21. परमेश्‍वर मसीह केर परतिंगा करेला

जखन परमेश्‍वर संसार केर सिरिस्टी कइर रहे, ऊ जानत रहे कि उके बादे कनअ दिन मसीह के पइठाय हइ। ऊ आदम आर हव्वा संगे परतिंगा करलक कि ऊ एसन करी। ऊ कहलक कि हव्वा लेक एकटा बंसज जनम लेइ जे साँप केर मुड़ के छेंछी। जन साँप टा हव्वा के धोखा देलक उटा नि: सन्देह सयतान रहे। परमेश्‍वर केर मतलब रहे कि मसीह पूरा पूरी सयतान के हराय देइ।

परमेश्‍वर अब्राहम लेक परतिंगा कइर रहे कि उकर दाराय संसार केर सउब जाइते लोग गिला आसिरबाद पाबयँ। परमेश्‍वर बादे कनअ समइये मसीह के पइठायेक दाराय इ परतिंगा के पूरा करी। उ मसीह संसार केर हर एक जाइत मइध लेक लोग गिला उमनेक पाप लेक छोड़ाइ।

परमेश्‍वर मूसा संगे परतिंगा कइर रहे कि भबिस्य मेहेन ऊ मूसा केर समान एकटा दसर भबिस्यद्बक्ता के पइठाइ। इ भबिस्यद्बक्ता टा मसीह हइ। इ रकम लेक, परमेश्‍वर फिन परतिंगा करलक कि ऊ मसीह के पइठाइ।

परमेश्‍वर राजा दाऊद लेक परतिंगा कइर रहे कि उकर एकटा बंसज मसीह हइ। ऊ राजा हइ आर परमेश्‍वर केर लोग गिलाक उपरे सदा केर तेहें सासन करी।

परमेश्‍वर यिर्मयाह भबिस्यद्बक्ता लेक कथा करलक आर कहलक कि एक दिन ऊ एकटा नावा वाचा बाँधी। उ नावा वाचा इस्राएल केर संगे सीनै मेहेन बाँधल पुरना वाचा जेसन नाइ हइ। जखन लोग गिलाक संगे ऊ आपन नावा वाचा के बाँधी, तो ऊ उमनेक उपरे खुद के बेक्तिगत रुप लेक परगट करी। हर एक झन उटा लेक प्रेम राखबयँ आर उकर बेबस्था केर पालन करे केर हिंछा राखबयँ। परमेश्‍वर कहलक, कि इटा उकर बेबस्था केर उमनेक हिरदय गिलाय लिख देक जेसन हइ। उमन उकर लोग गिला हबयँ, आर परमेश्‍वर उमनेक पाप गिला के छमा करी। उ मसीह हइ जे उमनेक संगे उ नावा वाचा के बाँधी।

परमेश्‍वर केर भबिस्यद्बक्ता इटाउ कहलक कि मसीह एकटा भबिस्यद्बक्ता हइ। एकटा भबिस्यद्बक्ता उ अदमी हेके जे परमेश्‍वर केर बचन गिला के सुनेला आर फिन लोग गिलाय परमेश्‍वर केर सन्देस गिला केर घोसना करेला। जेके पइठायेक केर परमेश्‍वर परतिंगा कइर रहे उ मसीह एकटा सिद्ध भबिस्यद्बक्ता हइ। यानी उ मसीह परमेश्‍वर केर सन्देस गिला के बेस निहार सुनी, आर उ लोग गिला के उ सन्देस गिला के बेस निहार सिखाइ।

इस्राएली याजक गिला केर तेहें परमेश्‍वर केर आघुवे बलिदान चेढ़ायेक जारी राखलक। इ बलिदान टा लोग गिलाक पाप गिला केर तेहें उमन के परमेश्‍वर केर दाराय दन्ड देक बदलीये चेढ़ाल जाय रहे। याजक गिला लोग गिलाक तेहें पारथनाउ करलयँ। किन्तु उ मसीह सिद्ध महायाजक हइ जे परमेश्‍वर के देक तेहें एकटा सिद्ध बलि केर रुप मेहेन खुद के चेढ़ाय देइ। यानी ऊ कबउ पाप नाइ करी, आर जखन ऊ खुद के बलि हयेक तेहें देइ, तो संसार केर कनअय दसर बलि केर दरकार नाइ हइ।

