19. भबिस्यबक्ता

परमेश्‍वर हमेसा इस्राएली गिला केर पासे भबिस्यबक्ता गिला के पइठाते रहत रहे। भबिस्यबक्ता परमेश्‍वर लेक सन्देस गिला के सुनत रहयँ आर फिन उटा लोग गिला के बतात रहयँ।

जखन अहाब इस्राएल राइज केर राजा रहे तो उ समइ एलिय्याह भबिस्यबक्ता रहे। अहाब एकटा दुस्ट लोग रहे। ऊ झूठा बाल नामेक देवता केर उपासना करुवायेक तेहें लोग गिला के बिबस करत रहे। सेतेहें एलिय्याह अहाब के कहलक कि परमेश्‍वर उ लोग गिला के दन्डित करे जात रहे। ऊ उके कहलक, “जखन तक मयँ फिन बारिस हयेक तेहें नाइ कहमुँ तखन तक इस्राएल केर राइज मेहेन ना बारिस हइ आर ना सित गिराइ।” इ कथा टा अहाब के एतना खिंसा करुवालक कि ऊ एलिय्याह के मराय दे केर निर्नय करलक।

सेतेहें परमेश्‍वर एलिय्याह के कहलक कि ऊ बन मेहेन जाय कहन अहाब लेक छिप जाउक। एलिय्याह बन मेहेन उ सतिया केर पासे गेलक जहाँ जायेक तेहें परमेश्‍वर उके कइह दे रहे। हर बिहान आर सांझ, चरइ गिला एलिय्याह केर तेहें पिठा आर माँस ले कहन आत रहयँ। इ सम्पूर्न समइ, अहाब आर उकर पालटन गिला एलिय्याह केर खोज करते रहलयँ, किन्तु उमन उके खोजे नाइ पालयँ।

बारिस नाइ हयेक लेक कुछ समइ केर बादे उ सतिया टा सुइख गेलक। सेतेहें एलिय्याह पासेइ एकटा देस मेहेन चइल गेलक। उ देस मेहेन एकटा राँड़ी बेटी छुवा रहे जेकर एकटा बेटा रहे। उमनेक पासे खायेक टा करिबन सिराय जाय रहे काहेकि हुआँ कनअ फसन नाइ हय रहे। किन्तु तेउ, उ बेटी छुवा टा एलिय्याह केर देखभाल करलक, सेतेहें परमेश्‍वर उकर आर उकर बेटा केर जरुरत गिला के पूरा करलक, एहे चलते उकर आटा केर हाँड़ी आर उकर तेल केर कुप्पी कबउ खाली नाइ हलक। उ समुचा अकाल केर समइ उमनेक पासे खायेक रहे। एलिय्याह कुछ बछर तक हुआँ रहलक।

साढ़े तीन बछर केर बादे, परमेश्‍वर एलिय्याह के कहलक कि ऊ फिन बारिस करी। ऊ एलिय्याह के वापिस इस्राएल केर राइज मेहेन जाय कहन अहाब संगे कथा करेक तेहें कहलक। सेतेहें एलिय्याह अहाब केर पासे गेलक। जखन अहाब उके देखलक तो ऊ कहलक, “अच्छा तयँ हेकिस, मुसीबत सिरजइया!” एलिय्याह जबाब देलक, “मुसीबत सिरजइया तो तयँ हेकिस! तयँ यहोवा के छोइड़ दे आहिस। ओहे सच्चा परमेश्‍वर हेके, लेकिन तयँ बाल केर उपासना करतिहिस। एधाँव तके इस्राएल राइज केर सउब लोग गिला के कर्मेल नामेक पहाड़ उपरे ले कहन आयेक आहे।”

सेतेहें सउब लोग गिला कर्मेल पहाड़ मेहेन गेलयँ। उ पुरुस गिलाउ आलयँ जे कहत रहयँ कि उमन बाल केर सन्देस गिला के बोलयलाँ। इ गिला बाल केर भबिस्यबक्ता रहयँ। इ सउब साढ़े चाइर सअ रहयँ। एलिय्याह लोग गिला के कहलक, “कबे तक तोहरे आपन मन गिला फिराय राखबा? जदि यहोवा परमेश्‍वर हेके हले उकर आराधना करा! जदि बाल परमेश्‍वर हेके हले उकर उपासना करा!”

तखन एलिय्याह बाल केर भबिस्यबक्ता गिला के कहलक, “एकटा बरद के बलि कइर कहन उकर माँस के बलिदान हयेक तेहें एकटा बेदी उपरे राखा, किन्तु आइग ना लगाबा। उकर बादे मयों ओसनेइ करमुँ, आर एकटा अलग बेदी उपरे मयँ उ माँस टाके राखमुँ। तखन जदि परमेश्‍वर बेदी उपरे आइग गिरायला हले तोहरे जाइन लेबा कि ऊ सच्‍चा परमेश्‍वर हेके।” तखन बाल केर भबिस्यबक्ता गिला एकटा बलि के तेयार करलयँ किन्तु आइग नाइ लगालयँ।

तखन बाल केर भबिस्यबक्ता गिला बाल लेक पारथना करलयँ, “ए बाल, हामरेक सनिन!” गोटा दिन उमन पारथना करलयँ आर चिल्‍लालयँ आर हिआँ तक कि खुद के चाकू गिलालेक काटाय लेलयँ, किन्तु बाल जबाब नाइ देलक, आर ऊ कनअ आइग नाइ गिरालक।

