26. यीशु आपन सेवा सुरु करेला

सयतान केर परीछा गिलाक इंकार करेक बादे, यीशु वापल गलील क्षेत्र मेहेन आलक। एहटाइ उ जायगा हेके जहाँ ऊ रहत रहे। पबित्रात्मा उके बेजाइन सामर्थ देत रहे, आर यीशु एक जायगा लेक दसर जायगा बाटे गेलक आर लोग गिला के सिछा देलक। सभे काइ उकर बारे बेस कथा गिला कहलयँ।

यीशु नासरत नगर मेहेन गेलक। इटा उ गाँव हेके जहाँ ऊ आपन बचपन मेहेन रहत रहे। सब्त केर दिने, ऊ आराधना करेक जायगा मेहेन गेलक। आगुवा गिला उके यशायाह भबिस्यद्बक्ता केर सन्देस गिलाक एकटा किताब देलयँ। उमन चाहत रहयँ कि ऊ उटा लेक पढ़ुक। सेतेहें यीशु उ किताब टाके खइल कहन उटाक एकटा हिस्सा के लोग गिलाक तेहें पढ़लक।

यीशु पढ़लक, “परमेश्‍वर मके आपन आत्मा दे आहे ताकि मयँ कंगाल गिला के सुसमाचार परचार करे पारँ। ऊ मके एहे तेहें पइठालक कि कैदी गिला के आजाद करँ, अन्धा गिला के फिन देखे पाउन, आर उमन के छुटकारा दे पारँ जेके दसर लोग टा सतातेहे। इटा उ समइ हेके जखन परमेश्‍वर हामरे उपरे कृपालु हइ आर हामरे केर साहेता करी।”

फिन यीशु बइस गेलक। सउब लोग गिला उके बेजाइन धेयान लेक देखत रहयँ। उमन जानत रहयँ कि पबित्र शास्त्र केर उ हिस्सा टाके उ एखन पइढ़ रहे उटा मसीह केर बारे मेहेन रहे। यीशु कहलक, “जन कथा गिला के मयँ एखन तोहरेक तेहें पढ़लँ, उ गिला इ समइ घटित हतेहे।” सउब लोग गिला चकित रहयँ। उमन कहलयँ, “का इटा यूसुफ केर बेटा ना लागे?”

तखन यीशु कहलक, “इटा सच हेके कि लोग गिला कनअ एसन भबिस्यद्बक्ता के कबउ स्वीकार नाइ करतयँ जे उमनेक नगर मेहेन पइस-बाढ़ल हइ। एलिय्याह भबिस्यद्बक्ता केर समइ मेहेन, इस्राएल मेहेन बेजाइन बेसी राँड़ी गिला रहयँ। किन्तु जखन साढ़े तीन बछर तक बारिस नाइ हलक तो परमेश्‍वर एलिय्याह के इस्राएल मेहेन कनअ राँड़ी के साहेता करेक तेहें नाइ पइठालक। इकर अलावे, ऊ एलिय्याह के कनअ दसर देस केर राँड़ी केर पासे पइठालक।”

यीशु कहेक जारी राखलक, “आर एलीशा भबिस्यद्बक्ता केर समइ मेहेन, इस्राएल मेहेन बेजाइन चाम रोग लेक पीड़ित रहयँ। किन्तु एलीशा उमनेक मइध लेक केकउ के चंगा नाइ करलक। ऊ केबल इस्राएल केर दुस्मन गिला केर सेनापति नामान के चंगा करलक।” किन्तु जन लोग गिला यीशु केर सुनत रहयँ उमन यहूदी गिला रहयँ। सेतेहें जखन उमन उके इटा कहत के सुनलयँ तो उमन उकर उपरे खिंसालयँ।

नासरत केर लोग गिला यीशु के धइर लेलयँ आर उके आराधना केर जायगा लेक घिसराय कहन बाहिर ले गेलयँ। उमन उके मरायेक तेहें हेंठे फेंइक गिरायेक तेहें एकटा पहाड़ उपरे ले गेलयँ। किन्तु यीशु भीड़ मइध लेक निकइल गेलक आर नासरत नगर के छोइड़ कहन चइल गेलक।

फिन यीशु गोटा गलील क्षेत्र मेहेन गेलक, आर बड़े भीड़ उकर पासे आलक। उमन एसन बेजाइन लोग गिला के ले कहन आलयँ जे रोगी आर बिकलांग रहयँ। उमनेक मइध लेक थोड़ेक देखे, चलेक, सुनेक चाहे बोलेक नाइ पारत रहयँ, आर यीशु उमन के चंगा करलक।

इकर अलावे, बेजाइन एसन लोग यीशु केर पासे लानल गेलयँ जेकर मेहेन दुस्टात्मा गिला रहयँ। यीशु दुस्टात्मा गिला के उमनेक मइध लेक निकइल जाय केर आदेस देलक। उ दुस्टात्मा गिला हमेसा चिलालयँ, “तयँ परमेश्‍वर केर बेटा हेकिस।” भीड़ केर लोग गिला चकित रहयँ, आर उमन परमेश्‍वर केर स्तुति करलयँ।

फिन यीशु बारो टा पुरुस गिला के चुनलक जेके ऊ आपन प्रेरित कहलक। उ प्रेरित गिला उकर संगे यात्रा करलयँ आर उकर लेक सिछा प्राप्त करलयँ।