लोग गिला केर समूह उपरे राजा आर परधान सासन करयलाँ, आर कबउ-कबउ उमन गलतीयो करयलाँ। राजा दाऊद केबल इस्राएल गिलाक उपरे सासन करलक, किन्तु राजा दाऊद केर बंसज मसीह गोटा संसार उपरे सासन करी, ऊ हमेसा केर तेहें सासन करी। इकर अलावे, ऊ हमेसा न्यायपूर्न रीति लेक सासन करी, आर सही निर्नय गिला के लेइ।

परमेश्‍वर केर भबिस्यद्बक्ता गिला मसीह केर बारे ढेइरे कथा गिला के कहलयँ। उदाहरन केर तेहें, मलाकी कहलक कि मसीह केर आयेक लेक पहिले एकटा दसर भबिस्यद्बक्ता आइ। उ भबिस्यद्बक्ता टा बेजाइन महत्वपुर्न हइ। इकर अलावे, यशायाह भबिस्यद्बक्ता लिख आहे कि मसीह एकटा डिंड़ा बेटी छुवा लेक जनम लेइ। आर मीका भबिस्यद्बक्ता कहलक कि मसीह बैतलहम नगर मेहेन जनम लेइ।

यशायाह भबिस्यद्बक्ता कहलक कि मसीह गलील क्षेत्र मेहेन बासा करी। जे गिला बेजाइन दुखी आहयँ मसीह उमन के सान्ति देइ। ऊ कैदी गिला कउ आजाद करी। मसीह रोगी गिला के आर जे सुने नाइ पारयलाँ, देखे नाइ पारयलाँ, बोले नाइ पारयलाँ, चाहे चले नाइ पारयलाँ उमन कउ चंगा करी।

यशायाह भबिस्यद्बक्ता इटाउ कहलक कि लोग गिला मसीह लेक नफरत करबयँ आर उके स्वीकार करेक लेक इंकार कइर देबयँ। दसर भबिस्यद्बक्ता गिला कहलयँ कि मसीह केर एकटा संगी उकर बिरुद्ध उठी। जकर्याह भबिस्यद्बक्ता कहलक कि उकर इ संगी टा एसन करेक तेहें दसर लोग गिला लेक चाँदी केर तीस टा सिक्‍का लेइ। इकर अलावे, थोड़ेक भबिस्यद्बक्ता गिला कहलयँ कि लोग गिला मसीह के मराय देबयँ, आर इटा कि उमन उकर लूगा गिला केर तेहें जुआ खेलबयँ।

भबिस्यद्बक्ता गिला इटाउ कइह देलयँ कि मसीह का निहार मरी। यशायाह भबिस्यद्वाणी करलक कि लोग गिला मसीह उपर थुकबयँ, उकर मजाक उड़ाबयँ, आर उके पिटबयँ। उमन उके छेदबयँ आर ऊ बेजाइन दुखा आर बाथा मेहेन मइर जाइ, जखन कि ऊ कनअय गलत नाइ कइर हइ।

भबिस्यद्बक्ता गिला इटाउ कइह दे रहयँ कि मसीह पाप नाइ करी। इ सिद्ध हइ। किन्तु ऊ एहे तेहें मरी परमेश्‍वर उके दसर लोग गिला केर पाप गिला केर चलते दन्ड देइ। उकर मरेक लेक लोग गिला परमेश्‍वर केर संगे मेल करेक मेहेन सक्षम हबयँ। एहे तेहें परमेश्‍वर चाहेला कि मसीह मरुक।

भबिस्यद्बक्ता गिला इटाउ कइह देलयँ कि परमेश्‍वर मसीह के मरल मइध लेक जीयँत करी। इटा दर्सायला कि इ सउब नावा वाचा के बाँधे केर परमेश्‍वर केर जोजना रहे, ताकि ऊ उ लोग गिला के बाँचाय पारुक जे गिला उकर बिरुद्ध पाप कइर आहयँ।

परमेश्‍वर भबिस्यद्बक्ता गिलाय मसीह केर बारे बेजाइन कथा गिला के परगट करलक, किन्तु मसीह उ भबिस्यद्बक्ता गिला मइध लेक केकरअ जीबन काल मेहेन नाइ आय रहे। इ भबिस्यद्वानी गिला के देल जाय केर चाइर सअ लेक बेसी बछर केर बादे, सही समइ मेहेन, परमेश्‍वर मसीह के इ संसार मेहेन भेजी।