24. योहन यीशु के बपतिस्मा देला

एलीशिबा आर जकर्याह केर बेटा योहन, बड़े हय कहन एकटा भबिस्यद्बक्ता बइन गेलक। ऊ बने रहत रहे, आर बनेक मधु आर फेनगा गिला के खात रहे, आर ऊँट केर रौवाँ लेक बनल लूगा गिला के पिंधत रहे।

ढेइर लोग गिला योहन केर कथा गिला के सुनेक तेहें बने बाहराय कहन आलयँ। ऊ इटा कइह कहन उमन के परचार करलक, “पछताप करा, काहेकि सरग केर राइज पासे आहे!”

जखन लोग गिला योहन केर सन्देस के सुनलयँ, तो उमनेक मइध लेक ढेइरे झन आपन पाप गिला लेक पछताप करलयँ, आर योहन उमन के बपतिस्मा देलक। योहन के देखेक तेहें ढेइरे धारमिक आगुवा गिलाउ आलयँ, किन्तु उमन आपन पाप गिला केर पछताप चाहे अंगीकार नाइ करलयँ।

योहन धारमिक आगुवा गिला के कहलक, “ए जहरीला साँप गिला! पछताप करा आर आपन बेबहार के बदला। परमेश्‍वर हर उ गाछ के काटी जे बेस फर नाइ देला, आर ऊ उके आइग मेहेन फेंइक देइ।” जेटा भबिस्यद्बक्ता कइह रहे योहन उटा के पूरा करलक, “देखा,‍ चाँड़ेइ मयँ तोहरेक आघु आपन सन्देसवाहक के पइठामुँ जे तोहरेक तेहें डहर के तेयार करी।”

कुछ धारमिक आगुवा गिला योहन के पुछलयँ कि का ऊ मसीह हेके। योहन जबाब देलक, “मयँ मसीह ना लागँ, किन्तु ऊ मर बादे आतेहे। ऊ एतना महान् आहे कि मयँ उकर जूता गिला केर फीता के खलेक लाइको नेखँ।”

आघुग दिन, यीशु बपतिस्मा लेक तेहें योहन केर पासे आलक। जखन योहन उके देखलक, तो ऊ कहलक, “देखा! परमेश्‍वर केर भेड़ा छुवा जे संसार केर पाप गिला के उठाय कहन ले जातेहे।”

योहन यीशु के कहलक, “मयँ तके बपतिस्मा देक लाइक नेखँ। इकर बदली दरकार आहे कि तयँ मके बपतिस्मा देहिन।” किन्तु यीशु कहलक, “तकेइ मके बपतिस्मा देक चाही, काहेकि करेक तेहें सही काम एहे टाइ हेके।” सेतेहें योहन उके बपतिस्मा देलक, जखन कि यीशु कबउ पाप नाइ कइर रहे।

बपतिस्मा देल बादे जखन यीशु पानी लेक निकइल कहन बाहिर आलक, तो परमेश्‍वर केर आत्मा पेरवाँ केर रुप मेहेन परगट हलक आर हेंठे आय कहन उकर उपरे ठहइर गेलक। ओहे समइ, परमेश्‍वर सरग लेक कथा करलक। ऊ कहलक, “तयँ मर बेटा हेकिस। मयँ तर लेक प्रेम करलाँ, आर मयँ तर लेक बेजाइन खुस आहँ।”

परमेश्‍वर योहन के कहलक, “पबित्रात्मा हेंठे आय कहन केकरअ उपरे ठहइर जाइ जेके तयँ बपतिस्मा देबे।” ओहे परमेश्‍वर केर बेटा हेक परमेश्‍वर एकटाइ आहे। किन्तु जखन योहन यीशु के बपतिस्मा देलक, तो ऊ परमेश्‍वर बाप के कथा करत के सुनलक, बेटा परमेश्‍वर के देखलक, जे कि यीशु हेके, आर ऊ पबित्रात्मा के देखलक।