20. बंधुआई आर घुरेक

इस्राएल केर राइज आर यहूदा केर राइज दुइयो परमेश्‍वर केर बिरुद्ध पाप करलयँ। उमन उ वाचा के तोइड़ देलयँ जेटा परमेश्‍वर उमनेक संगे सीनै पहाड़ मेहेन बाँइध रहे। परमेश्‍वर उमन के पछताप करेक आर फिन उकर आराधना करेक तेहें चेतावनी देक तेहें आपन भबिस्यबक्ता के पइठालक, किन्तु उमन उमनेक कथा गिला के मानेक लेक इंकार कइर देलयँ।

सेतेहें परमेश्‍वर उमनेक दुस्मन गिला के उमन के नास करेक मेहेन सक्षम करेक दाराय दुइयो राइज के दन्ड देलक। अश्शूर एकटा दसर देस रहे जे बेजाइन सक्तिसाली हय जाय रहे। उ दसर देस गिला केर प्रति बेजाइन निर्दयी रहे। उमन आय कहन इस्राएल केर राइज के नास कइर देलयँ। अश्शूरी गिला आय कहन इस्राएली केर राइज मेहेन ढेइर लोग गिला के मराय देलयँ, जेटा चाहलयँ उटा लुइट लेलयँ, आर देस केर कयो हिस्सा के जलाय देलयँ।

अश्शूरी गिला सउब अगुवा गिला, धनीमान गिला, आर एसन लोग गिला के जे किमती जिनिस गिला के बनाय पारत रहयँ एके संगे जामा करलयँ आर उमन उमन के अश्शूर देस मेहेन ले गेलयँ। इस्राएल मेहेन केबल थोड़ेक गरीब इस्राएली गिलाइ बाँचलयँ।

फिन अश्शूरी लोग गिला उ देस मेहेन रहेक तेहें बिदेसी गिला के ले कहन आलयँ। उ बिदेसी गिला उ नगर गिला के फिन बनालयँ। जे इस्राएली गिला हुआँ बाँचल रहयँ उमन लेक बिहा करलयँ। इ लोग गिला केर बंसज गिला सामरी कहालयँ।

यहूदा केर राइज केर लोग गिला देखलयँ कि केसन परमेश्‍वर उकर उपरे बिसास नाइ करेक आर उकर कथा गिला के नाइ मानेक चलते इस्राएल केर राइज केर लोग गिला के दन्ड दे रहे। किन्तु तेउ उमन कनानी गिलाक देवता गिला केर मूर्ति गिला केर उपासना करलयँ। परमेश्‍वर उमन के चेतावनी देक तेहें भबिस्यबक्ता गिला के पइठालक, किन्तु उमन सुनेक लेक इंकार कइर देलयँ।

करिबन एक सअ बछर केर बादे अश्शूरी गिला इस्राएल केर राइज के नास कइर देलयँ। परमेश्‍वर बेबीलोन केर राजा, नबुकदनेस्सर के यहूदा केर राइज उपरे हमला करेक तेहें पइठालक। बेबीलोन एकटा सक्तिसाली देस रहे। यहूदा केर राजा नबूकदनेस्सर केर गुलामी बनेक आर हर एक बछर उके बेजाइन बेसी धन केर भुगतान करेक तेहें सहमत हय गेलयँ।

किन्तु कुछ बछर केर बादे, यहूदा केर राजा बेबीलोन केर बिरुद्ध बलवा करलक। सेतेहें बेबीलोनी गिला फिन आय कहन यहूदा केर राइज उपरे हमला कइर देलयँ। उमन यरुशलेम नगर उपरे कब्जा कइर लेलयँ, मन्दिर के नास कइर देलयँ, आर नगर आर मन्दिर केर खजाना के लुइट ले गेलयँ।

बलवा करेक चलते यहूदा केर राजा के दन्ड देक तेहें, नबूकदनेस्सर केर पालटन गिला राजा केर बेटा के उकर पासेइ मराय देलयँ आर फिन उके अन्धा कइर देलयँ। इकर बादे, उमन राजा के ले गेलयँ ताकि ऊ बेबीलोन केर जेहेल मेहेन मइर जाउक।

नबूकदनेस्सर आर उकर पालटन गिला यहूदा केर राइज के करिबन सभेइ लोग गिला के बेबीलोन ले गेलयँ, केबल सउब लेक बेसी गरीब लोग गिला के पेछु छोइड़ कहन ताकि उमन खेत गिलाय फसल उगाउन। समइ केर इ काल के बन्धुआई कहल जाय आहे जेटाय परमेश्‍वर केर लोग गिला के परतिंगा केर देस लेक निकइल जायेक तेहें बिबस करल जाय रहे।

भलेइ परमेश्‍वर निजेक लोग गिला के उमनेक पाप केर तेहें बन्धुआई मेहेन ले जायेक दाराय दन्ड देलक, तेउ ऊ उमन के चाहे आपन परतिंगा गिला के नाइ बिसइर रहे। परमेश्‍वर निजेक लोग गिला केर देखरेख करेक जारी राखलक आर निजेक भबिस्यबक्ता गिला केर दाराय उमन लेक कथा करते रहलक। ऊ परतिंगा करलक कि सत्तर बछर केर बादे, उमन फिन परितंगा केर देस मेहेन घुइर आबयँ।

करिबन सत्तर बछर केर बादे, फारस केर राजा कुस्रु बेबीलोन के हराय देलक, सेतेहें बेबीलोन केर साम्राज्य केर बदली फारस केर साम्राज्य कयो देस गिलाय सासन करलक। इस्राएली लोग गिला एधाँव यहूदी कहात रहयँ। उमनेक मइध लेक ढेइर गिला आपन पूरा जीबन बेबीलोन मेहेन बिताय रहयँ। केबल बहुत कमे बूढ़ा यहूदी गिला केइ यहूदा केर देस याइद रहे।

फारसी लोग बेजाइन सामर्थी रहयँ, किन्तु उमन आपन जीतल लोग गिलाक उपरे दया कइर रहयँ। फारसी लोग गिला केर राजा बनेक कुछ समइ केर बादे, कुस्रु एकटा आदेस देलक कि केउ यहूदी जे यहूदा देस घुरेक चाहत रहयँ, उमन फारस लेक निकइल कहन वापस यहूदा जाय पारयँ। हिआँ तक कि ऊ उमन के मन्दिर के फिन बनायेक तेहें धनउ देलक। सेतेहें बंधुआई केर सत्तर बछर केर बादे, यहूदी गिला एकटा छोटे समूह यहूदा मेहेन यरुशलेम नगर के घुइर आलयँ।

जखन उ लोग गिला यरुशलेम पहँचलयँ तो उमन मन्दिर के आर नगर केर चाइरो बाटेक पाचीर के फिन बनालयँ। फारसी लोग गिला एधाँव उमनेक उपरे सासन करत रहयँ लेकिन एक धाँव फिन उमन परतिंगा केर मेहेन रइत रहयँ आर मन्दिर मेहेन आराधना करत रहयँ।