25. सयतान यीशु केर परीछा करेला

यीशु केर बपतिस्मा हल केर तुरुत बादेइ, पबित्रात्मा उके बन मेहेन ले गेलक। यीशु हुआँ चालीस दिन आर चालीस राइत रहे। उ समइ उ उपास करलक, आर सयतान यीशु केर पासे आय कहन पाप करुवायेक तेहें उकर परीछा करलक।

पहिले, सयतान यीशु के कहलक, “जदि तयँ परमेश्‍वर केर बेटा हेकिस हले इ पाखना गिला के पिठा बनाय देहिन ताकि तयँ खाय पारिस!”

किन्तु यीशु सयतान के कहलक, “परमेश्‍वर केर बचन मेहेन इटा लिखल आहे, ‘जीयँत रहेक तेहें मानुस के केबल पिठा केर दरकार नेखे, किन्तु उके हर उ कथा केर दरकार आहे जेटा परमेश्‍वर उकर लेक कहेला!’”

तखन सयतान यीशु के मन्दिर केर सउब लेक ऊँचा चुटी मेहेन ले गेलक। ऊ उके कहलक, “जदि तयँ परमेश्‍वर केर बेटा हेकिस हले हुआँ लेक हेंठे डेइग देहिन, काहेकि लिखल आहे, ‘परमेश्‍वर तके उठायेक तेहें आपन सरगदूत गिला के आग्या देइ कि तर गड़ गिलाय पाखना लेक ठेंस ना लागुक।’”

किन्तु यीशु उटा नाइ करलक जेटा सयतान उके करेक तेहें कइह रहे। बदलीये, ऊ कहलक, “परमेश्‍वर हर एक लेक कहेला, ‘तयँ परभु आपन परमेश्‍वर केर परीछा ना करबे।’”

फिन सयतान उके संसार केर गोटा राइज के देखालक। ऊ उके देखालक कि उ गिला कतना सक्तिसाली रहयँ,आर उ गिला कतना सम्पन्‍न रहयँ। ऊ यीशु के कहलक, “मयँ तके इ सउब के देमू जदि तयँ घुटने टेइक कहन मर उपासना करबे।”

यीशु जबाब देलक, “ए सयतान, मर पास लेक चइल जाहिन! परमेश्‍वर केर बचन मेहेन ऊ लोग गिला के आदेस देला, केबल आपन परभु परमेश्‍वर केर आराधना करा। परमेश्‍वर केर रुप मेहेम केबल उकरे आदर करा।”

यीशु सयतान केर परीछा लेक हार नाइ मानलक, सेतेहें सयतान उकर पास लेक चइल गेलक। तखन सरगदूत गिला आय कहन यीशु केर सेवा सुसरा करे लागलयँ।