22. योहन केर जनम

बितल समइ मेहेन, परमेश्‍वर आपन भबिस्यद्बक्ता गिला लेक कथा कइर रहे सेतेहें उ गिला लोग गिला लेक कथा करे पाइर रहयँ। किन्तु उ समइ लेक ले कहन फिन चाइर सअ बछर केर बितेक तक ऊ उमन लेक कथा नाइ करलक। तखन परमेश्‍वर जकर्याह नामेक याजक केर पासे एकटा सरगदूत के पइठालक। जकर्याह आर उकर पत्नी एलीशिबा परमेश्‍वर केर आदर करत रहयँ। उमन ढेइरे बूढ़ा-बूढ़ी हय जाय रहयँ, आर उमनेक कनअ छुवा उत्पन्‍न नाइ हय रहयँ।

ऊ सरगदूत जकर्याह के कहलक, “तर पत्नी केर एकटा बेटा उत्पन्‍न हय। तयँ उकर नाम योहन राखबे। परमेश्‍वर उके पबित्रात्मा लेक परिपुर्न करी, आर योहन लोग गिला के मसीह के ग्रहन करेक तेहें तेयार करी।” जकर्याह जबाब देलक, “मयँ आर मर पत्नी छुवा उत्पन्‍न करेक तेहें बेजाइन बूढ़ा-बूढ़ी आही! मयँ का निहार जानमुँ कि तयँ मर लेक सत कहोतिहिस?”

उ सरगदूत टा जकर्याह के जबाब देलक, “तर पासे इ बेस खबर के लानेक तेहें मयँ परमेश्‍वर केर दाराय पइठाल जाय आहँ। काहेकि तयँ मर उपरे बिसास नाइ करले, सेतेहें छुवा केर जनमेक तक तयँ बोलेक मेहेन सक्षम नाइ हबे।” तुरतेइ, जकर्याह बोलेक मेहेन असमर्थ रहे। तखन ऊ सरगदूत जकर्याह केर तहाँ लेक चइल गेलक। इकर बादे, जकर्याह घर घुइर आलक आर उकर पत्नी भारी गात हलक।

जखन एलीशिबा छह महीना केर भारी गाते रहे, तो ओहे सरगदूत टा अचकाय एलीशिबा केर गतिया उपरे परगट हलक, जेकर नाम मरियम रहे। मरियम डिंड़ाय रहे आर बिहा हयेक तेहें यूसुफ नामेक एकटा पुरुस केर संगे उकर मंगनी हय चुइक रहे। सरगदूत कहलक, “तयँ भारी गात हबे आर एकटा बेटा के जनम देबे। तके उकर नाम यीशु राखेक आहे। ऊ सर्बसक्तिमान परमेश्‍वर केर बेटा हइ आर सदा केर तेहें सासन करी।”

मरियम जबाब देलक, “इटा का निहार हइ, काहेकि मयँ तो डिंड़ाय आहँ?” उ सरगदूत टा समझालक, “पबित्रात्मा तर उपरे आइ, आर परमेश्‍वर केर सामर्थ तर उपरे छाँहिर करी। सेतेहें उ छुवा टा पबितर हइ, आर ऊ परमेश्‍वर केर बेटा हइ।” जेटा उ सरगदूत टा कहलक उटा के मरियम बिसास करलक।

इटा हल तुरुत बादे, मरियम जाय कहन एलीशिबा संगे भेंट करलक। जेसनेइ मरियम उके नमस्कार करलक, एलीशिबा केर छुवा उकर पेट भीतरे हड़बड़ालक। उमनेक तेहें परमेश्‍वर जेटाइ कइर रहे उकर बारे उ बेटी छुवा गिला एक संगे आनन्दित हलयँ। एलीशिबा केर संगे तीन महीना रहेक बादे, मरियम आपन घर घुइर गेलक।

इकर बादे, एलीशिबा आपन छुवा के जनम देलक। जकर्याह आर एलीशिबा उ छुवा केर नाम योहन राखलयँ, जेसन कि उ सरगदूत टा आदेस दे रहे। तखन परमेश्‍वर जकर्याह के बोलेक मेहेन सक्षम करलक। जकर्याह कहलक, “परमेश्‍वर केर स्तुति हउक, काहेकि ऊ आपन लोग गिला केर साहेता करेक तेहें याइद राइख आहे! ए मर बेटा, तयँ सर्बसक्तिमान परमेश्‍वर केर भबिस्यद्बक्ता हबे। तयँ लोग गिला के बताबे कि उमन केसन आपन पाप गिला केर तेहें छमा पाय पारबयँ।”