23. यीशु केर जनम

यूसुफ नामेक एकटा धरमी अदमी केर संगे मरियम केर मंगनी हय चुइक रहे। जखन ऊ सुनलक कि मरियम भारी गात मेहेन आहे तो ऊ जानत रहे कि ऊ उकर छुवा ना लागे। किन्तु ऊ मरियम के बदनाम नाइ करेक चाहत रहे, सेतेहें ऊ उकर उपरे किरपा करे केर आर चुपचाप तलाक दे केर सोंचलक। किन्तु इकर लेक पहिले कि ऊ एसन करतक, एकटा सरगदूत उके सपन मेहेन आय कहन उकर संगे कथा करलक।

ऊ सरगदूत टा कहलक, “ए यूसुफ, मरियम के आपन पत्नी केर रुप मेहेन ले आनेक तेहें ना डराबे। उकर भीतर जन छुवा टा आहे ऊ पबित्रात्मा बाटे लेक आहे। ऊ एकटा बेटा के जनम देइ। उकर नाम यीशु राखबे (जेटाक माने हेके, ‘यहोवा बचायला’), काहेकि ऊ लोग गिला के उमनेक पाप केर दन्ड लेक बाँचाइ।”

सेतेहें यूसुफ मरियम के बिहा करलक आर उके आपन पत्नी केर रुप मेहेन घर ले आनलक, किन्तु उकर छुवा केर जनम देक तक ऊ उकर संगे नाइ सुतलक।

जखन मरियम केर जनम देक समइ टा पासे रहे, तो ऊ आर यूसुफ बैतलहम जायेक तेहें एकटा लम्बा यात्रा करलयँ। उमन के हुआँ जायके रहे काहेकि रोमी अधिकारी इस्राएल मेहेन रहइया सभे लोग केर गिनती करेक चाहत रहयँ। उमन चाहत रहयँ कि सभे लोग गिला हुआँ जाउन जहाँ उमनेक पुरखा गिला रहत रहयँ। राजा दाऊद केर जनम बैतलहम मेहेन हय रहे, आर ऊ मरियम आर यूसुफ दुइयो के पुरखा रहे।

मरियम आर यूसुफ बैतलहम गेलयँ, किन्तु हुआँ जानवर गिला के रहइया जायगा केर अलावे उमन के ठहरेक तेहें कनअ जायगा नाइ रहे। ओहे जायगा रहे जहाँ मरियम आपन छुवा के जनम देलक। ऊ उके बामनी मेहेन सुतालक काहेकि हुआँ उमनेक तेहें कनअ बिछना नाइ रहे। उमन उकर नाम यीशु राखलयँ।

ओहे राइते, हुआँ पासे केरेइ टाँइड़ मेहेन कुछ चरवाह गिला आपन भेड़ी गिला केर गठ केर रखवाली करत रहयँ। अचकाय, एकटा चमकदार सरगदूत उमनेक तहाँ परगट हलक, आर उमन डराय गेलयँ। उ सरगदूत टा कहलक, “ना डराबा, काहेकि मर पासे तोहरेक तेहें बेस खबर आहे। बैतलहम मेहेन मसीह, परभु केर जनम हय आहे!”

“जाय कहन उ छुवा केर खोज करा, आर तोहरे उके लूगाय लेपटाल आर बामनी मेहेन सुतल पाबा।” अचकाय, आकास सरगदूत गिला लेक भइर गेलक। उमन परमेश्‍वर केर स्तुति करत रहयँ। उमन कहलयँ, “सम्पूर्न महिमा सरग मेहेन बिराजमान परमेश्‍वर के मिलुक। पिरथिबी उपरे उ लोग गिला मेहेन सान्ति हउक जेकर ऊ चिन्ता करेला।”

तखन सरगदूत गिला चइल गेलयँ। उ चरवाह गिलाउ आपन भेड़ी गिला के छोइड़ कहन छुवा के देखेक गेलयँ। चाँड़ेइ उमन उ जायगाय पहँचलयँ जहाँ यीशु रहे आर उमन उके बामनी मेहेन सुतल पालयँ, जेसन कि उ सरगदूत गिला कइह रहयँ। उमन बेजाइन उत्साहित रहयँ। तखन उ चरवाह गिला वापस हुआँ घुइर गेलयँ जहाँ उमनेक भेड़ी गिला रहयँ। उमन जे कनअ सुनलयँ आर देखलयँ उ सउब केर तेहें उमन परमेश्‍वर केर स्तुति करत रहयँ।

पूर्बे दूर एकटा देस मेहेन कुछ पुरुस गिला रहयँ। उमन तारेया केर अध्ययन कइर रहयँ आर उमन बेजाइन बुद्धिमान रहयँ। उमन एकटा असामान्य तारेया के आकास मेहेन देखलयँ। उमन कहलयँ कि इकर माने हेके कि यहूदी गिला केर एकटा राजा केर जनम हय आहे। सेतेहें उमन उ छुवा के देखेक तेहें आपन देस लेक यात्रा करे केर निर्नय लेलयँ। एकटा लम्बा यात्रा केर बादे, उमन बैतलहम आलयँ आर उ घर के पालयँ जहाँ यीशु आर उकर माँय बाप ठहरल रहयँ।

जखन इ पुरुस गिला यीशु के आपन माँय केर संगे देखलयँ तो उमन घुटना देइक कहन उकर आराधना करलयँ। उमन यीशु के किमती उपहार देलयँ। फिन उमन घर वापस घुइर गेलयँ।