बाल केर भबिस्यबक्ता गिला बाल लेक पारथना करेक मेहेन करिबन गोटा दिन बिताय देलयँ। आखिर मेहेन उमन पारथना करेक हका कइर देलयँ। तखन एलिय्याह दसर बरद केर माँस के परमेश्‍वर केर बेदी उपरे राइख देलक। उकर बादे, ऊ लोग गिला के पानी के बड़े हाँड़ी लेक बलिदान बेदी उपरे तखन तक उझलेक तेहें कहिन जखन तक कि माँस, काठी गिला, आर हिआँ तक कि बेदी केर आसे-पासेक भूँईटा पूरापूरी भिंज ना जाउक।

तखन एलिय्याह पारथना करलक, “ए यहोवा, अब्राहम, इसहाक, आर याकूब केर परमेश्‍वर, हामरे के देखाइन कि तयँ इस्राएल केर परमेश्‍वर हेकिस आर इटा कि मयँ तर धाँगर हेकँ। मके जबाब देहिन कि इ लोग गिला जाइन लेबयँ कि तयें सच्‍चा परमेश्‍वर हेकिस।”

तुरतेइ, आकास लेक आइग गिरलक आर ऊ माँस, काठी गिला, पाखना गिला, माटी, आर हिआँ तक कि बेदी केर आसे-पासेक पानी कउ जलाय देलक। जखन लोग गिला इटा देखलयँ, उमन भूँईये गिर गेलयँ आर कहलयँ, “यहोवाइ परमेश्‍वर हेके! यहोवाइ परमेश्‍वर हेके!”

तखन एलिय्याह कहलक, “बाल केर एकटाउ भबिस्यबक्ता बाँइच कहन ना जाय पाउन!” सेतेहें लोग गिला बाल केर भबिस्यबक्ता गिला के धइर लेलयँ आर उमन के हुआँ लेक अलग ले गेलयँ आर उमन के माइर देलयँ।

तखन एलिय्याह अहाब राजा के कहलक, “चाँड़े आपन घर भाइग जाहिन, काहेकि बारिस हवइया आहे।”‍ चाँड़ेइ बादइर चेइढ़ आलक, आर भारी बारिस सुरु हय गेलक। यहोवा उ सुखा के सिराय देत रहे। इटा लेक परगट हलक कि यहोवाइ सच्‍चा परमेश्‍वर हेके।

जखन एलिय्याह आपन काम के सिराय देलक, तो परमेश्‍वर एलिशा नामेक एकटा पुरुस के आपन भबिस्यबक्ता हयेक तेहें चुनलक। परमेश्‍वर एलीशा के माध्यम लेक ढेइरे चमत्कार करलक। एकटा चमत्कार नामान केर संगे हलक। ऊ एकटा दुस्मन केर पालटन केर सरदार रहे, किन्तु उके चाम केर एकटा खराब रोग हय रहे। नामान एलीशा केर बारे सुनलक, सेतेहें ऊ एलीशा केर पासे आलक आर उकर लेक बेस करेक तेहें अर्जी करलक। एलीशा नामान के कहलक कि जाय कहन यरदन नदी केर पानी मेहेन सात धाँव डुबकी लगाय लेहिन।

नामान खिंसाय गेलक। ऊ एसन करेक लेक इंकार कइर देलक, काहेकि इटा उके मुरुखपन केर काम लागत रहे। किन्तु बादे ऊ आपन मन बदइल लेलक आर जाय कहन यरदन नदी केर पानी मेहेन सात धाँव डुबकी लगालक। जखन आखरी धाँव ऊ पानी लेक बाहिर बाहरलक तो परमेश्‍वर उके बेस कइर देलक।

परमेश्‍वर इस्राएल केर लोग गिलाक पासे दसर ढेइरे भबिस्यबक्ता के पइठालक। उ सउब लोग गिला के मूर्ति गिला केर उपासना करेक हका करेक तेहें कहलयँ। इकर बदली, उमन के एक दसर संगे न्यायपूर्बक बेबहार करेक चाही आर एक दसर उपरे दया करेक चाही। उ भबिस्यबक्ता गिला लोग गिला के चेतावनी देलयँ कि उमन के खराब काम गिला के करेक बन्द कइर देक आहे आर इकर बदली परमेश्‍वर केर कथा गिला केर पालन करेक आहे। जदि उ लोग गिला एसन नाइ करबयँ हले परमेश्‍वर उमन के दोसी माइन कहन उमनेक न्याय करी, आर उमन के दन्ड देइ।

अधिकांश समइ, उ लोग गिला परमेश्‍वर केर आग्या केर पालन नाइ करलयँ। खने खने उमन भबिस्यबक्ता गिला केर संगे खराब बेबहार करलयँ आर हिआँ तक कि कखनअ कखनअ उमन के मराय देलयँ। एक धाँव, उमन यिर्मयाह भबिस्यबक्ता के सूखल कुआँ मेहेन डाइल देलयँ आर उके हुआँ मरेक तेहें छोइड़ देलयँ। उ कुआँ केर हेंठे कादो मेहेन धँइस गेलक। लेकिन तखन राजा के उकर उपरे दया आलक आर ऊ आपन पालटन गिला के आदेस देलक कि यिर्मयाह के मरेक लेक पहिले उके कुआँ लेक बाहिर टाइन लेवा।

भबिस्यबक्ता गिला परमेश्‍वर बाटे लेक कहेक जारी राखलयँ भलेइ लोग गिला उमन लेक नफरत करलयँ। उमन लोग गिला के चेतावनी देलयँ कि जदि उमन पछताप नाइ करलयँ हले परमेश्‍वर उमन के नास कइर देइ। उमन लोग गिला के इटाउ याइद करुवालयँ कि परमेश्‍वर उमनेक पासे मसीह के पइठायेक केर परतिंगा कइर आहे।