18. बाँटल राइज

दाऊद राजा चालीस बछर तक सासन करलक। जखन ऊ मइर गेलक, आर उकर बेटा सुलेमान इस्राएल मेहेन सासन करेक सुरु करलक। परमेश्‍वर सुलेमान संगे कथा करलक आर उके पुछलक कि ऊ सउब लेक बेसी का चाहेला कि परमेश्‍वर उकर खातिर करुक। सुलेमान परमेश्‍वर लेक माँगलक कि ऊ उके बेजाइन बुद्धिमान बनाय देउक। इ कथा लेक परमेश्‍वर खुस हलक, सेतेहें परमेश्‍वर सुलेमान के संसार केर सउब लेक बेसी बुद्धिमान पुरुस बनाय देलक। सुलेमान ढेइर कथा गिला के सिखलक आर ऊ एकटा बुद्धिमान सासन करइया रहे। परमेश्‍वर उके बेजाइन धनीमानो बनाय दे रहे।

यरुशलेम मेहेन सुलेमान उ मन्दिर के बनालक जेटाक तेहें उकर बाप जोजना बनाय रहे आर सामान गिला के जामा कइर रहे। एधाँव लोग गिला मिलापवाला तम्बु केर बदली मन्दिर मेहेन परमेश्‍वर केर आराधना करत रहयँ आर उकर तेहें बलि चेढ़ात रहयँ। परमेश्‍वर आय कहन मन्दिर मेहेन उपस्थित रहत रहे, आर हुआँ ऊ आपन लोग गिला संगे बासा करत रहे।

किन्तु सुलेमान दसर देस केर जनी गिला संगे प्रेम करलक। ऊ ढेइरे, करिबन एक हजार जनी गिला के बिहा कइर कहन परमेश्‍वर केर आग्या के पालन नाइ करलक! इमनेक मइध लेक ढेइर जनी गिला दसर देस लेक आलयँ आर आपन संगे आपन देवता गिला के आनलयँ आर उमनेक उपासना करेक जारी राखलयँ। जखन सुलेमान बूढ़ा हय गेलक तो उहउ उमनेक देवता गिला केर उपासना करलक।

एहे चलते परमेश्‍वर सुलेमान लेक खिंसाल रहे। ऊ कहलक कि ऊ इस्राएल देस के दुइटा राइज मेहेन बिभाजित करेक दाराय उके दन्ड देइ। ऊ सुलेमान केर मरेक बादे एसन करी।

सुलेमान केर मरेक बादे, रहबाम राजा बनलक। इस्राएल देस केर सउब लोग गिला उके आपन राजा केर रुप मेहेन स्वीकार करेक तेहें एके संगे जामा हलयँ। उमन रहबाम लेक सिकायत करलयँ कि सुलेमान उमन लेक बेजाइन कठिन कस्टो करुवाय रहे आर बेजाइन मासुल ले रहे। उमन रहबाम लेक अर्जी करलयँ कि उकर लेक कमे काम करुवाइन।

किन्तु रहबाम उमन के बेजाइन मुर्खता लेक जबाब देलक, “तोहरे कहाला कि मर बा सुलेमान तोहरे लेक कठिन कस्टो करुवालक। किन्तु मयँ तोहरे के उकर लेकउ बेसी पीड़ित करमुँ।”

जखन लोग गिला उके एसन कहत के सुनलयँ तो उमनेक मइध लेक ढेइर लोग गिला उकर बिरुद्ध बलवा करलयँ। दस टा गोत्र केर लोग गिला उके छोइड़ देलयँ; उकर संगे एधाँव केबल दुइटा गोत्र केर लोग गिलाइ बाँचलक। इ दुइटा गोत्र केर लोग गिला खुद के यहूदा केर राइज कहलयँ।

बाकी दस गोत्र केर लोग गिला यारोबाम नामेक एकटा पुरुस के आपन राजा बनाय लेलयँ। इ गोत्र केर लोग गिला देस केर उत्तर-पुर्बी हिस्सा मेहेन रहयँ। उमन खुद के इस्राएल केर राइज कहलयँ।

किन्तु यारोबाम परमेश्‍वर केर बिरुद्ध बलवा करलक आर लोग गिला के पाप करुवालक। ऊ आपन लोग गिला केर दाराय उपासना करेक तेहें दुइटा मूर्ति के बनालक। उमन एधाँव यहूदा केर राइज मेहेन यरुशलेम मेहेन परमेश्‍वर केर मन्दिर मेहेन उकर आराधना करेक तेहें नाइ गेलयँ।

यहूदा आर इस्राएल केर राइज आपस मेहेन दुस्मन बइन गेलयँ, आर कबउ-कबउ एक दसर केर बिरुद्ध लड़े लागलयँ।

इस्राएल केर नावा राइज मेहेन, सभे राजा गिला दुस्ट रहयँ। इमनेक मइध लेक कयोटा राजा गिला उमनेक जायगा मेहेन राजा बनेक चाह राखइया दसर इस्राएली गिला केर दाराय माराय जाय रहयँ।

इस्राएल राइज केर सभे राजा गिला आर अधिकतर लोग गिला मूर्ति गिला केर उपासना करलयँ। जखन उमन एसन करलयँ, तो उमन खने-खने रन्डी गिला संगे सुतलयँ आर हिआँ तक कि कयो धाँव मूर्ति गिला केर आघुवे छुवा गिला के बलियो करलयँ।

यहूदा राइज केर राजा गिला, दाऊद केर बंसज रहयँ। इ राजा गिलाक मइध लेक थोड़ेक बेस लोग रहयँ जे गिला न्यायपूर्बक सासन करलयँ आर परमेश्‍वर केर आराधना करलयँ। किन्तु यहूदा केर अधिकतर राजा गिला दुस्ट रहयँ। उमन दुस्टता लेक सासन करलयँ, आर मूर्ति गिला केर उपासना करलयँ। हिआँ तक कि इमनेक मइध लेक थोड़ेक राजा गिला झूठा देवता गिला केर आघुवे आपन छुवा गिला कउ बलि कइर देलयँ। यहूदा केर अधिकतर लोग गिलाउ परमेश्‍वर केर बिरुद्ध बलवा करलयँ आर दसर देवता गिला केर उपासना करलयँ।