइल गेलक आर उकर लूगा के एक खँड़ा काइट लेलक। बादे, जखन शाऊल उ लाता लेक बाहरालक तो दाऊद उके हाँकाय कहन उ लूगा केर खँड़ा टाके देखालक। इ रकम लेक, शाऊल जाइन गेलक कि दाऊद राजा बनेक तेहें उके मराय देक लेक इंकार कइर दे आहे।

थोड़ेक बछर केर बादे, शाऊल लड़ाई मेहेन मइर गेलक, आर दाऊद इस्राएल केर राजा बइन गेलक। ऊ एकटा बेस राजा रहे, आर लोग गिला उकर संगे प्रेम करे लागलयँ। परमेश्‍वर दाऊद के आसिरबाद लेक भइर देलक आर उके सफल बनालक। दाऊद कयोटा लड़ाई लड़लक, आर परमेश्‍वर इस्राएल केर दुस्मन गिला के हराय देक मेहेन उकर साहेता करलक। दाऊद यरुशलेम नगर के जीत कहन उटा के आपन राजधानी बनालक, जहाँ ऊ रहलक आर सासन करलक। दाऊद चालीस बछर तक राजा रहे। इ समइ केर दौरान, इस्राएल गिला सामर्थी आर धनीमान बइन गेलयँ।

दाऊद एकटा मन्दिर बनाय चाहत रहे जहाँ सभे इस्राएली गिला परमेश्‍वर केर आराधना करे पारयँ आर उकर तेहें बलिदान चेढ़ाय पारयँ। करिबन 400 बछर लेक, उ लोग गिला मूसा केर बनाल मिलापवाला तम्बु मेहेन परमेश्‍वर केर आराधना करत रहयँ आर उकर तेहें बलिदान चेढ़ात रहयँ।

किन्तु हुआँ नातान नामेक एकटा भबिस्यबक्ता रहे। परमेश्‍वर उके दाऊद के इटा कहेक तेहें पइठालक: “तयँ बेजाइन लड़ाई लइड़ आहिस, सेतेहें तयँ मर खातिर इ मन्दिर के नाइ बनाबे। तर बेटा इके बनाइ। तेउ, मयँ तके बेजाइन बेसी आसिरबाद लेक भइर देमुँ। तर एकटा बंसज हमेसा केर तेहें मर लोग गिलाक उपरे राजा केर रुप मेहेन सासन करी।” हमेसा केर तेहें सासन करइया ऊ दाऊद केर एकमात्र बसंज मसीह रहे। मसीह परमेश्‍वर केर चुनल जन रहे जे संसार केर लोग गिला के उमनेक पाप गिला केर दन्ड लेक बाँचाइ।

जखन दाऊद नातान केर सन्देस के सुनलक तो ऊ परमेश्‍वर के धन्यवाद देलक आर उकर स्तुति करलक। परमेश्‍वर उकर मान-सम्मान के बढ़ात रहे आर ढेइरे आसिरबाद गिला देत रहे। बेशक, दाऊद नाइ जानत रहे कि परमेश्‍वर इ कथा गिला के कबे करी। इ समइ हामरे नाइ जानिला कि इस्राएली गिला के एकटा लम्बा समइ तक, करिबन एक हजार बछर तक मसीह केर आयेक केर इन्तजार करेक हइ।

दाऊद कयो बछर तक न्यायपूर्बक आपन लोग गिलाक उपरे सासन करलक। ऊ इमानदारी लेक परमेश्‍वर केर कथा गिला के मानलक आर परमेश्‍वर उके आसिरबाद लेक भइर देलक। हालाँकि, आपन जीबन केर आखिर मेहेन ऊ परमेश्‍वर केर बिरुद्ध भयानक पाप कइर रहे।

एक दिन दाऊद निजेक महल लेक बाहिर हुलकलक आर एकटा सुन्दर बेटी छुवा के नहात के देखलक। ऊ उके नाइ जानत रहे, लेकिन उके पता लगाय लेलक कि उकर नाम बतशेबा रहे।

आपन नजइर के घुरायेक बदली, दाऊद उके आपन पासे आनेक तेहें केकउ के पइठालक। ऊ उकर संगे सुतलक आर उके आपन घर पइठाय देलक। थोड़ेक दिन केर बादे बतशेबा इटा कइह कहन दाऊद केर पासे सन्देस पइठालक कि ऊ भारी गात मेहेन आहँ।

बतशेबा केर पति ऊरिय्याह नामेक एकटा अदमी रहे। ऊ दाऊद केर बेस पालटन गिलाक मइधे एक झन रहे। इ समइ ऊ लड़ाई करेक तेहें बाहिर जाय रहे। दाऊद ऊरिय्याह के लड़ाई लेक वापिस डाइक कहन उके आपन पत्नी केर संगे रहेक तेहें कहलक। किन्तु दसर पालटन गिला लड़ाई मेहेन रहयँ सेतेहें ऊरिय्याह घर जाय लेक इंकार कइर देलक। आखिर मेहेन दाऊद ऊरिय्याह के वापिस लड़ाई मेहेन पइठाय देलक आर सेनापति के उके लड़ाई मेहेन एसन जायगाय राखेक तेहें कहलक जहाँ दुस्मन सउब लेक सक्तिसाली हउन ताकि ऊ माराय जाउक। तो एसन हलक कि ऊरिय्याह लड़ाई मेहेन माराय गेलक।

ऊरिय्याह केर लड़ाई मेहेन मइर जायेक बादे दाऊद बतशेबा के बिहा कइर लेलक। बादे, ऊ दाऊद केर बेटा के जनम देलक। दाऊद जेटा करलक उटा लेक परमेश्‍वर बेजाइन बेसी खिंसाल रहे, सतेहें ऊ नातान भबिस्यबक्ता के दाऊद के इटा बतायेक तेहें पइठाल कि उकर पाप कतना खराब रहे। दाऊद आपन पाप केर तेहें पछताप करलक आर परमेश्‍वर उके छमा कइर देलक। आपन बाँचल जीबन मेहेन, आपन कठिन समइ मेहनउ दाऊद परमेश्‍वर केर पेछु-पेछु चललक आर उकर कथा के मानलक।

किन्तु दाऊद केर छुवा मइर गेलक। इ रकम परमेश्‍वर दाऊद के दन्ड देलक। इकर अलावा, दाऊद केर मरेक तक, उकर परिबार केर थोड़ेक लोग गिला उकर बिरुद्ध लड़ाई करलयँ, आर दाऊद केर आपन सक्ति कम हय जाय रहे। किन्तु परमेश्‍वर बिसास लाइक रहे आर एखनउ ऊ उटा करलक जे ऊ दाऊद लेक करे केर वादा कइर रहे कि ऊ करी, भलेइ दाऊद उकर आग्या के नाइ माइन रहे। बादे, दाऊद आर बतशेबा केर दसर छुवा उत्पन्‍न हलक, आर उमन उकर नाम सुलेमान राखलयँ।